5
Múniyo úmoomi kaanuku sini site s'úne ufu súbujo,
so seeemo su naane búwuureey b'úkine te bo t'etaam ye,
úbajabaj t'etiir bufor bu sini seeemo naane sunuuf site hiraanu.
Atambatun afaree fu so bija t'úne,
kúŋgowulan kíiit.
2 Abe hahiye uŋ'úriŋgana aŋarkeyi naane úhaŋahaŋ kamoken kabaju sini site s'úne sondu seeemo su t'etiir.
3 Abe múniyo uf'úbaj sini sondu,
ut'úyemi bakan keebajut sini.
4 Naane uŋ'úyak bifiyo ni sini site su t'etaam ye fe,
uŋ'úriŋgan naane bakan keeniŋane.
Káanukiiit man úne úmaŋie kaketu núunuut ti sini site s'úne,
aaa.
Úne úmaŋie kabaju sini site su t'etiir,
man buroŋ béehabanaariit bu ni bimer doon deeemo du iŋi diket.
5 Abe Atambatun humuumo afaree fu úne bija tu buroŋ bondu.
Ajabajaba awun úne Búwejet Beenabe bu,
beekuur úne kaanuku aroŋa kawunu úne eke ebaj.
6 Náami ko kireyi fe kikaw úne kiyaŋgayaŋg.
Úmoomi kaanuku naane uŋ'úyak bifiyo ni sini sonde site s'úne fe,
úbaa kakamboor nu t'úyak du bibin kakinu n'Anahaan u.
7 Ábuki buroŋ bite b'úne bite bu t'etaam ye biyaajayaajo tu doon d'úyilene du,
káanukiiit man tu buroon bumb'újuk.
8 Kikaw úne kiyaŋgayaŋg piŋ,
abe b'úhaŋe bu kámaŋi beemo fu únuut ti sini sonde site s'úne,
núuja úkin kaagoroor n'Anahaan u.
9 Náami b'úhaŋe bu kámaŋi beemo fu útoofo t'úyino fe káyemi,
úne káaroŋin ni sini site s'úne,
man yooŋ úne káanuutin te so.
10 Ábuki úwarawar bibin bisiiŋo úreyi fe hágila Kiris eejoonan úne,
huruw fe eebatikanee doon d'aroke du t'enio,
man meejake,
man yooŋ meejakutb.
Kiris n'áhin núubukan n'Atambatun
11 Náami írimoomi naŋ neemo fu kákoleyi Anahaan u.
Iŋ'ite ho h'if'iriŋes káhinu ésuk i kéeyilen.
Atambatun ámoomi uni ahaban fe,
abe eenaan aruun yooŋ árimoomi uni arihaban.
12 Úniiit iŋk'irisooñ íriyemi ti jímak t'aruun;
uni iriemo ti káwufooruun bítim kaanuku ariisaŋgoor n'uni.
Iyu,
n'aŋ'áriyini kásafin kiŋki kasok t'uni.
Bokondu iŋi kasaŋgoor ni beejukanee bu keewas beeemo bu t'éhinda suhol su.
13 Arko ti bakaake t'aruun iribinabina iriwen,
n'aŋ'áami kame iŋ'ite h'Atambatun;
arko káasuumaay uni jaŋ,
n'aŋ'áami uŋu hoonuun hu.
14 Ábuki kámaŋi ki *Kiris ámaŋie ku úne kíkinie fu úne,
úne ku bukuure ku kaanuku afeeneŋ taŋ akete fu bija t'ésuk i ereyi;
aamo fu butum ésuk i ereyi fe ekete fu.
15 Aketaket bija t'ésuk i ereyi kaanuku man keeroŋe ku itim'iŋki karoŋ bija tu boko kumuumiin,
bare ni karoŋ bija t'akina eekete u,
abe n'áritein t'eket i bija tu boko.
16 Náami hahiye iŋkut irijok an naane ti bakate ku t'etaam ye kajoko du.
Múniyo kóŋkeyin irijokajok Kiris naane ti bakate ku t'etaam ye kajoko du,
bare hahiye iŋkut irijoko naane iyu.
17 An af'áhin ni Kiris t'afeeneŋ,
an ondu áyemia húŋgowulan híyeni;
beehaane bu bútowutaa,
bíyeni bisiiŋee fu.
18 Abe bondu fe t'Atambatun tu búnuutina fu,
o éehine u núubukan ne o,
aŋ'asaan bo ti Kiris.
Abe hahiye Atambatun n'asaan uni burok bondu bite káwufoor ésuk i kaanuku ámaŋamaŋi kabukan nu boko.
19 Múniyo ti Kiris t'Atambatun aŋaase fu eebukan n'ésuk i ereyi fe,
abe ajukerut tu wuhoofoor wooniin.
N'aboñ uni kawaare ésuk i hirim hondu hite hubukan hu.
20 Náami uni bakan ki Kiris aboñe,
abe ti sembe soone t'if'írihamin,
anokoor naane Atambatun humuumo af'áhaminuun.
Uni bokondu ti káwasiyanuun bonde tu huruwu hite Kiris:
waasuun,
atum'ariteñeko kabukan ku n'Atambatun.
21 Kiris ámusut káhinu kaahoofoor,
bare Atambatun asejanosejan wuhoofoor wute w'úne.
Áhinahin bondu kaanuku man úne kéehine ku t'afeeneŋ ni Kiris n'úyini káyemi bakan kéejube t'Atambatun.