Kiris aritarito t'eket i
15
Kújakuwe,
íñj'endu ti kábaŋinanuun Hirim Heetoofe h'ibine hu isokuun,
n'áriyilen ho,
abe n'arijok ho yooŋ alit tip.
2 Te ho t'Atambatun aja fu kaŋaasu eefakanuun,
kane arko ariijok ho naane t'ibine du isokuun ho.
Káhinaate iyu,
n'aŋ'áami áriiyilen fuufu.
3 Bítiyar bu ti b'iliikenuun bu fe beemo fu bonde bi kaliikenam bu yooŋ:
*Kiris aketaket bija tu wuhoofoor wute w'úne naane ti *Míkiñjin mu mifiye du musoka.
4 Ahokeehok,
abe n'aritanee t'eket i hunak híhaajiyan hu,
naane yooŋ ti Míkiñjin mu mifiye du musokb.
5 N'áŋaasin ti Piyeer,
ahaban n'áŋaasin *t'epotor i bakaakuc.
6 Hunuut toko,
n'áŋaasin t'eriboorao keehaŋe síteemeer hutok ti hífeeñin hifeeneŋ.
Keehaŋe kahooju tu boko bokondu tu buroŋ,
bakaaku bare kaketa.
7 Ahaban,
n'áŋaasin ti Saak,
abe n'áŋaasin t'epotor i kareyi fe.
8 Ahaban tu boko kareyi fe,
n'áŋaasin yooŋ t'íñjed,
íñj'eeemo u naane alekej eebukee ti kiim koone kireeŋoorut.
9 Múniyo íñj'eemo fu biraanu bite epotor i fe,
abe iwarutee yéeni kaanu apotor,
ábuki íhihinoorahihinoor *kéeyilene kue.
10 Bare Atambatun áwufooramwufoor kajaku koone éehinam íiyemi an u eemo ee,
abe naane áwufooram i kajaku koone,
áfiitenut:
irokarok ihaŋ bakaaku epotor fe.
Múniyo íñjeiit humuumam if'irok iyu,
bare kajaku k'Atambatun áwufooram ku keeemo ku t'íñje ufu kurok iyu.
11 Náami arko íñje if'iwaare,
man yooŋ bakaaku epotor,
Hirim Heetoofe hu h'if'iriwaare,
abe ho h'áriyilene fu.
Atambatun karitan úne yooŋ t'eket i
12 Naane aamo i iŋ'iriwaare iriene *Kiris aritaneeritan t'eket i,
iŋi naŋ ni bakaake t'aruun ifi kaane keekete ku iti káritein?
13 Arko múniyo keekete ku iti káritein,
kame Kiris yooŋ áriteinoot t'eket i.
14 Abe arko Kiris áriteinoot t'eket i,
n'aŋ'áami kame kawaare kite k'uni káfiiten,
káyilen koonuun yooŋ káfiiten.
15 N'aŋ'áami yooŋ kame bimb'irisok t'Atambatun bite haajuus,
ábuki irienaan aritanaritan Kiris t'eket i.
Abe kame áhinut bo,
kane arko múniyo keekete ku iti káritein t'eket i.
16 Arko keekete ku iti káritein t'eket i,
kame Kiris yooŋ áriteinoot t'eket i.
17 Abe arko Kiris áriteinoot t'eket i,
káyilen koonuun kame káfiiten,
abe n'aŋ'áami ariroŋa ti bisejo bite wuhoofoor woonuun.
18 Arko iyu,
n'aŋ'áami keekete ku boko ti káyilen ku ti Kiris,
bokondu bakan kéetowutee.
19 Arko eyakar ite úne ti Kiris t'etaam ye t'eraane fu barebare,
úne kame úhaŋe fu káyubinani kúŋgowulan ku fe.
20 Bare nu múniyo Kiris aritaneeritan t'eket i átiyar u.
Abe bondu búwufoorawufoor kaanuku keekete ku yooŋ bíriteina.
21 Ábuki naane aamo i ániine afeeneŋ ákinineŋe fu eket i n'ebaj t'etaam ye,
birito bite t'eket i yooŋ,
ániine afeeneŋ ákinineŋe fu ni bibaj.
22 Naane aamo i kúŋgowulan ku fe iŋi kaket iŋi naane káhine i t'afeeneŋ *n'Adam,
boko yooŋ bíriteina t'eket i iŋi naane káhine i t'afeeneŋ ni Kirisf.
23 Bare huruw fe ni hífinooru hoone:
Kiris aamo fu átiyar u dók ti birito bu t'eket i.
Abe h'aŋa h'ayak bíbatikeina,
bakan k'akino ku n'iŋi kafin karito.
24 Abe n'aŋ'áami kamoosen ku:
Kiris kábuju sembe sánosan fe seejakut,
n'eseef yeeniin,
nu ñúwejet ñeejakut ñu fe,
ahaban n'aŋ'abatikan Atambatun Faaf u híyiaate hu.
25 Ábuki Kiris awarawar káyemi áyi bija kóyin k'Atambatun aja ku bikalo enatoora yeene kareyi feg.
26 Anatoora eeja u kábujiee araan u aamo fu eket i.
27 Múniyo *Míkiñjin mu meenaan:
«Atambatun áhinahin Kiris éeyemi áyi tu doon areyi feh.»
Bare naane meene i «areyi fe»,
mujoloŋanut toko Atambatun eewune u Kiris sembe tu doon areyi fe.
28 Abe Kiris af'abin awunee sembe tu doon areyi fe,
n'aŋ'afin asaanooro Atambatun eewuno u sembe sondu.
Náami Atambatun n'aŋ'áyemi áyi tu doon areyi fe.
29 Abajeebaj bakaake iŋi *kabostee bija ti keekete ku.
Bondu fíya káñjeriŋiin naŋ?
Iŋi naŋ n'ifi kabostee bija ti keekete ku kane arko múniyo keekete ku iti káritein?
30 Iŋi naŋ n'if'irisoñeneno eket i ko kireyi?
31 Kújakuwe,
húnakonak fe eket i yendu ti kaŋoloolam.
Iisokuun bo aŋarkeyi naane iŋ'isaŋgoor n'aruun iŋi naane árihine i t'afeeneŋ n'Anahaan ite úne Yesu Kiris.
32 Arko elob y'ibine i ilob Efees ni bíndakakureŋ bu abe n'aane kúŋgowulan,
ilobalob yo ni biyinoor bite an ite t'etaam ye,
yo fíya káñjeriŋam?
Arko múniyo keekete ku iti káritein,
kame úhin naane busokee i ti *Míkiñjin mu.
Meenaan:
«Úñoofo abe n'úhujo,
ábuki kuwaatu úne kaketui.»
33 Atum'aribuut kikawuun:
«Kariboor ni bakan keejakut kúnooni kábuju an eejake.»
34 Áribatikann siheluun,
abe n'ariwas wuhoofoor wu.
Bakaake t'aruun kátumbut kámeyi Atambatun.
Iisok bo,
man at'arifuño?
Sini s'úyak su bíriteina ne so t'eket i
35 Maske ake kákandijen aane:
«Buŋ bi keekete ku kaja fu bíriteina?
Sini saŋka si kabin fu ne so?»
36 An ondu asoŋotaa teereŋ!
An af'áfiiten sinawaay,
sijendan kaketu ni sitik súlooñin.
37 Abe an af'ámaŋi kanawu nunukanuk,
man yooŋ dike doon naane iyu,
t'ekoŋk i t'af'ajab,
yeetik ebin élooñin yéehin himiim.
38 Abe Atambatun n'aŋ'afin áhin yo yéelooñin naane ámaŋie i,
ekoŋk-koŋk fe ni manokoorar mite te yo.
39 Kihaay kite buroon béeyekie bu síhiinu kóiit kifeeneŋ ku:
kúŋgowulan ku nu kooniin ku,
bíndakakureŋ bu yooŋ,
bija bilele bu,
ajok bisaan bu fe.
40 N'abaj yooŋ buroon beeemo bu t'etiir,
nu buroon beeemo bu t'etaam.
Máwariar mite buroon bite bu t'etiir muwayawayo ni máwariar mite buroon bite bu t'etaam.
41 Taanak tu tibajabaj máwariar mite te to,
hiim hu ni máwariar mite te ho,
búloofiiloof bu yooŋ ni máwariar mite te bo.
Humuum tu búloofiiloof bu máwariar mu muwayawayo.
42 Iyu yooŋ i bija fu káyemi kane keekete ku káritein.
Ehunuŋ ef'ehokee,
yo búbujo;
eni ef'eritanee t'eket i,
eroŋut hikee-kee búbujo.
43 Ehunuŋ eŋ'ehokee t'énikut,
t'ebajut yooŋ sembe;
eni n'eritanee t'eket i,
yo káanikin,
abe yooŋ yo ni sembe.
44 Ehunuŋ eŋ'ehokee,
yo kihaay nu kujoj;
eni n'eritanee,
yo búwejet.
Makamu eni yite kihaay abajabaj,
kame yooŋ eni yite búwejet abajabaj.
45 Múniyo *Míkiñjin mu meenaan:
«*Adam álokow átiyar u n'áyemi húŋgowulan heeroŋej.»
Adam araan u n'áyemi búwejet bumbu buwun buroŋ bu. k
46 Éniiit ite búwejet bu eemo fu étiyar i;
yite kihaay ku eemo fu étiyar i,
yite búwejet bu ésein.
47 Álokow átiyar u Adam eerokee u ni baaliisiw,
o ite t'etaaml.
Bare Adam ásooboriyan u,
o t'etiir t'ánuutina.
48 Bakate ku t'etaam i kanokooranokoor n'an eerokee u ni baaliisiw bu.
Bakate ku t'etiir ni kanokoor n'an éenuutina u t'etiir.
49 Abe naane únokoore i n'an eerokee u ni baaliisiw bu,
iyu yooŋ u úja fu kanokoor n'an éenuutina u t'etiir.
50 Kújakuwe,
b'ímaŋie bu kasoku beemo fu bonde:
doon dite kihaay ni halan diyinaat kamaatu ti *Jáyi jite Atambatun,
abe doon dite búbujo diyinaat kamaatu tu buroŋ béehabanaariit bu.
51 Arijamatan íihandinuun bonde béenuusee bee:
úreyiiit úja fu kaketu,
bare úreyi fe úne kahosanee.
52 Bondu kabaju ahil-hil naane díkin,
kane káabiinu kiraanu ku kusok.
Ábuki ufu kusok kep,
keekete ku bíriteina keebaj buroŋ béehabanaariit,
abe úne keeyak ku káyemi buroŋ n'uŋ'úhosanee yooŋm.
53 Múniyo doon deeemo uŋu dúbujo duwareewar kahosan déeyemi doon déebujaariit,
abe doon deeemo iŋi diket duwareewar kahosan déeyemi doon déeketaariit.
54 Doon deeemo uŋu dúbujo ifi dibin duhosanee déeyemi doon déebujaariit,
abe doon deeemo iŋi diket nu duhosanee déeyemi doon déeketaariit,
hirim honde heesokee hu ti Míkiñjin mu n'iŋi hihaŋ hibaj.
Heenaan:
«Eket eroŋut,
eriiŋaneeriiŋan akuur butn!»
55 «Awe eket i,
kame búriiŋan búuwe bondu diin?
Awe eket i,
kame kaabetu kúuwe kondu diino?»
56 Kaahoofoor ku keemo fu kaabetu kiŋki kibin n'eket i,
abe kaahoofoor ku kibajabaj sembe,
ábuki *Eluwa yite Moyis éwufoore fu naŋ neemo fu kaahoofoor.
57 Bare úene Atambatun eyeehen,
akina eeŋaase u t'Anahaan ite úne Yesu *Kiris éehin úne núuriiŋan eket i!
58 Náami kújakuwe,
aruun k'ímaŋie-maŋie ku,
arijok alitee,
abe n'arisiiŋo ayan faŋ.
Áriñiŋkaan ko kireyi fe áriihin burok bite b'Anahaan u,
ábuki árimoomi kaanuku burok bamb'arirok bija te o,
búrokiit káfiiten.