Oruuji rwa amanji ga obhuhoru
22
Kimwi maraika akanyorokya oruuji rwa amanji ganú garahaana abhantu obhuhoru bhwa koko. Oruuji ruyo rwaringa rurangʼesangʼesa kya ekirore, na rwaringa ruragera okurwa kukitumbi kya ekikama ekya Waryubha na Omwana wa Eringʼondi. 2 Oruuji ruyo rwaringa ruragera gatigati ya eribharabhara erinene rya omugi guyo. Haaringa-ho na omuti gunú gurahaana abhantu obhuhoru bhwa koko gunú gwaringa mbaara gyonsego gya oruuji. Omuti guyo gwamanga emisumo mara ekumi na ebhiri kumwaka, okuringʼaana na emyeri. Amasya ga omuti guyo ni-dyogo rya okuhwenʼya ebhyaro.3 Omugi guyo, gutaribha-mo na ekintu kyokyonse kinú kiihiimirwe na Waryubha. Ekitumbi kya ekikama kirya ekya Waryubha na Omwana wa Eringʼondi kiribha mumugi muyo, na abhagaya bha Waryubha, bharimusyengera. 4 Bharimurora obhusu bhwaye, na eriina ryaye riringʼoorwa kubhisyusu bhyabho. 5 Omugi guyo, gutaribha na obhutiku kweki, kora abhantu bhataryenda ekorobhoi kora obhurabhu bhwa eryubha, kwa okubha Omukuru Waryubha aribha obhurabhu bhwabho. Abhantu bhayo bharitunga koko na koko.
Okuuja kwa Yeesu
6 Kimwi maraika uyo akankeerya ega, “Amangʼana ganu n-ga obhuheene na aga heene. Omukuru Waryubha unú arabhahaana abharooti Omutima waaye, wonse yaatuma maraika waaye okoorokya abhagaya bhaaye amangʼana ganú gareenderwa geebhuke bhwangu hanu.”
7 Yeesu aragamba ega, “Maaha! Ndaaja bhwangu. Waryubha aribhanonka bhanú bharagwata amangʼana ga obhurooti bhwa ekitabho kinu.”
8 Oni Yoana nooni naarora na okwigwa amangʼana gayo omwene. Na hanú naamara okugarora na okugeegwa, nkagwa bhwibhumbike mumaguru gaaye, naho mmusyengere maraika unú yanyorokerye amangʼana gayo. 9 Nawe, akankeerya ega, “Tiga! Oni nonse m-mukori wa emirimu omurikyaho. N-kya abhahiiri bhaaho abharooti, na abhandi bhonsego bhanú bharagwata amangʼana ga ekitabho kinu. Mbe, omusyengere Waryubha omwenego!”
10 Kimwi maraika uyo akankeerya ega, “Otagakora kya ekinyerera amangʼana ga obhurooti bhwa ekitabho kinu, kwa okubha eribhaga rya okukunaanibhwa kwa amangʼana gayo riringi haangʼi. 11 Mbe, omuntu unú arakora amabhiibhi, agendererye okukora amabhiibhi, na unú arakora obhunyanku, agendererye okukora obhunyanku. Omuntu unú arakora obhuheene, agendererye okukora obhuheene, na omurabhu wa omutima, agendererye okubha omurabhu wa omutima.”
12 Yeesu aragamba ega, “Maaha! Ndaaja bhwangu. Ndaaja mmurihe kira omuntu okuringʼaana na amakorwa gaaye. 13 Oni nooni Arifa na Omega, owa mbere na owa obhuteero, Obhusimuka na Obhuteero.”
14 Bharinonkwa abhantu bhanú bharafura eginkanju gyabho mumanyinga ga Omwana wa Eringʼondi,a naho bhanyoore omweya gwa okusoha mumugi omuhya guyo, okuhitira ebhiseku bhyago na okurya emisumo gya omuti gunú gurahaana abhantu obhuhoru bhwa koko. 15 Nawe, abhaturutumbi, abhasimbe, abheeti, bhanú bharasyengera ebhisusano na abhandi bhonsego bhanú bharahanja okugamba obhubheehi, bharibha kibhara ya omugi guyo kya egimbwa.
16 “Oni Yeesu, nooni omwibhurwa omukuru kurwibhuro rwa omukama Daudi,b na nooni ndangʼarabha kya enjota nyamananga. Oni nooni naatuma maraika waani yaaje abhakeerye bheenyu abheehigira bhaani amangʼana gonsego gayo kurusumo rwa amakanisa.”
17 Omutima wa Waryubha na omwenga wa Omwana wa Eringʼondi bharamubhirikira Omukuru Yeesu ega, “Nuuje!” Na abhantu bhonsego bhanú bhariigwa amangʼana ga ekitabho kiyo bhagambe ega, “Nuuje!” Wowonse unú yaana enyonta, na unú areenda amanji, yaaje anywe bhusa amanji ga obhuhoru bhwa koko.
Amangʼana ga obhuteero
18 Mbe, omuntu wowonse unú areegwa amangʼana ga obhurooti ganú garingi mukitabho kinu, ndamukemera ega, omuntu wowonse akoongerya-mo amangʼana, Waryubha wonse arimoongerya egingʼanga ginú gyagambwa mukitabho kinu. 19 Omuntu wowonse akaaruusya-ho eringʼana ryoryonse okurwa mumangʼana ga obhurooti bhwa ekitabho kinu, Waryubha wonse arimuruusirya-ho omweya gwaye gwa okurya emisumo gya omuti gunú gurahaana abhantu obhuhoru bhwa koko, na omweya gwaye gwa okwikara mumugi omurabhu, ganú garagambwa mukitabho kinu.
20 Na unú araruusya obhwimiririri eguru ya amangʼana ganu, aragamba ega, “Maheene, ndaaja bhwangu.”
Amina. Njo Omukuru Yeesu!
21 Eriruguto rya Omukuru Yeesu ribhe hamwi na bheenyu bhonsego. Amina.