Omukari na erijoka
12
Kimwi, ekimanyiiriryo ekinene kya okuruguurya kikamaahikana kurwire eyo. Yaaringa-ho omukari unú akundikiriibhwe na eryubha, na omweri gwaringa insi wa amaguru gaaye. Na kumutwe gwaye, yaaringa yeebhoheri eritaaji rya ekikama, erya eginjota ekumi na ebhiri. 2 Omukari uyo, yaaringa na enda, na yaaringa haangʼi okwibhura, hanú yaarumwa obhusungu akakuura.3 Kweki, ekimanyiiriryo ekindi kya okuruguurya kikamaahikana kurwire eyo. Maaha! Erijoka erinene erikangaaru ka rikeebhuka. Erijoka riyo ryaringa na emitwe muhungati na amatira ekumi, na kira omutwe gwaringa na eritaaji. 4 Erijoka riyo, rikeenaarya omukira gwaryo, gukangʼuura eimwi ya esatu eya eginjota gya kurwire, na okugyesa mukyaro. Kimwi erijoka riyo, rikeemirira embere ya omukari uyo yaaringa haangʼi okwibhura, naho hanú areebhure rimire omwana. 5 Mbe, omukari uyo, akeebhura omwana wa ekisaaja. Omwana uyo, aritunga ebhyaro bhyonsego kwa engʼimbo ya ekyuma. Omwana uyo akasakurwa, akahirwa ku Waryubha, kukitumbi kyaye kya ekikama. 6 Omukari uyo weeki, akangʼosera kukibhara, ahasi hanú Waryubha yaaringa amuseemeerye, naho amutuge eyo, kwa eginsiku ekiku kimwi, magana gabhiri na mirongo esansabha (1,260).
7 Nho, eriihe rikeebhuka murwire. Maraikaa omukuru, unú arabhirikirwa Mikaeri, hamwi na bhamaraika bhaaye, bhakarwana na erijoka riyo na bhamaraika bhaaryo. 8 Nawe, erijoka riyo, na bhamaraika bhaaryo, bhakahigwa na bhakakenyibhwa okurwa murwire. 9 Erijoka riyo, rikeeswa mukyaro. Riyo ndyo enjoka ya akare inú erabhirikirwa ega, Omusarya kasi Erisambwa.b Ryeki ndyo rirangʼeena abhantu bhonsego mukyaro, naho bhamwange Waryubha na bhakore obhusarya. Maheene ryeeswa mukyaro hamwi na bhamaraika bhaaryo.
10 Mbe, nkeegwa eriisi erinene okurwa murwire riragamba ega,
“Bhoono, Waryubha weetu atuurirye abhantu bhaaye.
Atumiiri obhuturo bhwaye okwamba obhukama bhwaye!
Wonse yoorokerye obhutungi bhwa Kiristu omusorwa waaye,
kwa okubha omujongeri wa abheekirirya abharikyetu yeeserwe hansi,
weeki yaaringa embere ya Waryubha, arabhajongera obhutiku na omubhasu.
11 Abheekirirya abharikyetu bhamuhigiri kwa amanyinga ga Omwana wa Eringʼondi,
na kwa obhwimiririri bhunú bhaaruusya.
Bhataarora obhwera bhwa obhuhoru bhwabho,
bhaaringa bheeseemerye okukwa kurusumo rwa okwikirirya Omwana wa Eringʼondi.
12 Kwa ego, mujomerwe,
bheenyu bhonsego bhanú mumenyeri eguru murwire eyo!
Nawe, murikirora-ko bheenyu bhanú mumenyeri mukyaro kyonsego,
kwa okubha Erisambwa riituumiri hansi gati yeenyu.
Rijimiri bhukongʼu, kwa okubha rimanyiri ega, eginsiku gyaryo ni-nkego.”
13 Mbe, erijoka riyo hanú ryarora ega, ryeserwe mukyaro, rikamuseeta omukari unú yaaringa yeebhwiri omwana wa ekisaaja. 14 Nawe, Waryubha akamuhaana omukari uyo amabhabha gabhiri ga ekikoona ekinene, naho yeebhururuke okugya kukibhara eyo, ahasi enú Waryubha yaaringa amuseemeerye, abhe ahare na erijoka riyo. Kukibhara eyo, atugwe kwa eginsiku ekiku kimwi magana gabhiri na mirongo esansabha (1,260).
15 Kimwi, erijoka riyo, rikahongora amanji amaaru okurwa mumunwa gwaryo, gakagera kya oruuji enyuma ya omukari uyo, naho agegwe na amanji gayo. 16 Nawe, erirobha rikamubheera omukari uyo. Erirobha rikasiikuka kya omunwa, rikamira amanji gonsego okurwa mumunwa gwa erijoka. 17 Erijoka riyo, rikamujimira bhukongʼu omukari uyo, rikagya okurwana na abhaana bhaaye abhandi bhanú bhaatama. Abhaana bhayo, mbo bhareegwa emigiro gya Waryubha na okugwata obhwimiririri bhunú Yeesu yaaruusya. Mbe, erijoka riyo ryonse, rikeemirira embarika wa enyanja.