Orwire oruhya na ekyaro ekihya
21
Kimwi, nkarora orwire oruhya na ekyaro ekihya, kwa okubha orwire rwa mbere na ekyaro kya mbere bhyaringa bhiruusiibhwe-ho, na enyanja yonse etaaringa-ho kweki. 2 Kimwi nkarora omugi omurabhu gurya, Yerusaremu enhya, gureetuuma okurwa murwire ku Waryubha. Omugi guyo gwaringa guseemiibhwe kya omwenga unú agooderwe okugya kumusaaja waaye. 3 Nkeegwa eriisi erinene okurwa kukitumbi kya ekikama, riragamba ega, “Maaha! Emenyo ya Waryubha n-hamwi na abhantu, arimenya hamwi na abhantu. Bhonse bharibha abhantu bhaaye, weeki aribha Waryubha waabho. 4 Weeki aribheehya ameesori gonsego mumeeso gaabho. Kora oruku rutaribha-ho kweki, kora okufumba kora ekiriro kora obhururu. Bhitaribha-ho kweki, kwa okubha amangʼana ga akare gayo gamariri okuhita.”5 Na unú yaaringa yeekeeri kukitumbi kya ekikama kirya, akagamba ega, “Maaha! Ndagakora gonsego okubha amahya!” Akankeerya ega, “Ngʼoora ega, amangʼana gayo, n-ga obhuheene na aga heene.” 6 Akankeerya kweki ega, “Gakuneeni! Oni nooni Arifa na Omega, Obhusimuka na Obhuteero. Kira omuntu unú yaana enyonta, ndimuhaana amanji ga bhusa, okurwa mukisekaani kya amanji ganú garahaana abhantu obhuhoru bhwa koko. 7 Omuntu unú arihiga, ndimuhaana gayo gonsego. Oni ndibha Waryubha waaye, na weeki aribha omwana waani. 8 Nawe, abhantu abhoobha, bhanú bhatakumwikirirya Waryubha, bhanú bharamujimya Waryubha, abheeti, abhasimbe, abhaturutumbi, bhanú bharasyengera ebhisusano, na abhabheehi, bhayo bhonsego bharyeswa munyanja ya omururo omuhaari. Na enyanja ya omururo omuhaari iyo, ngʼyo oruku rwa kabhiri.”
Yerusaremu enhya
9 Kimwi, maraika oumwi gati ya bhamaraika muhungati bharya, bhaaringa na amabhakuri muhungati ga egingʼanga muhungati gya obhuteero, akaaja akankeerya ega, “Njo enu, nkoorokye omwenga, omukari wa Omwana wa Eringʼondi.” 10 Nho, Omutima Omurabhu akanyituumira, maraika akanhira eguru ya enkuku enene entambi bhukongʼu. Akanyorokya omugi omurabhu gwa Yerusaremu gureetuuma okurwa murwire ku Waryubha. 11 Omugi guyo, gwaringa guuna obhukuru bhwa Waryubha, gwaringa gurangʼesangʼesa kya erigina rya obhwera obhunene, erya erangi enjomu enkangaaru, eringʼaru kya ekirore. 12 Gwaringa na erikindaasi erinene na eritambi. Erikindaasi riyo, ryaringa na ebhiseku ekumi na bhibhiri. Kira ekiseku kyaangararirwanga na maraika, kweki kira ekiseku kyaringa kingʼoorerwe-ko eriina rya erikabhira rimwi, gati ya amakabhira ekumi na gabhiri ga Isiraeri. 13 Kira orubhaara rwaringa na ebhiseku ebhisatu, bhuturira-ryubha, bhusikirira-ryubha, goosi na taragweta. 14 Erikindaasi rya omugi guyo, ryaringa rihagaajirwe eguru ya amagina ekumi na gabhiri ga obhurusa. Na kira erigina ryaringa ringʼoorerwe-ko eriina rya oumwi wa abhatumwa ekumi na bhabhiri bha Omwana wa Eringʼondi.
15 Mbe, maraika unú yaaringa arahaira na oni, yaaringa na engʼimbo ya ejahaabhu ya okurengera. Yaaringa nayo, naho arengere omugi guyo, ebhiseku bhyago na erikindaasi ryago. 16 Mbe, akarenga omugi kwa engʼimbo ya ejahaabhu irya, obhutambi na obhugari bhyaringa bhiringʼeeni. Akanyoora egikirometa ebhiku bhibhiri na magana gane (2,400).a 17 Akarenga obhugari bhwa erikindaasi riyo, bhonse bhukabha endengo egana rimwi mirongo ena na ena (144),b kwa endengo ya abhantu inú maraika yaatumira.
18 Erikindaasi ryaringa rihagaajirwe kwa amagina ga obhwera obhunene aga erangi enjomu enkangaaru. Omugi gonsego gwaringa guhagaajirwe kwa egijahaabhu eginjomu ginú gyaringa girangʼesangʼesa kya ekirore. 19 Obhurusa bhwa erikindaasi rya omugi guyo, bhwaringa bhugooderwe kwa amagina ga obhwera obhunene ga amanga amaaru. Erigina rya okwamba ryaringa yasipi, erya kabhiri ryaringa yakuti obhururu, erya kasatu ryaringa karikedoni, erya kane ryaringa jumaridi, 20 erya kataanu ryaringa saridoniki, erya kasansabha ryaringa akiki, erya muhungati ryaringa kirisorito, erya munaane ryaringa jabharajadi, erya kenda ryaringa yakuti erya mayaayi, erya ekumi ryaringa kirisopiraso, erya ekumi na rimwi ryaringa hiakinito na erya ekumi na ebhiri ryaringa ametisito. 21 Ebhiseku ekumi na bhibhiri bhyonsego bhyaringa bhikorerwe kwa egiruru. Kira ekiseku kyaringa kikorerwe kwa eruru eimwi ego. Eribharabhara erinene rya omugi guyo, ryaringa rihagaajirwe kwa egijahaabhu eginjomu, ginú gyaringa girangʼesangʼesa kya ekirore.
22 Oni ntaarora erisyengerero erikuru rya Waryubha mumugi muyo, kwa okubha Omukuru Waryubha wa obhuturo bhonsego, hamwi na Omwana wa Eringʼondi mbo erisyengerero erikuru rya omugi guyo. 23 Omugi guyo, gutakwenda obhurabhu bhwa eryubha kasi omweri, kwa okubha obhukuru bhwa Waryubha bhuragumirikira, na Omwana wa Eringʼondi ngʼo ekorobhoi yaago. 24 Abhantu bha ebhyaro bhyonsego bharimenya mubhurabhu bhwa omugi guyo, na abhakama bha ekyaro bharisoha-mo okuhira ebhintu bhyabho bhya obhwera. 25 Ebhiseku bhya omugi guyo, bhitarisiikwa koko, kwa okubha obhutiku bhutaribha-mo. 26 Abhantu bha ebhyaro bhyonsego, bharireeta-mo obhuniibhi bhwabho na ebhintu bhyabho bhya obhwera. 27 Na kitarisoha-mo ekintu kyokyonse ekikonu, kora omuntu wowonse unú arakora amangʼana ga okujimya kasi ga obhubheehi. Nawe, abhantu bhanú bharisoha-mo, m-banú amariina gaabho gangʼoorerwe mukitabho kya obhuhoru bhwa koko, ekya Omwana wa Eringʼondi.