Enyarubha ya mbere eya
Yoana
Yeesu ngʼo Eringʼana rya obhuhoru
1
Turabharaarikira amangʼana eguru ya Eringʼana rya obhuhoru, rinú ryaringa-ho okurwa obhusimuka.a Bheetu turiigwiri na okurirora na ameeso geetu, turimaahiri na okurigwata na amabhoko geetu. 2 Obhuhoru bhuyo, bhwamaahikana, na bheetu tukabhurora. Bhoono turabhwimiririra na okubharaarikira bheenyu, eguru ya obhuhoru bhwa koko bhuyo. Bhweki bhwaringa ku Taata Waryubha, bhukamaahikana kubheetu.b 3 Kinú twamaaha na okwigwa, nkyo turabharaarikira, naho bheenyu bhonse, muture okugwatana na bheetu kubhumwi hamwi na Taata Waryubha na Omwana waayec Yeesu Kiristu. 4 Turabhangʼoorera amangʼana ganu, naho obhujomerwa bhwetu bhukunaane.Okwikara mundingaasi
5 Mbe, amangʼana ganú tweegwa okurwa ku Yeesu Kiristu ngo turabharaarikira, n-ganu, Waryubha ni-ndingaasi, ataana ekisunte kyokyonse munsi waaye. 6 Nyoore turagamba ega, tuuna obhumwi na Waryubha, enu turagendererya okwikara mukisunte, turabheeha, kweki tutakukora aga obhuheene. 7 Nawe, nyoore tureekara mundingaasi, kya ego Waryubha aringi mundingaasi, nho turabha na obhumwi, bheetu abheene kwa abheene. Kweki amanyinga ga Omwana waaye Yeesu, garaturaama obhusarya bhwetu bhonsego.
8 Nyoore turaagambe ega, bheetu tutaana obhusarya, tureengʼeena bheetu abheene, turabha tutamanyiri obhuheene. 9 Nawe, nyoore tureekirirye ega, tukoreri obhusarya, Waryubha aratwabhira obhusarya bhwetu na okutoogya obhubhiibhi bhonsego, kwa okubha weeki m-muheene, arakora kya ego oranyoora aragiri. 10 Nyoore turaagambe ega, tutarakora obhusarya, turamukora Waryubha okubha omubheehi, na turabha twangiri eringʼana ryaye.