Kaahoofoor ku ni kaboŋket ku
17
Yesu n'aane eriboora yeene:
—Kabaju ko kireyi fe bike beeyak kákinineŋ ésuk i n'ehoofoor.
Bare afin ayak buŋ kátaañi t'an eeja u kánuutanna bo!
2 Ahaŋ kajaku te o n'akobee elaaliñj yómbokun tu nukun,
abe n'áfiitenee ti han hu,
bala áhin ake ti keebajoorut ku káyilen kómbokun eewas bítim bu.
3 Náami arinaŋ toko kikawuun!
«Atii af'atin t'awe,
a̱joŋoor ne o a̱asoko.
Abe af'awatanooro,
a̱boŋketo.
4 Af'atin t'awe kireeŋ hutok nu kúsuba tu hunak hu,
abe n'aŋ'aboo bibin eeeni:
“A̱baalam”,
a̱warawar kaboŋketo.»
Malheur à ceux qui poussent d'autres personnes à pécher
Káyilen ku
5 *Epotor i ni kaane Anahaan u:
—Á̱wutiyen uni iriihaŋ kabaju káyilen.
6 Anahaan u n'aaniin:
—Af'arko aribajabaj káyilen,
hutoof yooŋ kíteti naane anawaay ite *emutard,
árinooni kaanu nunukanuk nondu:
«A̱nuut diyu ni kíjiŋ kúuwe fe,
a̱aja a̱looñ ti han hu»,
no yooŋ káhinu naane arisoke i.
Buŋ b'ásukateen aware fu káhinu
7 —Ariliik fee kane arko naane ake t'aruun abaje fee ásukateen eejoo buwañ,
man yooŋ jíhaaw sunuk soone.
Af'ábatikein,
awe kaanio fíya:
«A̱moken,
a̱ja a̱añoofo»?
8 Eeman awe kaanio:
«A̱ñunam,
abe n'a̱nuutan wañ wondu a̱asol wike;
wusooŋ,
n'a̱huŋ iiñoofo abe n'a̱wunam íihujo.
Ihaban,
n'aŋ'a̱tik a̱ñoofo»?
9 A̱yakut kaanu ásukateen úuwe eyeehen,
ábuki áhinahin burok b'a̱soko bu,
bare me?
10 Iyu yooŋ i beemo fu t'aruun:
af'árihin buroon b'arisokee bu fe arihaban,
ariene:
«Uni fu búsukateen barebare;
burok bite b'uni b'írihine fu kep.»
Yesu n'aritan bakan kaamo sumoŋu kéesomute
11 Yesu n'abin áyemi ti bija Serusalem,
n'aŋaas t'eraju yite *Samari ni *Gálile.
12 Am aja fii buyooso hike hikinu,
bakan kaamo sumoŋu keebaje *yafot ni kabin nu boone.
Ni kásiiŋein akamba,
13 abe n'iŋi kataŋk kaane:
—Yesu Anahaan u,
waasi,
a̱yubiyen uni!
14 Yesu n'ajukiin abe n'aaniin:
—Arija *t'esaraha i keejukuunb.
Bokondu ti bija bu,
ni kahaŋ kákoyi.
15 Hi kajuke hu kaanuku kákoyia,
ake tu boko n'ábatikein,
aŋ'akaro asokoroor Atambatun ti kataŋku kep.
16 N'ájiŋgitan hágila Yesu ayak abin áami buhooŋio biyaa t'etaam,
abe n'aano eyeehen.
Ániine ondu ite Samari.
17 Yesu n'aane:
—Eeman arireyi fe árikoyie fu?
Bakaaku hutok ni bakabaakiir ku bokondu diin?
18 Yéeh,
iŋi naŋ n'aamo fu an onde eeemo u amoosoora abine fu unoono eeene Atambatun eyeehen,
abe bakaaku keeemo ku bakate *Israyel káhinut fu bo?
19 Ahaban,
n'aane ániine u:
—A̱rito a̱aja;
káyilen kúuwe kíkinineŋa n'á̱koyi.
Buŋ bi Jáyi jite Atambatun jibin fu
20 *Efarisiyeŋ i ni kaane Yesu asokiin kaakaŋ n'Atambatun aja fu kasiiŋan Jáyi joone.
N'aaniin:
—Bibin bite te jo bibajut bíkeetanuma.
21 An at'aane:
«Jondu diye!»
man yooŋ:
«Jondu baaba!»
Ábuki fu *Jáyi jite Atambatun jíreeŋinuun.
22 Abe n'aane eriboora i:
—Bibin birko,
aruun kátumbu árimaŋi káheelin iŋki *t'Añi ute Húŋgowulan hu,
kane abin ti Jáyi joone,
ámandumo yooŋ hunak hifeeneŋ,
bare at'arijuko.
23 Boko kaanuuun:
«Ondu baaba!»
man yooŋ:
«Ondu diye!»
Bare atum'arija toko,
atum'ariseiin ti hiñaawu.
24 Ábuki naane etiir i ee esib yeejaaŋan bufor bu huta hu ti bíjabina du bija yooŋ ti biraane du,
iyu yooŋ e ésuk i eyak fu kajuku Añi ute Húŋgowulan hu,
hunak h'ábatikein hu te ho.
25 Bare awarawar kajabu ajuk sílaam sómbokun,
abe bakate ku hahiye káfiiteno yooŋ.
26 Beebaje bu kóyin *Nowe bija fu yooŋ kabaju bala Añi ute Húŋgowulan hu ábatikein.
27 Ésuk i iŋi kañoofo kep abe ni káhujo,
háyine hu ti bisayi,
haare hu ti biseño,
bija yooŋ hunak hu Nowe ayoosee hu t'esahar i.
Náami etiir yómbokun i yéenubin ayak abin áami erama etaam i,
abe n'eyooliin kareyi fec.
28 Kóyin *Lot,
ésuk i iŋi kañoofo abe ni káhujo,
iŋi kajoohenoor buroon,
iŋi kawañ,
abe ni kasiiŋan sunuuf.
29 Bare hunak hu Lot anuute hu *Sodom,
sineemak nu súnuutin t'etiir,
seeyooliin kareyi fe,
nu bujuju béetifed.
30 Iyu yooŋ i bija fu káyemi hunak h'Añi ute Húŋgowulan hu aja hu bibin ti Jáyi joone.
31 «Hunak hondu,
an af'áyemi ti kaanaaj koone,
atum'aane eeyooso t'enuuf i bite buroon boone beeemo bu toko.
An af'áyemi yooŋ ti hitaaŋaat,
atum'ábatikein t'enuuf te o.
32 Áribaŋino beebaje bu anaare Lote!
33 An af'ámaŋi kafakan síhiinio,
o bútowuto.
An n'afin aket,
o karoŋu.
34 Íñje isok fee n'aruun:
káajiim kondu,
bákasuba káyemi ti kahurusee t'elal efeeneŋ,
ake bijee ne o,
aau n'awasee toko.
35-36 Haare bákasuba káyemi ti bítigis t'afeeneŋ,
ake bijee ne o,
aau n'awasee toko.f
37 Eriboora i ni kákandijeno kaano:
—Anahaan u,
diin tu bondu bija fu kabaju?
N'aaniin:
—Tu doon fe dikete,
toko ti bílaajiin bu t'ufu bukuukanooro.