8
Sóol aanaan hee naane Eejen ayoolee i.
Sóol n'áhihinoor kéeyilene ku
Hunak hondu hoho,
bakate ku Serusalem *kéeyilene ku ni kajab káhihinooree naane.
Kéeyilene ku fe ni kayisaloolo tu búsuk bite *Súde ni *Samari,
abin aŋeñen *t'epotor i.
2 Bakaake kéejube ni kayit ehunuŋ ite Eejen kaja kahok,
abe ni kayiyo dómbokun.
3 Sóol n'afin aŋes kábuju kéeyilene ku;
aŋ'ayooso tu sunuuf su eejok háyine hu ni haare hu,
abe n'aja akuliina.
Filip n'awaare t'ésuk ite Samari
4 Náami *kéeyilene ku keeyisaloolee ku n'iŋi kaja tánotan fe iŋi kawaare Hirim Heetoofe hu.
5 Filip n'aja ti hike hikinu hite *Samari,
abe n'aŋ'asok bo mite mu *Afakana u.
6 H'ésuk i hihi kajamoo,
abe ni kajuko yooŋ ti káhinu buroon beehaŋiin kikaw,
n'iŋi kakoowan kem keejamatano.
7 Múniyo birab bu uŋu bunuut ti bakan keehooje-hooj ti kakileen,
abe keehooje yooŋ keeyinaat bija,
ni kéetime n'iŋi karitanee kéekoyi.
8 Náami bakate ti hikinu hondu ni káyemi ti katoofu kómbokun.
9 N'abaj ake ániine álugusa éeyemie ti hikinu hondu huruwu hoone Simoŋ.
Afiyaa ti kajahal bakate ku Samari fe,
abe n'aŋ'aaniin akina an ómbokun.
10 Kareyi fe kajamo fu,
huta hu ti biñi bu bija yooŋ ti sifaaf su.
Iŋi kaane:
—Atambatun ii kaane «ate sembe su» aamo fu ániine ondu.
11 Náami kareyi fe kajamo fu,
ábuki afiyee naane aa ajahaliin ni kálugus koone.
12 Bare h'aamo hu Filip abina eesok Hirim Heetoofe hu hite *Jáyi jite Atambatun,
nu huruwu hite Yesu *Kiris,
ni káyilen,
abe ni káhin keebostee,
háyine hu ni haare hu.
13 Simoŋ humuumo n'áyilen,
abe n'abostee.
Aŋ'ariboor ni Filip kep,
abe n'aŋ'ajahale dómbokun hah'ajuko ti káhinu buroon beehaŋe bu ésuk i kikaw.
14 *H'epotor i kéeyemie ku Serusalem kajame hu kaanuku bakate ku Samari kajoka hirim hite Atambatun,
ni kaboñiin Piyeer ni Saaŋ.
15 Kareeŋa Samari,
ni kalaw bija ti kéeyilene ku kaanuku man ni kabaj Búwejet Beenabe bu,
16 ábuki bo tu búwaneinoorut mayet t'afeeneŋ tu boko;
*kabosteeboste barebare tu huruwu hite Anahaan u Yesu.
17 Náami Piyeer ni Saaŋ kéesit sumoŋiiin tu boko,
ni kabaj Búwejet Beenabe bu.
18 Hi Simoŋ ajuke hu kaanuku Atambatun awunawun kéeyilene ku Búwejet Beenabe bu kóyin k'epotor i kásite ku sumoŋiiin tu boko,
n'aŋes kawunu Piyeer ni Saaŋ sírirem
19 abe n'aaniin:
—Ariwunam yooŋ sembe sondu,
man an i iyak kásitu te o sumoŋiam n'abaj Búwejet Beenabe bu.
20 Bare Piyeer n'aano:
—Yala n'á̱towuto ni sírirem súuwe,
makamu a̱yinoorayinoor n'a̱ane doon d'Atambatun awune,
á̱yinooni do kajoohen ni sírirem!
21 A̱bajut tu bondu húrub,
a̱kolut yooŋ te bo,
ábuki t'Atambatun eholi ejoŋoorut.
22 A̱watanooro beejakut bondu beeemo bii t'awe,
abe n'a̱law Atemit man ti bíyinie kabaju,
n'aboŋketi kaayinoor kondu keeemo ku ti hikawi.
23 Ábuki ijuka kaanuku a̱hoojahooj bib ni méetike,
abe kaahoofoor kíkinii fu.
24 Náami Simoŋ eeene Piyeeriin ni Saaŋ:
—Aruun kumuumuun arilaw Atemit bija t'íñje,
man doon itim dibajam ti b'arisoke bii.
25 H'aamo hu epotor i bákasuba ku kasoka bite b'Atambatun kahaban,
abe ni kawaare yooŋ hirim hite Anahaan u,
ni kabatuko Serusalem.
Boko ti bija bu,
n'iŋi kakaro kawaare Hirim Heetoofe hu ti kikinu keehooje kite Samari.
Filip n'ániine ite u Ejoopi
26 Ake amalaka ite Atemit n'aane Filip:
—A̱ja a̱sooñan inde *Esipt,
ti bítim béenuutina bu Serusalem bija Gasa;
bítim bondu eramba.
27 Filip n'ahaŋ aja yooŋ.
Ondu ti bija bu,
n'ajuk ake ániine.
Ániine ondu an ómbokun t'ésuk ite Ejoopi.
Anaare eeemo bo aseef ub ásikasik ebaj yeene anaŋ tu sumoŋio.
Ániine u abinabin Serusalem kalawu Atambatun,
28 abe ti biyeetu t'áyemie fii.
Ariikariiko t'esaret yeene,
abe n'áyemi ti kajaŋga ti kaawiit *k'Esayi *ayiŋana ite Atambatun akiñje ku.
29 Búwejet Beenabe bu ni beene Filip:
—A̱tof a̱reeŋ esaret yendu.
30 Filip n'atey ayak abin áami ajoka yo.
N'ajam ániine u ti kajaŋga ti kaawiit k'Esayi ayiŋana ite Atambatun akiñje ku.
N'ákandijeno aano:
—A̱jokajok me doon d'a̱jaŋga dii?
31 Ániine u n'aano:
—Buŋ b'iyino fu kajoku t'an áwufoorutam?
Náami eeruw Filip aano ájufo t'esaret i eeriiko kaagoroor ne o.
32 Bonde b'áyemie fu ti kajaŋga ku ti *Míkiñjin mu:
«Ámoomi naane ékarniina yeeyitee bija kamootu,
naane ametek eekoowane kem o ti kayiselee:
asokut hirim hifeeneŋ.
33 Afuñataneefuñatan,
abe ekooŋ yeene esokutee.
An at'áyini káhamin iŋ'ite bakañio,
ábuki buroŋ boone bite bu t'etaam bísikeesikc.»
34 Ániine u n'ákandijen Filip aano:
—Waasi,
a̱sokam fee,
aañ a ayiŋana ite Atambatun asoke fee?
Man akina humuumo,
man yooŋ ake?
35 Náami Filip éejokin tu bondu b'ániine u ajaŋgee bu,
eesoko Hirim Heetoofe hu heesoke hu bite bu Yesu.
36-37 Bokondu ti bija bu,
ni kareeŋ tike tiŋ tu móhujo meemo.
Ániine u n'aane:
—A̱juk,
móhujo mondu.
Naŋ nukolene fu kaanuku iibostee?d
38 N'asok keesiiŋan esaret i.
Filip n'ániine u ni kawano tu móhujo mu,
abe Filip n'abostoo.
39 Hi kánuutina hu tu móhujo mu,
Búwejet bite Atemit ni biyit Filip.
Ániine ite u Ejoopi aŋkut áheelin te o,
bare n'ayuun bítimo,
hikawo káatoofin naane.
40 Filip ajaja kajuku,
náami ondu Asot.
Anuut bo,
n'aja Sesare aŋ'akaro asok Hirim Heetoofe hu ti kikinu kaŋk'aŋaas te ko fe.