Yeesu Kiristu ngʼo aratusabhira
2
Abhaana bhaani abhahanje kuimani, ndabhangʼoorera amangʼana gayo, naho mutakora obhusarya. Nawe, nyoore omuntu wowonse araakore obhusarya, tuunawe unú aratusabhira ku Taata Waryubha. Uyo n-Yeesu Kiristu omuheene. 2 Weeki ngʼo ekimwensoa kya okutugwatanʼya na Waryubha, kwa okuturuusya obhusarya bhwetu. Kweki bhutaringi obhusarya bhwetu abheenego, nawe, m-busarya bhwa abhantu bhonsego mukyaro.3 Nyoore turaagwate amaragiriryo ga Waryubha, nho turabha tumanyiri ega, tumumanyiri. 4 Omuntu wowonse unú aragamba ega, amumanyiri Waryubha, enu atakugwata amaragiriryo gaaye, m-mubheehi, arabha atamanyiri obhuheene. 5 Nawe, omuntu unú aragwata eringʼana ryaye, aramuhanja Waryubha maheene. Ego niigo turamanya ega, tugwateeni nawe. 6 Na omuntu unú aragamba ega, agwateeni na Waryubha, areenderwa yeekare kya ego Yeesu yeekara.
Eriragiriryo rya Yeesu eguru ya okuhanjana
7 Abhahanje bhaani, eriragiriryo rinú ndabhangʼoorera ritaringi erihya, nawe ni-riragiriryo rya akare, rinú mwaringa naryo okurwa hanú mwaamba okumwikirirya Kiristu.b Eriragiriryo rya akare riyo, ni-ringʼana rinú mweegwa eguru ya okuhanjana. 8 Nawe, kwa orubhaara orundi eriragiriryo rinú ndabhangʼoorera ni-rihya. Obhuheene bhwa eriragiriryo riyo, bhwamaahikana kya ego Yeesu Kiristu yeekaranga, na kya ego bheenyu mureekara, kwa okubha obhwikari bhwaye na obhwikari bhwenyu bhuroorokya ega, ekisunte kirahita na endingaasi ya maheene emariri okungʼarabha.
9 Omuntu wowonse unú aragamba ega, aringi mundingaasi, enu aramujimira omurikyaye, uyo akyari mukisunte. 10 Omuntu wowonse unú arahanja omurikyaye, aringi mundingaasi. Ataana ekintu kyokyonse mumutima gwaye kinú kiraamukore akore obhusarya. 11 Nawe, unú arajimira omurikyaye, aringi mukisunte. Kweki aragenda mukisunte, kora atamanyiri enú aragya, kwa okubha ekisunte kimuribhiri ameeso.
12 Ndabhangʼoorera bheenyu abhaana bhaani abhahanje kuimani,
kwa okubha mwabhiirwe obhusarya bhwenyu, okuhitira ku Yeesu Kiristu.
13 Ndabhangʼoorera bheenyu bhataata,
kwa okubha mumumanyiri Yeesu Kiristu,
weeki yaaringa-ho okurwa obhusimuka.
Ndabhangʼoorera bheenyu abhamura,
kwa okubha mumuhigiri omusarya urya Erisambwa.c
Ndabhangʼoorera bheenyu abhaana,
kwa okubha mumumanyiri Taata Waryubha.
14 Ndabhangʼoorera bheenyu bhataata,
kwa okubha mumumanyiri Yeesu Kiristu,
weeki yaaringa-ho okurwa obhusimuka.
Ndabhangʼoorera bheenyu abhamura,
kwa okubha eimani yeenyu iina eginguru,
muragwata eringʼana rya Waryubha,
kweki mumuhigiri omusarya urya Erisambwa.
15 Bhoono mbe, mutahanja okukora amabhiibhi kya abhantu bhanú bhatakumwigwa Waryubha. Kweki, mutahanja obhubhiibhi bhobhonse bhwa mukyaro. Omuntu wowonse unú araahanje aga ekyaro, atakumuhanja Taata Waryubha. 16 Ndagamba ego, kwa okubha aga ekyaro kya ganu, orunamba rwa omubhiri, orunamba rwa okwenda kira kinú orarora, na obhwiheemi bhunú bhurarekana na ebhintu, gatakurekana na Taata Waryubha, nawe, gararekana na ekyaro. 17 Ekyaro kinu hamwi na orunamba rwa abhantu, bhirihita. Nawe, omuntu unú arakora ganú garamujomera Waryubha, arabha na obhuhoru bhwa koko.
Okwiyangararira na abhangi bha Kiristu
18 Abhaana bhaani abhahanje kuimani, eribhaga rya obhuteero ryahikiri! Mwamara okwigwa ega, omwangi wa Kiristu araaja, na kora bhoono abhangi abhaaru bha Kiristu, bhamariri okuuja. Kiyo nkyo ekisigo kinú kirakora turamanya ega, rinu ndyo eribhaga rya obhuteero. 19 Abhantu bhayo, bhaarwa mumakanisa geetu, nawe, maheene bhataaringa abheetu. Maheene uuja okunyoora bhaaringa abheetu, bhakaatamiri kubheetu. Nawe, bhaarwa-mo, naho emanyikane ega, maheene bhataaringa abheetu.
20 Nawe bheenyu, Yeesu omurabhu wa Waryubha, abhahakiri amaguta kwa okubhahaana Omutima Omurabhu,d bhoono bheenyu bhonsego mumanyiri obhuheene. 21 Ndabhangʼoorera enyarubha inu, etaringi kwa okubha mutamanyiri obhuheene. Ndabhangʼoorera kwa okubha mubhumanyiri. Kweki mumanyiri ega, bhutariho obhubheehi bhobhonse bhunú bhurarekana na obhuheene. 22 Omubheehi ngʼ-uuha? Omubheehi m-muntu wowonse unú araanga ega, Yeesu ataringi Kiristu Omutuurya.e Wowonse unú aramwanga Taata Waryubha na Omwana waaye Yeesu, uyo ngʼo omwangi wa Kiristu. 23 Kira omuntu unú araanga Omwana wa Waryubha, ataana obhumwi na Taata Waryubha. Nawe, unú aramwikirirya Omwana embere ya abhantu, yaana obhumwi na Taata Waryubha wonse.
24 Bhoono bheenyu, mugendererye okugwata amangʼana ganú mweehigiribhwa eguru ya Kiristu, okurwa hanú mwaamba okumwikirirya. Nyoore muraagendererye okugwata ameehigiryo gayo, nho muragendererya okubha na obhumwi na Omwana, na Taata Waryubha. 25 Nyoore tureekare ego, turabha na obhuhoru bhwa koko, bhunú Kiristu yaaturaga.
26 Mbangʼooreeri amangʼana gayo, okubhakemera eguru ya abhantu bhanú bhareenda okubhahabhya. 27 Nawe bheenyu, Kiristu abhaheeri Omutima Omurabhuf unú areekara munsi weenyu. Uyo ngʼo arabheehigirya gonsego, na ameehigiryo gayo, n-ga obhuheene, gataringi ga obhubheehi. Kwa ego, muteenda oundi abheehigirye.g Kya ego Omutima yaabheehigirya, mugendererye okubha na obhumwi na Kiristu.
28 Bhoono, abhaana bhaani abhahanje kuimani, mugendererye okubha na obhumwi na Kiristu, naho hanú arihunjuka, tubhe na obhuteremu, tutariija okwibhisa kwa eginsoni.
29 Mumanyiri ega, Kiristu m-muheene, mbe, mumanye kweki ega, wowonse unú arakora aga heene, ngʼo omwana wa Waryubha.