10
Mbe, amaragiriryo ga Musa n-kirengyo kya amangʼana amajomu ganú gariija, nawe, gataringi amangʼana gayo ageene. Kiyo nkyo kirakora ebhimwenso bhinú abhantu bhararuusya kira omwaka, okurekana na amaragiriryo gayo, bhitakutura okuraama abhantu bhanú bharamusyengera Waryubha kora orusiku orumwi. 2 Nyoore ebhimwenso bhiyo bhikaabheeri bhirabharaama obhusarya bhwabho heene, abhantu bhanú bharamusyengera Waryubha, bhatakaagendereerye okwiyigwa mumeetegeerero gaabho ega, m-bakori bha obhusarya. Kweki bhakaabheeri bhatigiri okuruusya ebhimwenso bhyabho, kwa okubha Waryubha akaabheeri abharaamiri rumwigo. 3 Nawe, ebhimwenso bhinú bhararuusya kira omwaka, oranyoora bhirabhahiitukya obhusarya bhwabho, 4 kwa okubha amanyinga ga egigeeni na aga egimburi, gataana eginguru gya okuruusya-ho obhusarya bhwa abhantu kora ahake. 5 Kiyo nkyo kyakora Kiristu hanú yaaja mukyaro kinu, yaamukeerya Waryubha ega,“Uuwe oteenda ekimwenso kora esadaaka,
nawe, oseemerye omubhiri gwani.
6 Uuwe otaajomerwa na ebhimwenso bhya okusikibhwa,
kasi ebhimwenso kurusumo rwa obhusarya.
7 Nho, nkagamba ega, ‘Ee Waryubha waani! Oni ndingi hanu,
naho mbe ndakora obhwendi bhwaho,
kya ego engʼoorerwe mu Mangʼoore Amarabhu eguru yaani.’”a
8 Erya okwamba Kiristu yaagamba ega, “Uuwe oteenda ebhimwenso, egisadaaka, ebhimwenso bhya okusikibhwa na ebhimwenso kurusumo rwa obhusarya, kweki otaajomerwa nabhyo.” Yaagamba ego, onyoora ebhimwenso bhyonsego bhiyo bhyaringa bhiraruusibhwa okurekana na amaragiriryo ga Musa. 9 Erya kabhiri yaagamba ega, “Ee Waryubha waani! Oni ndingi hanu, naho mbe ndakora obhwendi bhwaho.” Kwa ego, Waryubha yaaruusya-ho ebhimwenso bhya okwamba bhiyo, na okutuura ekimwenso kya Kiristu. 10 Mbe, kwa okubha Yeesu Kiristu yaaringa aragwata obhwendi bhwa Waryubha, Waryubha araturaama obhusarya bhwetu, kwa enjira ya Yeesu okwiruusya rumwigo okubha ekimwenso.
11 Okurekana na eriragano rya akare, kira orusiku abhasyengeri bharamukorera emirimu Waryubha, na okuruusya ebhimwenso bhiryabhirya mara kaaru, bhinú bhitakutura okuruusya obhusarya kora ahake. 12 Nawe, Kiristu yeeruusya rumwigo okubha ekimwenso, naho aturaame obhusarya bhwetu. Weeki ngʼo ekimwenso kya koko. Kwa ego, yeekeeri orubhaara rwa obhuryo rwa Waryubha. 13 Weeki aringi murwire eyo, araganyirira okuhikira hanú Waryubha aribhatuura abhasigu bhaaye hansi wa amaguru gaaye. 14 Mbe, kwa okubha Kiristu yeeruusya okubha ekimwenso rumwigo, akuneenʼye koko abhantu bhaaye, bhanú bhararaamwa obhusarya bhwabho.
15 Omutima Omurabhu wonse areemiririra kubheetu ega, amangʼana gayo n-ga heene, aragamba ega,
16 “Omukuru Waryubha aragamba ega, rinu ndyo eriragano erihya,
rinú ndikora na abhantu bhaani kuginsiku ginú giraaja.
Ndituura amaragiriryo gaani mumitima gyabho,
na okugangʼoora mumeetegeerero gaabho.”
17 Kweki Omutima Omurabhu aragamba ega,
“Ntaribhuhiituka kweki obhusarya bhwabho,
kora amakorwa gaabho amabhiibhi.”b
18 Mbe, nyoore Waryubha abhaabhiiri abhantu obhusarya, bhutariho obhwendi bhwa okuruusya ekimwenso kweki.
Tuuna obhwiyagaari okugya embere ya Waryubha
19 Bheenyu abhahiiri bhaani kuimani, tuuna obhwiyagaari bhwa okusoha Ahasi Aharabhu ha Aharabhu kwa enjira ya amanyinga ga Yeesu bira okoobhoha. 20 Okurekana na oruku rwaye, weeki yaatusiikurira enjira enhya ya obhuhoru, naho tubhe turasoha embere ya Waryubha okuhitira mushuuka enene.c 21 Mbe, bheetu tuuna Omusyengeri Omukuru unú areemiririra abhantu bha enyumba ya Waryubha.d 22 Kwa ego, tubhenga turagya embere ya Waryubha na emitima emijomu, ginú giramwikirirya heene. Ndagamba ego, kwa okubha Waryubha aturaamiri emitima gyetu okurwa kumeetegeerero amabhiibhi, kwa enjira ya amanyinga ga Yeesu. Kweki agiraamiri emibhiri gyetu kwa amanji amajomu. 23 Twikongʼererye bhukongʼu okugagwata ganú tureekirirya na okugeesigira, kwa okubha Waryubha m-muheene, arakora kya ego oranyoora aragiri. 24 Kweki tureenderwa okuteremanʼya omutima, naho tuhanjane na okukorerana amajomu abheene kwa abheene. 25 Kora tutatiga okwikumanʼya hamwi, kya ego abhandi bhaatigiri okwikumanʼya. Nawe, tugendererye okukemerana, kwa okubha tumanyiri ega, orusiku rwa okuhunjuka kwa Omukuru ruringi haangʼi.
26 Nyoore turagendererya okukora obhusarya bhuseri, enu twamara okumanya obhuheene bhwa Waryubha, mbe kitariho ekimwenso ekindi kinú kiratura okuturaama obhusarya bhwetu. 27 Kwa ego, turatigara okuganyirira obhubhuturi bhwa ekiina bhwa Waryubha, bhunú bhuroobhohwa na omururo omuhaari gunú guribhasikya abhantu bhonsego bhanú bharamwanga Waryubha. 28 Omuntu unú yaaringa arasarya amaragiriryo ga Musa, yaaringa areetwa bira ekyabhira, nyoore abheemiririri bhabhiri kasi bhasatu bheemiririiri ega, heene akoreri ego. 29 Mwiganirirye! Bhoono, obhujibhu bhuribha egaki kumuntu unú aramujeera Omwana wa Waryubha, na amanyinga ga eriragano ganú gaamuraama kora obhusarya bhwaye? Bhoono, obhujibhu bhuribha egaki kumuntu unú aramujabhura Omutima Omurabhu wa eriruguto? 30 Tumanyiri ega, Waryubha yaagamba ega, “Oni nooni ndiriha ekisiiyomba.” Kweki yaagamba ega, “Omukuru Waryubha aribhabhuturira ekiina abhantu bhaaye.”e 31 Ni-ringʼana rya okoobhoha bhukongʼu, okutuurwa mumabhoko ga Waryubha omuhoru.
32 Muhiituke eribhaga rya mbere rirya hanú mwaamba okumwikirirya Kiristu. Onyoora mwaringa muranyoora eginyanko eginene, kora ego mwaringa mureegumirirya eginyanko giyo. 33 Eribhaga erindi abhantu bhaaringa bharabhatuka na okubhanyankya harabhu. Eribhaga erindi mwaringa murabhabheera bhanú bhaaringa bharanyoora eginyanko kya giyogiyo. 34 Kweki mwaringa murabhamaahira ekyabhira abharikyenyu bhanú bhaabhohwa mwigereja. Kweki hanú abhantu bhaabharuusyanga ebhintu bhyenyu, mwaringa murajomerwa, kwa okubha mwaringa mumanyiri ega, mumitima gyenyu muuna ebhintu ebhijomu bhukongʼu bhinú bhitakuhwa kora orusiku rumwi.
35 Kwa ego, mugendererye okubha na obhuteremu bhuyo, kwa okubha kwa enjira iyo murinyoora omutuho omunene bhukongʼu okurwa ku Waryubha. 36 Mureenderwa mubhenga mureegumirirya, naho mubhe murakora ganú Waryubha areenda. Kwa enjira iyo, murinyoora ganú Waryubha yaabharaga okubhahaana. 37 Engʼoorerwe mu Mangʼoore Amarabhu ega,
“Ritigeeri eribhaga ekego bhukongʼu,
unú araaja, ariija, kora ataritigita.
38 Omuntu omuheene kuoni, aribhanga areekara kwa okunyikirirya.
Nawe, nyoore omuntu uyo aratiga okunyikirirya, oni ntarijomererwa nawe.”f
39 Mbe, bheetu tutaringi kya abhantu bhanú bharatiga okumwikirirya Waryubha, na okubhura. Nawe, turingi hamwi na bhanú bharamwikirirya na okutuuribhwa.