Aritey ñájiim ñu
10
Kújakuwe,
ímaŋamaŋi áribaŋino beebaje bu sifaaf úne kéeseina ku *Moyis ti hiñaawu.
H'aamo hu kánuutino *Esipt,
kaafor kígilaniin fu kareyi fe,
abe kareyi fe kakane fu han Heelaañe hua.
2 Náami anokooreenokoor kite kareyi fe *kabosteeboste ti kaafor ku ni ti han hu kaanuku kéehin t'afeeneŋ nu Moyis.
3 Kareyi fe kañoofee fu buñoofo bifeeneŋ b'Atambatun asaaniin bub,
4 kareyi yooŋ káhujee fu búhujo bifeeneŋ b'asaaniin bu.
Múniyo iŋi káhujo móhujo m'Atambatun áhine mu méenuutin t'elaaliñj yeeseiin i ti hiñaawuc,
abe elaaliñj yendu yeemo fu *Kiris.
5 Keehaŋe bare kahooju tu boko katoofut Atambatun;
ho híkinineŋe fu ni kaket t'eramba id.
6 Bondu beebaje bii sifaaf úne búwufoorawufoor úne kaanuku úwarut kanaŋu ti kikaw úne wúfaŋi weejakut wu naane boko yooŋ yéenie.
7 Atum'árijeŋgin ñájiim ñu naane bakaake tu boko káhine i.
*Míkiñjin mu meenaan:
«Ésuk i kariikariiko keeñoofo abe ni káhujo.
Kahaban,
ni karito keeyokoñ toko tu búwisenum buf.»
8 Utum'úfurukato naane bakaake tu boko káhine i,
Atambatun ayak ayool tu boko bakan kaamo súñjune butuman ni síhaaji tu hunak hifeeneŋg.
9 Utum'úŋes kajuku bija diin t'úyino fu kahoofoor bala Atemit atik ayiŋat eenij t'úne naane bakaake tu boko káhine i,
Atambatun ayak áboñin ñuroon ñeejakut ñeetakeiin keeketh.
10 Atum'áriŋuŋunoor naane bakaake tu boko káhine i,
Atambatun ayak áboñin amalaka aa ayool eeyooliini.
11 Bondu beebaje bii sifaaf úne búwufoorawufoor úne kaanuku úwarut káhinu naane boko.
Bikiñjeekiñj ti Míkiñjin mu kaanuku núuyeegalee,
úne keeemo kee buroŋ tu kunak kiraanu ku.
12 Náami an af'ayinoor n'aane asiiŋasiiŋo ayanee,
anaŋ toko hikawo atum'abin aney ti kaahoofoor.
13 Buroon bimbi biñakuun ariiney tu wuhoofoor buwayeit ni bimbi biñak yooŋ bakaaku tu wuhoofoor wu.
Atambatun áwasaariit báhamin b'asoke,
abe at'awas hikee bike beehaŋuun sembe beebajuun.
Af'áriyemi ti kañakiee ti kaahoofoor kep,
Atambatun kawunuuun sembe site kajoku alitee,
aamo fu efehe yite kafaku ku.
14 Kújakuwe,
aruun k'ímaŋie-maŋie ku,
iŋ'ite ho aamo fu aritey ñájiim ñu.
15 Íñj'endu ti káhamin n'aruun kéewasinatee ku;
ariyinoor b'isoke bu aruun kumuumuun ariijuk man bite toko.
16 Uŋ'úene Atambatun eyeehen bija t'ekot ite kásoniyan ku.
Uf'úyemi tu búhujo te yo,
bondu búwufoorut kereŋ kaanuku uŋ'úmaat úreyi fe tu buroon beejake bite bu Kiris,
halan hoone héekinineŋ?
Abe humburu huh'úfiitar,
uf'úyemi ti kateŋu hoj,
bondu búwufoorut kaanuku úhinahin t'afeeneŋ ni Kiris iŋ'ite eni yeene?
17 Makamu humburu hifeeneŋ h'úruboore fu,
bondu búwufoorawufoor kaanuku úne keehooje ku úhina eni efeeneŋ.
18 Ariliik ti bakate ku *Israyel ariijuk:
kiŋki kateŋ efuwa yite sunuk *seesarahee su *t'ataabul u,
bondu iŋi bíkinineŋ ni káhin t'afeeneŋ n'Atambatunk.
19 Isokasok fíya eene ti bájiim t'Atambatun ite u nu múniyo t'aamo fu,
man yooŋ efuwa yeesarahee te bo ékooki éñjeriŋ?
20 Aaa,
b'ímaŋie bu kasoku beemo fu wusarah wi kéeyilenut ku wiwi káhin,
iŋi káhin wo bija ti sirab su,
bare bíjaiit t'Atambatunl.
Abe ímaŋiit árihin t'afeeneŋ ni sirab su.
21 Ariyinaat búhujo t'ekot ite Anahaan u,
arihaban,
n'árihujo yooŋ t'ekot ite sirab su.
Ariyinaat buñoofo t'efind ite Anahaan u,
arihaban,
n'ariñoofo t'efind ite sirab sum.
22 Uf'úhin iyu bare,
Anahaan u n'aŋ'áfiirn.
Butum uŋ'úene úhaŋohaŋ sembe?
Árihin doon areyi fe man Atambatun n'ánikanee
23 Bakaake t'aruun iŋi kaane:
«Íriyinooni káhinu beetoofe bu unio.»
Nu múniyo,
bare bíreyiiit bijake fu t'úne.
Iŋi kasok kaane:
«Íriyinooni káhinu beetoofe bu uni.»
Nu múniyo,
bare bíreyiiit biyino fu kákinineŋ n'úhaŋ kayanu ti káyilen ku.
24 An atum'ayinoor uŋu hoone hu,
bare ayinoor iŋ'ite h'ésuk i.
25 Áriyinooni kateŋu efuwa fe yéejoohennee marse.
Ariyakut búbujooro sihel ti kákandijen diin t'énuutina fu,
man yite *kaasarah man yooŋ.
26 Ábuki *Míkiñjin mu meenaan:
«Atemit akino fu etaam i,
nu doon fe deeemo te yop.»
27 An éeyilenut af'aruwuun buñoofo abe n'arija,
ariñoofo doon fe di kayakuun kasaan.
Atum'arija búbujooro sihel ti kákandijen diin tu doon dondu dúnuutina fu.
28 Bare an af'aanuun:
«Efuwa yendu ti kaasarah bájiim t'énuutina fu»,
atum'ariteŋ te yo iŋ'ite hu an eesokuun u bondu,
man sihel su ni sibeb.
29 Eenut siheluun,
bare ehelo.
Maske ake kaanu:
«Iŋi naŋ n'ehel ite ake eja fu kákinineŋ n'iwas káhinu buroon b'íyinie bu káhinu?
30 Arko eenaan Atambatun eyeehen íñje ti kateŋu dike doon,
iŋi naŋ ni kayakam fu kasoku béekojie?»
31 Náami af'áriyemi tu buñoofo,
man yooŋ tu búhujo,
man yooŋ doon fe d'ariyak káyemi te do,
árihin do man Atambatun n'ánikanee.
32 Manoŋkar moonuun itim mineyan ti kaahoofoor Esuwif i,
ni keenooto ku Esuwif,
ni *kéeyilene ku yooŋ ti *Kiris.
33 Árihin naane íñje ii iŋes katoofu ésuk i ereyi tu buroon bu fe bimb'íhin.
Iŋesut beejake bu bija t'íñje,
bare beejake bu bija t'ésuk i ereyi b'iŋese fu kaanuku man ni kafak.