Abhaebhurania 12

Okugwata ekirengyo kya Yeesu

Mbe, kwa okubha twinaarirwe na omuganda omunene gwa abheemiririri bhayo, turuusye-ho kira eringʼana rinú riraturibhira na okutiga obhusarya bhunú bhuratugwisya. Kweki tukore ekituunyo okukora ganú Waryubha atuuriri embere yeetu, kya omuntu unú arakenya kwa obhwikongʼererya. 2 Tubhenga turamwisigira Yeesu, kwa okubha ngʼo aratoorokererya tumwikirirye Waryubha, na ngʼo aratukora tugendererye okumwikirirya okuhikira kubhuteero. Weeki yeegumirirya oruku kumusarabha, kora ataarora eginsoni kwa ekisigo kya obhujomerwa bhunú bhwaringa embere yaaye. Bhoono, yeekeeri orubhaara rwa obhuryo rwa ekitumbi kya ekikama kya Waryubha.

3 Mwiganirirye ganú gaamunyoora Yeesu na kya ego yaaringa areegumirirya kuganú abhakori bha obhusarya bhaaringa bharamuhakaanʼya. Mbe, kwa ekisigo kiyo, mutakwa omutima kora mutariija okurosa okumwikirirya Waryubha. 4 Onyoora murakora ekituunyo okuhiga obhusarya, nawe, mukyari okurwana eriihe okuhikira okwitira amanyinga geenyu. 5 Bhoono, murabhiirwe amangʼana ga okwimya omutima ganú Waryubha yaabhakeerya bheenyu bhanú muringi abhaana bhaaye? Waryubha yaagamba ega,

“Mwana waani, otajeera ganú Omukuru Waryubha waaho arakukemera.

Kora otakwa omutima hanú arakukaanʼya eringʼana,

6 kwa okubha Omukuru Waryubha aramujibhya omuntu wowonse unú ahanjiri.

Kweki aramukemera omuntu wowonse unú areekiriribhwa na Omukuru.”

7 Mbe, mwikongʼererye hanú Waryubha arabhajibhya. Arakora ego, kwa okubha bheenyu m-baana bhaaye. Atariho omwana wowonse unú atakujibhibhwa na esewaabho. 8 Waryubha arabhajibhya abhaana bhaaye bhonsego. Mbe, nyoore Waryubha atakubhajibhya, mumanye ega, bheenyu mutaringi abhaana bhaaye. 9 Hamwi na gayo, bheetu bhonsego tuuna bhataata bhanú bhaatwibhura, bheeki bhaaringa bharatujibhya, na bheetu twaringa turabhasuuka. Bhoono, tutakwenderwa okumusuuka bhukongʼu Taata Waryubha unú aringi murwire, naho tubhe na obhuhoru? 10 Bhataata bhanú bhaatwibhura, bhaatujibhya kwa eribhaga ekego, okurekana na kya ego bheeki abheene bhaarora ega, m-bujomu. Nawe, Waryubha aratujibhya kurusumo rwetu, naho tubhe hamwi nawe mubhurabhu bhwaye. 11 Atariho omuntu unú arajomerwa hanú arajibhibhwa, nawe, arasurumbara. Nawe, bhanú bheehigiri okubha na enteemo enjomu kwa enjira ya okujibhibhwa, bharabha na omurembe na bharakora ganú gareenderwa embere ya Waryubha.

12 Mbe bhoono, niiga, mukore amabhoko geenyu amanyooheeru gabhe na eginguru na amaru geenyu ganú gararigita ganage. 13 Mugende kuginjira ginú giimiri, naho kinú kiremeheeri kitaaja okunyahaarika, nawe, kibhe kirahwena.

Obhukemeri kubheekirirya

14 Mbe, mukore ekituunyo okwikara kwa omurembe na abhantu bhonsego. Kweki mukore ekituunyo okubha abharabhu bha emitima mubhuhoru bhwenyu, kwa okubha atariho omuntu unú aratura okumurora Omukuru, nyoore ataringi omurabhu wa omutima. 15 Mwiyangararire, naho omuntu wowonse atabhurwa eriruguto rya Waryubha. Kweki eritinya rya obhururu ritasebhuka, ribhanyankye, rikonʼye abhantu abhaaru. 16 Mwiyangararire, naho atariija okubha-ho omusimbe gati yeenyu, kasi unú atakusyengera Waryubha kya Esau. Weeki yaagurya engabho ya obhwibhurwa bhwa mbere kwa ekisigo kya ebhyakurya bhya eribhaga rimwi ego. 17 Mumanyiri ega, hanú Esau yeenda okugabha enonkwe, esewaabho akaanga. Esau ataanyoora kweki omweya gwa okwihunjura, onyoora yaagutuna omweya guyo kwa okukuura bhukongʼu.

18 Bheenyu mutaahika munkuku kya eya Sinai, inú abhantu bharatura okuibhabhaata. Mutaahika munkuku kya iyo, yaaringa erooka omururo, inú yaaringa na ekisunte ekinene na omuyaga omuhaari bhukongʼu. 19 Kweki mutaahika ahasi hanú Abhaisiraeri bheegwa eginkombi gikuuriri na eriisi erinene rya Waryubha. Hanú bheegwa eriisi rirya, bhakoobhoha bhukongʼu, bhakamusabha Musa ega, Waryubha atabha arahaira nabho kweki. 20 Bhaagamba ego, kwa okubha bhataanagya okwikongʼererya omugiro gunú Waryubha yaaragirirya ega, “Kora ekaabha ni-tyenyi eraakuunʼye enkuku inu, ereenderwa okutemwa na amagina okuhikira okukwa.” 21 Gonsego ganú geebhuka munkuku ya Sinai gaabhoobhohya bhukongʼu abhantu, kora Musa akagamba ega, “Ndarigita bhukongʼu kwa ekisigo kya enkubhi.”

22 Nawe, bheenyu muhikiri munkuku ya Sayuni, kumugi gwa Yerusaremu ya murwire. Omugi guyo m-mugi gwa Waryubha omuhoru. Muyo bheekumanʼya kwa obhujomerwa bhamaraika ebhiku na ebhiku. 23 Bheenyu muhikiri mumuganda gwa abheebhurwa bha mbere bha Waryubha, bhanú amariina gaabho gangʼoorerwe murwire. Muhikiri embere ya Waryubha unú aringi Omubhuturi wa ekiina wa abhantu bhonsego na embere ya abhantu abhaheene bhanú Waryubha yaabhakunaanʼya. 24 Bheenyu muhikiri ku Yeesu, unú areegwanʼya abhantu na Waryubha kwiragano erihya. Muhikiri kwa amanyinga gaaye ganú geetika kumusarabha kurusumo rwa obhusarya bhwetu, gataringi ga okuriha ekisiiyomba kya aga Abheri garya.

25 Mbe, mubhenga muramwitegeerera unú arabhakemera. Waryubha yaabhahaana obhujibhu obhunene bhajaaji weetu bhanú bhaaringa bharaanga okumwitegeerera Musa, hanú yaaringa arabhakemera. Bhoono, bheetu turihona egaki, nyoore tutakumwitegeerera Waryubha, hanú aratukemera? 26 Eribhaga rirya Waryubha yaahaira okurwa munkuku ya Sinai, ekyaro kyonsego kikasingisa. Nawe, bhoono aragiri ega, “Ntarisingisya ekyaro ekyenego kweki, nawe, kora na orwire.” 27 Eringʼana riyo, “kweki” riroorokya kubhurabhu ega, ebhintu bhyonsego bhinú Waryubha yaabhibhumba mukyaro kinu, bhirisingisa na okuruusibhwa-ho, naho bhitame ebhintu bhinú bhitakutura okusingisa. 28 Kwa ego, tubhenga turamukumya Waryubha, kwa okubha tunyooreri obhukama bhunú bhutakusingisa. Tubhenga turamusyengera Waryubha, kwa enjira inú eramungʼarira kwa obhusuuku na kwa obhwisuuhya, 29 kwa okubha Waryubha weetu aringi kya omururo omuhaari gunú gurasikya chwe.