Árikutoor an éehine u naane bufuruka bu
5
Irijamajam tánotan fe kaanuku abajeebaj t'aruun bufurukato b'árimeyie kaanuku humuum hite kéeyilenut ku kánijaariit iyu:
kaane ake t'aruun aŋ'aŋot n'anaare ite faafoa!
2 Abe aruun bokondu yooŋ ti biyitooro!
Eeman ariwarawar yéeni kátaañian dómbokun,
abe n'arinuutan t'aruun an u aa áhin ii bondu?
3 Íñje ikambuunkamb,
bare ehelam yendu t'aruun.
Iheeka iijoonan an éehine u bondu ni kite íñj'eemo t'aruun.
4 Af'aribin arikuukanooro tu huruwu hite Anahaan ite úne Yesu,
abe sembe soone ni síyemi t'etutuun,
ehelam n'eŋ'éyemi yooŋ n'aruun.
5 Kóŋkeyin,
árisik ániine ondu arisaan Setanib man enio n'ébujo,
búwejeto béeyini kafaku hunak h'Anahaan u ábatikein hu te ho.
6 Biyitooro boonuun bondu bijakut!
Árimeyiit kereŋ naane báhamin bonde bije i:
«*Élefir yeefamut ef'ékundufuloolan éfariŋ yeefamec»?
7 Náami arinuutan t'etutuun kaahoofoor kondu keeemo ku naane élefir yéewuute man n'áriyemi bakan *keekuure but.
N'aŋ'áriyemi naane éfariŋ éyeni yeebajut élefir.
Abe ariheekaheek áriiyemi bakan keekuure,
ábuki *Kiris aketaket bija t'aruun.
O aamo fu ametek *eesarahee u *t'efeet ite Kánuutina ku Esiptd.
8 Náami úhin efeet i,
káanukiiit nu kumburu keebaje élefir yéewuute yite kaahoofoor ku ni bánafut bu,
bare úfeet yo nu kumburu keebajut élefir,
kite kakuuru ku,
ni kite múniyo mue.
9 Isokuunsok t'eleetar y'ibine i íkiñjinuun eenuun atum'arikol ni bakan kiŋki kafurukato.
10 Ímaŋiit bare kágiilool toko bakate ku t'etaam ye kiŋki kafurukato,
ni kiŋki kamero buroon bite bakaaku,
ni kákuwat,
man yooŋ n'iŋi kawaasen.
Kaanuku ariiteyiin kareyi fe,
aamo fu kame ariwarawar kanuutu t'etaam ye!
11 B'ímaŋiuun bu yéeni kasoku beemo fu an af'aane akina Akarjen,
abe bare akina yooŋ efuruka,
ameraa buroon bite bakaaku,
awaasena,
asoka ti bakan,
áwusana,
man yooŋ ákuw,
atum'arikol ne o.
An naane ondu,
áritumbut ariwar buñoofo ne o t'afeeneŋ.
12-13 Íñje fíya iware fu kajoonan keenooto ku tu butoŋ bite Atambatun?
Aaa,
Atambatun aja fu kajoonaniin.
Aruun bare,
ariwarawar kajoonan k'ariemo ku ti bítim bifeeneŋ,
naane *Míkiñjin mu musoke i.
Meenaan:
«Árikutoor t'aruun an éenafutef.»