Pool n'aane akina apotor ite nu múniyo
10
Ésuk i kaane,
íñje Pool,
if'íyemi t'aruun,
iŋ'iluubo luub,
abe n'ifin ikambuun,
n'iŋ'ibaj butum.
Íñj'endu ti káwasiyanuun bonde ti *Kiris,
eeemo u an éeneenie,
abe n'ajak:
2 atum'aritiŋgam iibin ibaj butum kane ija ibin.
Bakaake t'aruun iŋi kaane manoŋkar mite m'uni,
mo naane mite mu bakate ku t'etaam ye.
Náami kane ija ibin,
bukuuramkuur kaanuku íñje kabaju tu boko butum.
3 Múniyo t'etaam ye t'irikine fu,
bare elob y'iriemo i te yo,
írilobaariit yo naane bakate ku t'etaam ye.
4 Bujuŋko bimb'irilob ne bo bíteiit bakate ku t'etaam ye:
bo bujuŋko beeyane bite Atambatun,
abe bíyinooni kábuju doon fe déerahanna te o.
Iŋ'íribuj biyinoor beenooto bite nu múniyo,
5 nu doon fe dite jísaŋg deesiiŋanee dite káfibu ésuk i kaanuku itim kámeyi Atambatun.
Iŋ'irijok yooŋ biyinoor bu fe irikul,
kaanuku íriihin bo béejeŋgin Kiris.
6 Abe af'arija ayak abin áami árijeŋgina uni fe,
n'iŋ'irifare kajoŋooran an fe éejeŋginut uni.
7 Arijondoman jak tu buroon bu.
Ufu bukuur ake kaanuku akina an ite Kiris,
aja ámeyi kaanuku uni yooŋ bakan bakate Kiris naane akina.
8 Maske ihaŋahaŋ kamaku dikee iŋ'ite sembe s'Anahaan u awune su uni.
Bare ijeit bufuño,
ábuki sembe sondu síteiit kábujuuun,
so site káhinuuun ariihaŋ kayanu ti káyilen ku.
9 Ímaŋiit ariyinoor n'ariene man íñje ímaŋiuun kákolinan ti bileetar búuma.
10 Ábuki bakaake iŋi kaane:
«Bileetar bite Pool búsufasuf,
béetaañie káhinu taŋ b'af'asok.
Abe bare af'abin beebe,
aŋ'áhin naane an eebajut sembe,
abe áyiniaariit yooŋ káhamin naane ewaaraa i kómbokun ku.»
11 An fe eesoke bondu aja ámeyi kaanuku bimb'irisokuun ti bileetar bite b'uni kane úkamboor utu buwayo hikee ni b'irija bu káhinuuun kane iribin t'aruun.
12 Irikañenut kaliikool,
man yooŋ n'iriŋes kareyi ni bakaaku kiŋki kajokooro bakan kómbokun.
Tu boko kumuumiin t'ifi kaliik,
tu boko kumuumiin yooŋ t'ifi kaliikoolo.
Diyu búsoŋotoiit?
13 Uni bare it'irimak hikee irihahan.
Uni kamaku tu burok b'Atambatun asaane bu uni barebare,
beeemo bu írireeŋin yooŋ t'aruun.
14 Eraju y'Atambatun asiiŋane i ebinabin bibin t'aruun.
Náami naane írireeŋinuun i ni Hirim Heetoofe hite hu Kiris,
irijaaŋeit eraju i.
15 Irimakut tu burok bi bakaaku káhine bu.
Bondu bijaaŋajaaŋo eraju yite y'uni.
Bare iriyakarayakar kaanuku káyilen koonuun ifi kihaŋ kayanu,
burok bite b'uni t'aruun n'iŋi bíyini yooŋ kahaŋu,
bare it'irijaaŋo eraju y'Atambatun asiiŋane ia.
16 Irihaban,
n'iŋ'íriyini bija tu búsuk béeseina bu ti yeenuun i,
iriiwaare bo Hirim Heetoofe hu.
Irijeit kawañu tu múwañiin mite bakan mi kaheeke keewañ,
iriibaj doon dite kamaku.