Pool n'aja Efees
19
H'Apolos áyemie hu Korent,
Pool n'afin akan birij bu,
abe n'areeŋ Efees.
N'aŋaabo bo bakaake *kéeyilene,
2 abe n'ákandijeniin aaniin:
—H'ariyoosee hu bítim bite *Kiris,
Búwejet Beenabe bu búwaneinowanein t'aruun?
Ni kaano:
—Írimusut kajamu kaanuku Búwejet Beenabe bibajabaj.
3 Pool n'aaniin:
—Kame náami *kaboste koonuun,
ko keemo fu kiin?
Ni kaano:
—Kaboste ki Saaŋ kaŋk'áhin ésuk i.
4 N'aaniin:
—Saaŋ aŋ'aboste yéeni kiŋki kawatanooro kinij kooniin keejakut ku,
abe n'aane bakate ku *Israyel káyilen t'an eeroŋe u inde hiñaawio;
o aamo fu Yesua.
5 Hi kajame hu bondu kahaban,
ni káhin keebostee tu huruwu hite Anahaan u Yesu.
6 Pool n'ásit tu boko sumoŋio,
abe Búwejet Beenabe bu nu búwanein tu boko.
N'iŋi káhamin toko ti kíhaminiin kuway,
abe n'iŋi kasok kirim k'Atambatun asaaniin ku.
7 Háyine hondu kareeŋareeŋ sumoŋu ni bákasuba.
8 Pool n'aŋ'aja ti *báalawum bu,
abe kiim kíhaaji n'aŋ'áhamin toko hikawo káayaŋgin piŋ.
N'aŋ'áhamin toko bite *Jáyi jite Atambatun,
abe n'aŋ'aŋes káhinu kiŋki kajamatano kéeyileno.
9 Bare bakaake tu boko káfeŋginut ñúwejet ñooniin;
kateñekateñeko káyilen,
abe yooŋ n'iŋi kákojian Bítim bite Anahaan u tu buhooŋu ésuk i fe.
Náami Pool eenuut tu boko,
abe n'aja ni kéeyilene ku.
N'aŋ'awaare húnakonak fe t'eleekool ite ake ániine huruwu hoone Tiiranus.
10 Bondu ni bibaj ayak areeŋ simit súsuba.
Esuwif i,
ni keenooto ku Esuwif fe keekine ku t'ésuk ite Asi kasooñen ni kajam hirim hite Atemit.
Biñi bite Seefa ni kaŋes kákutoor sirab
11 Atambatun n'awun Pool aŋ'áhin buroon béewarie-wari,
beehaŋe ésuk i kikaw.
12 N'iŋi kayit kires keegore ku t'enio,
man yooŋ ñusoor ñu,
kaja kalaj ti kéesomute ku.
Wúsomut wooniin uŋu wúkoyi,
abe sirab su n'uŋu sunuut yooŋ tu boko.
13 N'abaj bakaake Esuwif iŋi kañaahoor ti kikinu ku kéekutoor sirab su t'ésuk i.
Ni kaŋes yooŋ kásiku huruwu hite Anahaan u Yesu kéekutoor so.
N'iŋi kaane:
—Uni irisok fee n'aruun tu huruwu hite Yesu i Pool aa awaare iye uŋu hoone hu:
arinuut!
14 (Kiŋki káhin ii bondu kaamo hutok ni bákasuba;
faafiin Asuwif,
aseef *t'esaraha i,
iŋi kaano Seefa.)
15 Bare hike hunak eke erab n'eeniin:
—Ímoomi Yesu,
ímoomi yooŋ aañ aamo fu Pool,
bare aruun,
aruun ariemo fu aañiin?
16 Náami ániine e erab i ejoke u álohumiin kareyi fe,
abe n'akaleiin.
N'átumb áhihinooriin ni sembe kasooñen ni kánuutin t'enuuf te o keetey fuufiiin tálaŋ,
abe siniiin fe munuf.
17 Bakate ku Efees kareyi fe,
Esuwif i ni keenooto ku Esuwif ni kajam bo.
Ni kákoleyi naane,
abe ni kahaŋ ti kasokoroor ku huruwu hite Anahaan u Yesu.
18 Keehooje ti keeyoosee ku bítim bite *Kiris n'iŋi kabin keesok tu buhooŋu ésuk i wuhoofoor wi káhine wu.
19 Keehooje yooŋ ti kiŋki kálugus yéeni ni kabin nu wuwiit wooniin,
abe ni kásuf wo tu buhooŋu ésuk i fe.
Ni kafin kaanuku t'ajuk butumbuŋ bu wuware fu yéeni kajaru,
ni kajuk kaanuku areeŋeereeŋ similiyoŋ úkaan.
20 Iyu i hirim hite Atemit hihaŋe fu bijamo,
abe ni hihaŋ yooŋ kabaju sembe.
Bakate ku Efees ni karito tu Pool
21 Bondu buwas,
Pool n'aane eeja Serusalem,
eeŋaas Maseduwan,
ajok Akayi.
N'aane:
—If'ija bo ihaban,
iwarawar yooŋ bija *Rom.
22 N'aboñ Timoteiin n'Erasit,
bákasuba t'ejokoora yeene Maseduwan,
abe akina humuumo n'afin ariiko Asi afiyo dikee.
23 Kóŋkeyin,
n'átumb arko hitik iŋ'ite Bítim bite Anahaan u.
24 N'abaj ake ániine huruwio Demetiriyus aŋ'atiban kikaŋk ni bimeŋk bite ehalis.
Aŋ'arok yooŋ munuuf miŋgiŋgilis meenokoore n'enuuf i tindi kaja kalawu kite atambatun ooniin anaare u ii kaane Artemis.
Náami iŋi kabaj toko sírirem seefame-fam,
akina n'eroka yeene.
25 Areeŋ hike hunak,
n'aruw eroka yeene,
ni bakaaku keeemo ku burokiin bifeeneŋ abe n'aaniin:
—Kújakuwe,
árimoomi kaanuku burok bite b'úne buwune fu úne ebaj.
26 Bare arijukajuk beebaje bu,
man yooŋ arijamajam bo:
áyin ondu Pool aane etambatun i yu kúŋgowulan ku karoke i kanooto etambatun,
abe añaka bakan keehooje-hooj.
Éfeesiit barebare t'áhine fu bo,
bija yooŋ Asi ereyi fe.
27 Ésuk i n'eŋ'ejendan kasoku beejakut tu burok bite b'úne.
Abe iti biraan toko barebare.
Huruwu hite enuuf i tund'úlaw Artemis ómbokun u,
atambatun ite úne anaare u n'uŋu húbujo.
Abe n'aŋ'áwiinianee,
akina i bakate ku Asi ni bakate ku t'etaam i fe ii kalaw!
28 Hi kajame hu bondu,
ni kátumb kayiŋat kahooj bib,
abe n'iŋi kataŋk kaane:
—Artemis ite u Efees ahahahah!
29 Memee náami hikinu hu hireyi fe hútumba hirko hitik.
Hahooja hu nu hujok Gáyiyus n'Aristarik,
bákasuba bakate Maseduwan keeriboore ku nu Pool kátuki ku,
abe ni kamoken keeñakiin bija t'éfimbooruma i tindi káhin eteyatar i.
30 Pool n'ámaŋi yéeni bija kaanuku éehamin ni hahooja hu,
bare *kéeyilene ku kawasuto éehin bo.
31 Bakaake bakan kómbokun bakate Asi keeemo bákawiyo ni káboñin te o kaano atum'aja tindi káhin eteyatar i.
32 Náami bare hahooja hu hútumba huwetekooro nera naane.
Bakaake ti kataŋku keesok bonde,
bakaaku ti kataŋku keesok bike,
abe keehooje tu boko kámeyiit iŋi naŋ ni kakuukanooree fu.
33 Esuwif i ni katiŋg hágila ake ániine iŋi kaano Aleksandur.
Bakaake ti hahooja hu ni kakamo naane bije i.
N'ayit emoŋio kaanuku yéeni éehamin ni hahooja hu eeeniin bokondu ki kajoke kii katinut.
34 Bare hi kajuke hu kaanuku akina Asuwif,
ni kataŋk kareyi fe y'afeeneŋ keesok kirim ku koko areeŋ suwahatu súsuba.
Iŋi kaane:
—Artemis ite u Efees ahahahah!
35 Hireeŋ toko,
ake t'eseef ite hikinu hu n'áhin hahooja hu heekoowan abe n'aane:
—Aruun bakate ku Efees,
abajeebaj fíya an éemeyiit kaanuku Efees ékinie fu enuuf ite Artemis eehahe u,
nu búnokoorum boone béeneyina bu tu bufor bu?
36 An ayinaat bo kajeeŋoor.
Náami ariwarawar kabebu,
atum'árihin doon t'ariyinoorut.
37 Aribina diye ni háyine hondu,
abe bare kákuwatut tu sunuuf su tund'úlaw,
kálafatinut yooŋ atambatun ite úne anaare u.
38 Arko Demetiriyus n'eroka yeene kábajoorinobajoorin n'ake,
abajeebaj kunak kite kajoonan,
abajeebaj yooŋ ejoonana.
N'iŋi kakalameiin toko!
39 Arko aribajabaj yooŋ bike bite kasoku,
n'uŋu búkotinee toko akuur but t'ésuk i hágila eseef i.
40 Ábuki bakate ku Rom n'iŋi kajendan katinan úne tu bonde beebaje bee úmiye,
kaane úne úrahanna,
abe ut'úbaj bike bite kakamu tu bukuukanooro bonde.
41 H'asoke hu bondu ahaban,
n'ayeetan hahooja hu.