Okwikara kya abhaana bha Waryubha
3
Mbe, mumaahe kya ego Taata Waryubha atuhanjiri bhukongʼu, kora turabhirikirwa abhaana bha Waryubha! Na heene niigo ego turingi! Nawe, abhantu bhanú bhatakumwigwa Waryubha, bhatamanyiri ega, bheetu m-baana bha Waryubha, kwa okubha bhatamumanyiri weeki. 2 Abhahanje bhaani, turamanya ega, bhoonwego bheetu m-baana bha Waryubha, nawe, etaramanyikana kya ego turibha. Nawe, tumanyiri ega, eribhaga rinú Kiristu arihunjuka, turituubhana nawe, kwa okubha turimurora kya ego aringi. 3 Kira omuntu unú areesiga ego, yeeraame, naho abhe omurabhu wa omutima, kya ego Kiristu omwene aringi.4 Kira omuntu unú araagendereryenga okukora obhusarya, aranyamura amaragiriryo ga Waryubha, kwa okubha okukora obhusarya, nko okunyamura amaragiriryo. 5 Mumanyiri ega, Kiristu yaaja mukyaro, naho aruusye-ho obhusarya bhwetu. Kweki weeki ataana obhusarya bhobhonse. 6 Bhoono mbe, kira omuntu unú araagendereryenga okubha na obhumwi nawe, atakugendererya okukora obhusarya. Nawe, kira unú araagendereryenga okukora obhusarya, ataakamuruuji, kora atamanyiri ega, Kiristu niwi.
7 Bhoono, abhaana bhaani abhahanje kuimani, muteekirirya ega, omuntu wowonse abhangʼeene. Nawe, wowonse unú arakora amangʼana ganú gareenderwa, m-muheene embere ya Waryubha, kya ego Kiristu aringi omuheene. 8 Nawe, wowonse unú araagendereryenga okukora obhusarya, m-muntu wa Erisambwa, kwa okubha Erisambwa okurwa kubhwambiro rikyagendereryanga okukora obhusarya. Nawe, Omwana wa Waryubha yaaja mukyaro, naho anyamure emirimu gya Erisambwa.
9 Kira omuntu unú abheeri omwana wa Waryubha, atakugendererya okukora obhusarya, kwa okubha yaana enteemo ya Waryubha. Atakutura okugendererya okukora obhusarya, kwa okubha m-mwana wa Waryubha. 10 Nawe, kira omuntu unú atakukora amangʼana ga heene, kasi unú atakuhanja omurikyaye, uyo ataringi omwana wa Waryubha. Ego niigo turaahukanʼya abhaana bha Waryubha na abhaana bha Erisambwa.
Okuhanjana
11 Rinu ndyo eringʼana rinú mweegwa okurwa hanú mwaamba okumwikirirya Kiristu, ega, tureenderwa okuhanjana bheetu abheene kwa abheene. 12 Tutabha kya Kaini, omwana wa omusarya urya Erisambwa, unú yeeta omuke waaye Abheri.a Kwaki yaamwita? Yaamwita kwa okubha ebhikorwa bhyaye bhyaringa ebhibhiibhi, nawe, bhya omuke waaye bhyaringa bhya heene.
13 Bhoono, abhahiiri bhaani kuimani, mutaruguura nyoore abhantu bhanú bhatakumwigwa Waryubha, bharaabhajimire. 14 Bheetu tumanyiri ega, twamara okurwa muruku, tukasoha mubhuhoru bhwa koko. Tumanyiri ego, kwa okubha turahanja abharikyetu. Omuntu wowonse unú ataana obhuhanje, akyatamiri muruku.b 15 Wowonse unú aramujimira omurikyaye, m-mwiti. Mumanyiri ega, omwiti atakubha na obhuhoru bhwa koko.
16 Kiristu, hanú yaaruusya obhuhoru bhwaye kurusumo rwetu, yaatoorokya obhuhanje bhwa obhuheene. Na bheetu bhonse egoego, tureenderwa kora okuruusya obhuhoru bhwetu kurusumo rwa abharikyetu. 17 Nyoore omuntu yaana ebhintu, na ararora omurikyaye ataana ekintu, nawe, atige okubha na ekyabhira kya okumutuurya, heene yaana obhuhanje bhwa Waryubha?
18 Abhaana bhaani abhahanje kuimani, tutahanjana kwa amangʼana ageenego, nawe, tuhanjane kwa amakorwa amajomu na obhuheene. 19 Tukaahanjana ego, nho turamanya ega, turagwata obhuheene. Kweki emitima gyetu giraterema embere ya Waryubha. 20 Kora nyoore emitima gyetu giratubhuturira ekiina ega, turingi abhasarya, turabha na omurembe, kwa okubha tumanyiri ega, Waryubha ngʼo omukuru okukira emitima gyetu. Kweki weeki amanyiri amangʼana gonsego.
21 Abhahanje bhaani, nyoore emitima gyetu gitakutubhuturira ekiina, turatura okumusabha Waryubha kwa obhuteremu. 22 Na turanyoora okurwa kumwene ryoryonse rinú turamusabha, kwa okubha tureegwa amaragiriryo gaaye na okukora ganú garamujomera.
23 Rinu ndyo eriragiriryo ryaye ega, twikiriirye eriina rya Omwana waaye, Yeesu Kiristu, na okuhanjana bheetu abheene kwa abheene, kya ego yaaturagirirya. 24 Omuntu wowonse unú araabhenga areegwa amaragiriryo ga Waryubha, yaana obhumwi nawe. Na Waryubha wonse yaana obhumwi nawe. Tumanyiri ega, tuuna obhumwi na Waryubha, kwa okubha atuheeri Omutima Omurabhu.