Waryubha aragungibhwa
19
Hanú gayo gaahwa, nkeegwa eriisi erinene muna erya omuganda omunene murwire eyo, riragamba ega,“Agungibhwe Waryubha!
Obhutuurya, obhukuru na obhuturo m-bya Waryubha weetu,
2 kwa okubha obhubhuturi bhwaye bhwa ekiina m-bwa heene na bhwa obhuheene.
Amubhuturiri ekiina omusimbe omukuru
unú yaasarya ekyaro kwa obhusimbe bhwaye.
Waryubha amurihirye
kurusumo rwa amanyinga ga abhagaya bhaaye.”
3 Eriisi riyo, rikagamba rwa kabhiri ega,
“Agungibhwe Waryubha!
Engesi okurwa mumugi gurya
eragya eguru koko na koko.”
4 Abhakaruka mirongo ebhiri na bhane (24) bharya, hamwi na ebhibhumbwa ebhina bhirya bhya obhuhoru, bhakamugwira mumaguru, bhakamusyengera Waryubha unú yeekeeri kukitumbi kya ekikama, bharagamba ega, “Amina! Agungibhwe Waryubha!”
5 Kimwi, nkeegwa eriisi erindi okurwa kukitumbi kya ekikama riragamba ega,
“Mumugungye Waryubha weetu, bheenyu abhagaya bhaaye bhonsego.
Mumugungye bheenyu bhanú muramwigwa,
abhakuru na abhake!”
6 Kimwi, nkeegwa eriisi muna eriisi rya omuganda omunene. Eriisi riyo, ryaringa kya erya amanji amaaru ganú garagera, na kya eriisi rya orukubha orunene. Ryagamba ega,
“Agungibhwe Omukuru Waryubha weetu wa obhuturo bhonsego kwa okubha weeki ngʼo aratunga.
7 Na bheetu, tujomerwe,
tumukiririrye na okumugungya,
kwa okubha obhwenga bhwa Omwana wa Eringʼondi bhuhikiri,
na omwenga amariri okwiseemya.
8 Omwenga yaahaanwa ekitambaara kya obhuguri obhunene kya ekitani,
ekirabhu pee kya okungʼesangʼesa.”
Emyenda emijomu giyo ensonga yaagyo niiga, amakorwa ga heene ga abhantu bha Waryubha.
9 Maraika urya akankeerya ega, “Ngʼoora ega, nyakara bhanú bharaarikirwe kunyangi ya obhwenga bhwa Omwana wa Eringʼondi.” Kweki akankeerya ega, “Amangʼana ganú ngambiri n-ga obhuheene bhwa Waryubha.”
10 Nho, nkagwa bhwibhumbike mumaguru ga maraika uyo, naho mmusyengere. Nawe, akankeerya ega, “Tiga! Oni nonse m-mukori wa emirimu omurikyaho, hamwi na abhahiiri bhaaho bhanú bharamwimiririra Yeesu. Omusyengere Waryubha omwenego, kwa okubha obhwimiririri eguru ya Yeesu, mbo obhwambiro bhwa obhurooti.”
Unú aragendesya efaraasi endabhu
11 Kimwi nkarora orwire rusiikukiri. Nkarora efaraasi endabhu na unú yeekeeri eguru yaayo. Uyo yaabhirikirwanga “Omuheene” na “Owa heene.” Wonse arabhutura ekiina na okurwana eriihe kwa obhuheene. 12 Ameeso gaaye, gaaringa kya egindimi gya omururo, na yaaringa yeebhoheri amataaji amaaru ga ekikama kumutwe gwaye. Eriina rinú yaaringa angʼoorerwe atariho omuntu unú yaarimanya, nawe, weeki omwene. 13 Yaaringa yeebhoheri enkanju inú etobhekerwe mumanyinga. Eriina ryaye, yaabhirikirwanga ega, “Eringʼana rya Waryubha.” 14 Abhasirikare bha murwire bhaaringa bharamuseeta kwa enyuma. Bhaaringa bheebhoheri ebhitambaara ebhirabhu pee bhya ekitani bhya okungʼesangʼesa, bhonse bhaaringa bheekeeri eguru kugifaraasi egindabhu. 15 Omuhyu omoogi gurarwa mumunwa gwaye, naho ahige ebhyaro. Aribhitunga kwa engʼimbo ya ekyuma. Wonse arataja egijabhibhu mukintu ekinene kya okumitira-mo, kinú kiroorokya enkoro ya Waryubha wa obhuturo bhonsego. 16 Kunkanju yaaye ahasi ha kukiimo, haaringa hangʼoorerwe eriina rinu,
Omukama wa abhakama bhonsego na Omukuru wa abhakuru bhonsego.
17 Mbe, nkarora maraika oumwi yeemiriiri kuryubha. Maraika uyo, akagamba kwa eriisi erinene, arabhirikira ebhinyonyi bhyonsego bhinú bhyaringa bhireebhururuka eguru, akagamba ega, “Muuje, mwikumanʼye munyangi enene ya Waryubha. 18 Muuje murye enyama ya abhakama, ya abhakuru bha abhasirikare, na ya abhantu abha eginguru. Murye enyama ya egifaraasi na abhariini bha egifaraasi, enyama ya abhantu bhonsego, abhagaya na bhanú bhareeyagaara, abhakuru na abhake.”
19 Kimwi, nkarora ogutyenyi ogunene gurya na abhakama bha ekyaro na abhasirikare bhaabho bheekumeenʼye hamwi, naho bharwane na unú yeekeeri kufaraasi endabhu hamwi na abhasirikare bhaaye. 20 Nawe, ogutyenyi ogunene guyo, hamwi na omurooti wa obhubheehi unú yaakora ebhimanyiiriryo kurusumo rwago, bhakagwatwa. Kwa okukora ebhimanyiiriryo bhyaye bhiyo, omurooti uyo yaaringa abhangʼeeneri abhantu bhanú bhaatemwa orubhaaso rwa ogutyenyi ogunene guyo na okusyengera ekisusano kyago. Bhabhiri bhayo, bhakeeswa bhakyari abhahoru munyanja ya omururo omuhaari. 21 Omuntu uyo yaaringa yeekeeri eguru ya efaraasi endabhu, akatumira omuhyu gunú gwarwa mumunwa gwaye, okwita abhasirikare bhaabho bhonsego. Na ebhinyonyi bhyonsego bhikarya eginyama gyabho bhikeeguta bhukongʼu.