Kájubu keehaŋe ku t'Atambatun
3
Kújakuwe,
hahiyu iisokuun bonde:
kikawuun kutoof naane árihine i t'afeeneŋ n'Anahaan u.
It'ílaam hikee ti kasoku koonuun b'iheeke bu iikiñj,
abe bo bihaŋe fu káwooru bija t'aruun.
2 Aritey kiŋki káhin beejakut bu,
keeemo ku búkuruka,
abe ni kajok *kateyi karam doon dómbokun!
3 Keeteye ku karam nu múniyo kaamo fu úne.
Ábuki úne uf'úlaw Atambatun ti sembe site Búwejet boone,
úne kuŋk'úsaŋgoor ni Yesu *Kiris,
abe úsikut kikaw úne únaŋ t'ejoosan ite kúŋgowulan ku.
4 Abe bare íñje yooŋ íyinooni yéeni kásiku hikawam inaŋ t'ejoosan yendu.
An af'ayinoor ti hikawo n'aane t'ejoosan ite kúŋgowulan ku t'anaŋe fu eyakar yeene,
eenaan íñje yéeni iwaro fu kahaŋu kayinoor bondu.
5 Iteyaneeteyan karam h'ibukee hu ibaj kunak hutok ni kíhaajib.
Íñje an ite *Israyel,
íñje ite tu noota nite *Beŋsame.
Sifaafam ni síñaayam fe Esuwif.
Íjeŋginajeŋgin Eluwa yite Esuwif i naane *Afarisiyeŋ aa áhin. c d
6 Ítumbatumba ijok bítim bondu naane,
isooñen n'iŋ'íhihinoor kéeyilene ku ti Kirise.
Ítumbatumba íhin naane eluwa i esoke i isooñen an ayinaatam kawatan tu doon.
7 Iŋ'eene yéeni bondu búkooki éñjeriŋ t'íñje,
bare hahiye iŋ'ijok bo naane beejarut doon fe iŋ'ite hu Yesu Kiris.
8 Abe it'iraan tu bondu barebare.
Doon d'íhine fe,
ijokajok do naane deejarut doon,
iŋ'ite hu bonde beehaŋe bu bo fe,
beeemo bu kámeyi kite Yesu Kiris Anahaan úuma.
Iwasawas buroon bu fe uŋu hoone hu.
Ijokajok bo naane bite káfiiten tu kuwos,
kaanuku man n'ibaj Kiris,
9 abe n'íhin ne o t'afeeneŋ íhabanein.
Iŋkut eene íñj'eemo an éejube aŋarkeyi naane iŋ'íhin naane Eluwa i esoke i.
Iŋ'ite káyilen kúuma ti Kiris h'eemo fu an éejube.
Kájubu ku,
t'Atambatun tu kúnuutina fu,
abe aŋ'awun ko an fe éeyilene te o.
10 Doon d'ihaŋe du kámaŋi fe deemo fu kámeyi Kiris,
ni sembe seeritano su t'eket i.
Ímaŋamaŋi yooŋ kajuku sílaam naane akina,
abe n'iket yooŋ naane akina.
11 Iyu,
n'iŋ'ibaj eyakar kaanuku íñje karitanee t'eket i.
Káñiŋkaan ti bija hágila
12 Eenut iheeka iibaj b'iŋese bu,
man yooŋ iheeka iikuuranee but.
Bare íñj'endu ti kateyi kep kaanuku man n'iheek íisik hisiibanu hu,
ábuki Yesu *Kiris aheeka eejokam t'emoŋu.
13 Kújakuwe,
íyilenut kaanuku iheeka íisik hisiibanu hu.
Bare iŋ'ifiil beeemo bu inde hiñaawiam,
abe n'íñiŋkaan man n'ireeŋ beeemo bu hágilaam.
Náami doon difeeneŋ d'eemo fu ti káhinu:
14 íñj'endu ti kateyi kep kaanuku man n'ísik hisiibanu hu.
Atambatun aruwaruw úne kaanuku núusik ho t'etiir iŋi naane úhine i t'afeeneŋ ni Yesu Kiris.
15 Úne keeyane ku ti bítim bite Atambatun,
iyu u úware fu kayinoor.
Abe bakaake t'aruun ifi kayinoor awayee,
Atambatun káwufooruun múniyo mu akuur but.
16 Naane biyino i káyemi fe,
újoŋoor t'úfiye du újund bija t'úmiye.
17 Kújakuwe,
ariliikool n'íñje arireyi fe.
Arijondoman tu buroŋ bite kiŋki kaneefan ti máhinar mite m'úne.
18 Bakan keehooje iŋi kanij naane enatoora yite Kirisf eekete u *t'ekuruwa i.
Iŋ'ifanduun bo kasoku,
abe iisooñ isokuun bo hahiye,
muhuw múuma ti bibin yooŋ kep:
19 boko búmuje tu bútowuto,
ábuki kariin keemo fu etambatun yeeniin,
abe beewariin bu yéeni káhinu keefuño,
ne bo n'ifi kasaŋgoor.
Buroon bite bu t'etaam ye taŋ b'ifi kayinoor.
20 Úne bare bakan bakate t'etiir,
abe úne bokondu ti kanahan kep Anahaan u Yesu Kiris éenuutin bo eebin eefakan úne.
21 Af'aja abin,
o katitu sini site s'úne seebajut see sembe,
éehin so seenokoor ni yeene i yéenike i.
O káhinu bondu ni sembe sinsi síkinineŋ n'áhin buroon bu fe beejam te o.