Ogutyenyi ogunene gwa mbere
13
Kimwi, nkarora ogutyenyi ogunene gurarwa munyanja. Ogutyenyi guyo, gwaringa na emitwe muhungati na amatira ekumi. Kira eritira ryaringa na eritaaji, na kira omutwe gwaringa gungʼoorerwe-ko eriina rya okumujabhura Waryubha. 2 Ogutyenyi ogunene gunú naarora, gwaringa guhunkeeni kya engwe, na amaguru gaago gaaringa kya aga entyenyi inú erabhirikirwa edubhu na omunwa gwago gwaringa kya ogwa endwi. Erijoka rirya, rikaguhaana eginguru gyaryo, ekitumbi kyaryo kya ekikama na obhutungi obhwaru. 3 Omutwe ogumwi gwa ogutyenyi guyo, gwaringa na ekironda ekibhiibhi ekya okwita. Nawe, ekironda kya okwita kiyo, kyaringa kihweneri! Eringʼana riyo, rikaruguurya abhantu bhonsego mukyaro, bhakaguseeta. 4 Abhantu bhonsego, bhakasyengera erijoka rirya, kwa okubha ryaringa riheeri ogutyenyi guyo, obhuturo bhwaryo bhwa obhutungi. Bhakasyengera na ogutyenyi guyo gonse, enu bharagamba ega, “Niwi arahunkana kya ogutyenyi guyo? Niwi aratura okukora eriihe nago?”5 Mbe, ogutyenyi guyo, gukeekiririibhwa okwigungya na okugamba amangʼana ga okumujabhura Waryubha. Kweki gukahaanwa obhuturo bhwa okutunga kwa eribhaga rya emyeri mirongo ena na ebhiri (42). 6 Ogutyenyi guyo, gukaamba okumujabhura Waryubha, na okurituka eriina ryaye, na emenyo yaaye na bhonsego bhanú bhareekara murwire. 7 Gukeekiririibhwa okurwana na abhantu bha Waryubha gukabhahiga. Kweki gukahaanwa obhuturo bhwa okutunga abhantu bha mumakabhira gonsego, mugihamati gyonsego, mubhigambo bhyonsego, na mubhyaro bhyonsego. 8 Abhantu bhonsego bhanú bhamenyeri mukyaro, bharisyengera ogutyenyi guyo. M-bantu bhonsego bhanú amariina gaabho gataangʼoorwa mukitabho kya obhuhoru bhwa koko eribhaga rinú ekyaro kyabhumbwa. Ekitabho kiyo n-kya Omwana wa Eringʼondi unú yaagoogwa.
9 Unú yaana amatwi, yeegwe.
10 Omuntu unú yaaseemibhwa okutumbarirwa mwiihe,
aritumbarirwa.
Omuntu unú yaaseemibhwa okwitwa kwa omuhyu,
ariitwa kwa omuhyu.
Bhoono, abhantu bha Waryubha bhareenderwa bheegumirirye na bhagendererye okubha na eimani.
Ogutyenyi ogunene gwa kabhiri
11 Kimwi, nkarora ogutyenyi ogunene ogundi gurariina okurwa mwirobha. Ogutyenyi guyo, gwaringa na amatira gabhiri kya aga ekimaanwa kya eringʼondi, gukahaira kya erijoka. 12 Gukatumira obhuturo bhonsego bhwa ogutyenyi ogunene gwa mbere gurya, na gwabhutumira kurusumo rwa ogutyenyi gwa mbere gurya. Ogutyenyi ogunene gwa kabhiri guyo, gukabhandirirya abhantu bhonsego bha mukyaro, bhasyengere ogutyenyi ogunene gwa mbere gurya, gwaringa na ekironda kya okwita kinú kyaringa kihweneri. 13 Ogutyenyi gwa kabhiri guyo, gukakora ebhimanyiiriryo ebhikuru bhya okuruguurya, kora gukakora omururo gukeetuuma okurwa kurwire okuuja mukyaro, enu abhantu bhararora. 14 Gonse gukabhahabhya abhantu bhanú bhamenyeri mukyaro kwa ebhimanyiiriryo bhinú gwahaanwa okukora, kurusumo rwa ogutyenyi gwa mbere gurya. Gukabhakeerya abhantu bhabhaaje ekisusano kya okusuuka ogutyenyi gwa mbere gurya, gwaringa na ekironda kya omuhyu, nawe, gukahwena gukagendererya okubha oguhoru.
15 Ogutyenyi gwa kabhiri guyo, gukahaanwa obhuturo bhwa okuhuuta omwika gwa obhuhoru, mukisusano kya ogutyenyi gwa mbere gurya, naho kiture okugamba na okukora abhantu bhonsego bhanú bhaanga okukisyengera, bheetwe. 16 Ogutyenyi gwa kabhiri guyo, gukabhandirirya abhantu bhonsego, abhakuru na abhake, abhaniibhi na abhatobhu, abheeyagaari na abhagaya, bhatemwe orubhaaso kumabhoko ga obhuryo kasi kubhisyusu. 17 Kweki, gukaanga ega, omuntu unú ataana orubhaaso, atakwenderwa okugura kasi okugurya ekintu kyokyonse. Orubhaaso ruyo ni-riina rya ogutyenyi gwa mbere gurya, kasi erisaabhu rya eginyuguta gyonsego gya eriina ryago.a
18 Eringʼana rinu rireenda egintungwa. Weeki unú yaana egintungwa, abhare erisaabhu rya ogutyenyi ogunene gwa mbere gurya, kwa okubha erisaabhu riyo rirahairira omuntu nyabhurebhe. Erisaabhu ryaye ryonsego, m-magana gasansabha na mirongo esansabha na esansabha (666).