Eginguru gya eimani ya abhantu bha akare
11
Mbe, eimani nu-kubha na obhuheene bhwa amangʼana ganú tureesigira. Kweki nu-kwikirirya amangʼana ganú gatakumaahikana bhoonwego. 2 Okurekana na eimani yaabho, bhajaaji weetu bhaamungʼarira Waryubha bhukongʼu. 3 Kwa eimani tumanyiri ega, Waryubha yaabhumba orwire na ekyaro kwa amangʼana gaaye. Kweki tumanyiri ega, yaabhumba ebhintu bhyonsego bhinú bhiramaahikana okurwa kubhinú bhitakumaahikana.4 Eimani yaakora Abheri akamuruusirya Waryubha ekimwenso ekijomu okukira Kaini.a Kwa ego, Waryubha akamubhara Abheri okubha omuntu wa heene, na akeekirirya ekimwenso kyaye. Onyoora Abheri yaamara okukwa, nawe, eimani yaaye eragendererya okubha ekirengyo ekijomu kya okwihigira bheetu nawanyareero.
5 Eimani yaakora Enoki akeenurwa okurwa mukyaro hanu bira okukwa. Ataamaahikana kweki, kwa okubha Waryubha yaamugega okugya murwire. Kora Amangʼoore Amarabhu garagamba ega, hanú Waryubha yaaringa akyari okumugega, Enoki yaaringa arakora ganú garamungʼarira Waryubha.b 6 Atariho omuntu unú aratura okumungʼarira Waryubha nyoore ataana eimani. Kira omuntu unú areenda okumusuntarira Waryubha, areenderwa okwikirirya ega, Waryubha ariho na ega, arabhahaana omutuho bhanú bhareenda okumumanya.
7 Eimani yaakora Nuhu akamwigwa Waryubha, hanú yaamukemera kuganú gaaringa gakyari okwibhuka. Nho, akakora eryato erinene, naho Waryubha abhatuurye weeki hamwi na abhantu bha munyumba yaaye.c Okurekana na amakorwa gayo, Nuhu akabhabhuturira ekiina abhantu bha mukyaro bhanú bhaaringa bhatakumwikirirya Waryubha. Okurekana na eimani yaaye, Waryubha akamubhara Nuhu okubha omuheene embere yaaye.
8 Eimani yaakora Abhurahamu akamwigwa Waryubha, hanú yaamukeerya ega, yeemuke mukyaro kyaye, agye mukyaro kinú amuragiri okumuhaana. Abhurahamu akeemuka mukyaro kyaye, onyoora ataaringa amanyiri enú yaaringa aragya.d 9 Eimani yaakora Abhurahamu akeekara kya omugeni mukyaro kinú yaaragwa na Waryubha. Yaaringa areekara eyo mumabhuru, kya ego Esaaka na Yakobho bhonse bheekara. Kora bhonse bhaanyoora endago iyoiyo Abhurahamu yaanyoora. 10 Abhurahamu yaamwigwa Waryubha, kwa okubha yaaringa areesigira okwikara mumugi gunú guringi na obhurusa bhunú bhunagiri. Omugi guyo gwaseemibhwa na okuhagaajwa na Waryubha omwene.
11 Eimani yaakora Saara akanyoora obhuturo bhwa okugega enda, na okwibhura omwana,e onyoora yaaringa agoteri, kwa okubha yaaringa areekirirya ega, Waryubha arakunaanʼya egindago gyaye.f 12 Kwa ego, okurekana na omuntu oumwi Abhurahamu unú yaaringa omugotu bhukongʼu,g bheebhurirwa abhantu abhaaru bhanú otakutura okubhara, kya eginjota gya murwire na omusenyi gwa kumurambo gwa enyanja.h
13 Abhantu bhayo bhonsego, bhaakwa bhaana eimani. Bhaakwa bhataanyoora ganú Waryubha yaaringa abharagiri okubhahaana. Nawe, bhaaringa bharagarora kwa ahare, bhakajomerwa. Bhaaringa bhareekirirya ega, m-bageni na abhahiti mukyaro kinu. 14 Abhantu bhanú bhareekirirya amangʼana kya gayo, bharoorokya kubhurabhu ega, bhareenda ekyaro kyabho abheene. 15 Nyoore bhakaabheeri bhareeganirirya eguru ya ekyaro kyabho kinú bhaarwa, mbe, bhakaanyooreri omweya gwa okuhunjuka eyo. 16 Nawe, bhayo bhaaringa bhareegomba ekyaro ekijomu bhukongʼu kya murwire. Kwa ego, Waryubha atakurora eginsoni okubhirikirwa Waryubha waabho, kwa okubha abhaseemeerye omugi murwire erya.
17 Eimani yaakora Abhurahamu hanú Waryubha yaamusakya, akeekirirya okuruusya omwana waaye Esaaka, abhe ekimwenso ku Waryubha. Abhurahamu ngʼo yaanyoora egindago okurwa ku Waryubha, nawe, akeekirirya okumuruusya omwana waaye omumwemwe,i 18 onyoora Waryubha yaaringa amukeererye Abhurahamu ega, “Abhaana bha ehamati yaaho bharirwa murwibhuro rwa Esaaka.”j 19 Abhurahamu yeekirirya ega, Waryubha yaana obhuturo kora bhwa okumuhyukya Esaaka okurwa mubhaku. Mbe, akahunjukiribhwa Esaaka kya omuntu unú ahyukiibhwe.
20 Eimani yaakora Esaaka akabhanonka abhaana bhaaye, Yakobho na Esau kuganú gariibhuka embere.k
21 Eimani yaakora Yakobho, hanú yaaringa haangʼi okukwa, akabhanonka kira oumwi wa abhaana bha Yusufu,l akamusyengera Waryubha, enu yeesagwiri kumukwaji gwaye.
22 Eimani yaakora Yusufu hanú yaaringa haangʼi okukwa, akagamba amangʼana eguru ya Abhaisiraeri kya ego bharirwa mukyaro kya Misiri. Kweki akabharagirirya ega, bhariija okugega amaguha gaaye na okugya okubhiika mukyaro kya Kanaani.m
23 Eimani yaakora abheebhuri bha Musa bhakamubhisa emyeri esatu okurwa hanú yaaringa yeebhwirwe. Bhaakora ego, kwa okubha bhaarora ega, Musa yeebhurwa omujomu, bhatoobhoha kora okusarya eriragiriryo rya Farao, omukama wa Misiri.n 24 Eimani yaakora Musa, hanú yaaringa akurungiri, akaanga okubhirikirwa omwana wa omuhara wa Farao. 25 Weeki yaasora okunyanka hamwi na abhantu bha Waryubha, okukira okujomerwa mubhusarya kwa eribhaga ekego. 26 Musa yaarora ega, okunyanka kurusumo rwa Kiristu Omutuuryao m-buniibhi bhwaru, okukira okunyoora obhuniibhi bhonsego bhwa mukyaro kya Misiri. Yaarora ego, kwa okubha yaaringa araganyirira omutuho gunú Waryubha arimuhaana kuginsiku gya embere eyo.
27 Eimani yaakora Musa akeemuka mukyaro kya Misiri, atoobhoha okujima kwa omukama wa mukyaro muyo. Weeki yeekongʼererya, kwa okubha yaaringa muna ega, ararora Waryubha unú atakumaahikana. 28 Eimani yaakora Musa akabharagirirya Abhaisiraeri bhakore enyangi ya Epasaka na akabhakeerya bhahake amanyinga kumihimiri gya ebhiseku, naho maraika omusikya hanú yaakahite, atakuunʼya abhatangi bha ekimura bhaabho.p 29 Eimani yaakora Abhaisiraeri bhakaambuka enyanja ya Shamu kwa amaguru, kya ego abhantu bharagenda kukyaro ekyomu. Nawe, hanú Abhamisiri bhonse bhaasakya okukora ego, amanji gakabhakundikirya, bhakakwa bhonsego.q
30 Eimani yaakora Abhaisiraeri bhakeenaara endigi enene ya mumugi gwa Yeriko, kwa eginsiku muhungati, na endigi iyo ekagwa.r
31 Eimani yaakora Rahabhu unú yaaringa omusimbe, akahona okwitwa hamwi na abhantu bhanú bhaaringa bhatakumwigwa Waryubha. Yaahona, kwa okubha yaabhagenihya Abhaisiraeri abhabhuuririrya kwa omurembe.s
32 Mbe bhoono, ngambe-ki okukira gayo? Ntaana eribhaga rya okubhaganira eguru ya eimani ya Gidioni, Bharaki, Samusoni, Yefuta, Daudi, Samweri na abharooti. 33 Okurekana na eimani yaabho, bhaarwana eriihe bhakahiga abhakama bha ebhyaro ebhindi. Bhaatunga kwa obhuheene na okunyoora ganú Waryubha yaabharaga okubhahaana. Na bhaaringa na eginguru gya okuribha eminwa gya egindwi. 34 Okurekana na eimani yaabho, bhaasimya omururo omuhaari. Bhaahona okwitwa na abhasigu kwa egimpanga. Hanú bhaarosanga, Waryubha yaabhahaananga eginguru gya okuhiga eriihe, na okukenyia abhasirikare bhanú bhaarwanga mubhyaro ebhindi.
35 Eimani yaakora abhakari nyabhurebhe bhakanyoora kweki abhahiiri bhaabho bhanú bhaaringa bhakwiri, bharingi abhahoru kweki. Abhandi bhaanyahaarwa bhukongʼu na okwitwa. Nawe bhateekirirya ega, bhahaatirwe, kwa okubha bhaarora m-bujomu okunyanka kora okuhikira okukwa, nawe, bhatamutiga Waryubha. Bhaakora ego, naho bhanyoore obhuhyuki bhunú bhuuna obhwera bhukongʼu. 36 Abhandi bhaaringa bharajiiririrwa na okutemwa na emijariti. Abhandi bhaaringa bharabhohwa na eminyororo na okutuurwa mwigereja. 37 Kweki abhandi bheetwa kwa okutemwa na amagina, abhandi kwa okukatwa kwa emisumeeno,t na abhandi kwa egimpanga. Abhandi bheenaaranaaranga bheebhoheri amaseero ga amangʼondi na aga egimburi. Bhaaringa m-bantu abhatobhu, bhaanyanka na okukorerwa amabhiibhi amaaru. 38 Abhantu bhayo, bhaaringa bharataamataama kukibhara na muginkuku, bhaaringa bhareekara mumasana na mumatuko. Abhantu bhayo, bhaaringa abhajomu, kora abhantu bha mukyaro munu bhanú bhataamwikirirya Waryubha, bhateenderwanga okwikara nabho.
39 Onyoora abhantu bhonsego bhayo bhaamungʼarira Waryubha kwa ekisigo kya eimani yaabho, nawe, atariho kora oumwi unú yaanyoora ganú Waryubha yaaraga. 40 Bhataanyoora ganú Waryubha yaabharaga, kwa okubha yaaringa atuseemeerye amangʼana amajomu bhukongʼu, naho bheetu hamwi nabho tunyoore ganú yaaraga okutuhaana.