Obhusyengeri bhwa Merikijedeki
7
Merikijedeki uyo, yaaringa omukama wa omugi gwa Saremu. Kweki yaaringa omusyengeri wa Waryubha wa eguru ya bhyonsego. Merikijedeki uyo, yaasikana na Abhurahamu hanú Abhurahamu yaarwanga mwiihe. Abhurahamu yaaringa arwaniri na abhakama bhane na okubhahiga. Nho, Merikijedeki akamunonka Abhurahamu. 2 Abhurahamu akaruusya eimwi ya ekumi eya ebhintu bhinú yaaringa atumbariiri mwiihe, na okumuhaana Merikijedeki.a Eriina rinu Merikijedeki, ensonga yaaryo niiga, “Omukama wa obhuheene,” kweki eriina rya “Omukama wa Saremu,” ensonga yaaryo niiga, “Omukama wa omurembe.” 3 Eramaahikana ega, abheebhuri bha Merikijedeki bhatamanyikeeni, ehamati yaaye etamanyikeeni, okwibhurwa na okukwa kwaye, bhitamanyikeeni. Weeki m-musyengeri wa koko kya Omwana wa Waryubha.4 Mwiganirirye kya ego Merikijedeki yaaringa omukuru! Kora jaaji weetu Abhurahamu yaamuhaana eimwi ya ekumi eya ebhintu bhinú yaaringa atumbariiri mwiihe. 5 Okurekana na amaragiriryo ga Musa,b abhantu bhonsego okurwa mwikabhira rya Abharaawi bhanú m-basyengeri,c bhareenderwa okunyoora eimwi ya ekumi okurwa kubhintu bhya Abhaisiraeri abharikyabho. Niigo, onyoora Abhaisiraeri abharikyabho bhayo, bhonse m-beebhurwa bha orwibhuro rwa Abhurahamu.d 6 Onyoora Merikijedeki ataarwiranga mwikabhira rya Abharaawi, nawe, yaanyoora eimwi ya ekumi okurwa ku Abhurahamu na akamunonka Abhurahamu, unú Waryubha yaaraga okumunonka. 7 Abhantu bhonsego bhamanyiri obhuheene ega, omukuru ngʼo aranonka omuke. 8 Kweki abhasyengeri okurwa mwikabhira rya Abharaawi, bhanú bharanyoora eimwi ya ekumi, m-bantu bhanú bharakwa, nawe, Merikijedeki unú yaanyoora eimwi ya ekumi okurwa ku Abhurahamu, aragambwa ega, m-muhoru. 9 Kwa ego, turatura okugamba ega, kora Raawi unú abhantu bha erikabhira ryaye bharanyoora eimwi ya ekumi, wonse yaaruusya eimwi ya ekumi yaaye, okuhitira ku Abhurahamu. 10 Ngambiri ego, kwa okubha eribhaga rinú Merikijedeki yaaringa arasikana na Abhurahamu, Raawi yaaringa atareebhurwa.
Obhusyengeri bhwa Yeesu n-kya obhwa Merikijedeki
11 Onyoora Abhaisiraeri bhaahaanwa amaragiriryo ga Musa okuhitira obhusyengeri bhwa Abharaawi, nawe, obhusyengeri bhuyo, bhutaakunaana. Kwa ego, yaaringa areendwa omusyengeri oundi kya Merikijedeki, unú atakurwa muhamati ya Harooni.e 12 Mbe, nyoore obhusyengeri bhurakyuka, ereenderwa amaragiriryo gonse gakyuke. 13 Omusyengeri unú aragambwa eguru hayo, m-Mukuru weetu Yeesu unú ataaringa Omuraawi. Kweki ataaringa-ho omuntu wowonse okurwa mwikabhira ryaye, unú yaaringa arakora emirimu gya obhusyengeri. 14 Tumanyiri ego, kwa okubha emanyikeeni ega, Yeesu yaarwira mwikabhira rya Yuda, kweki hanú Musa yaaringa arahaira eguru ya abhasyengeri, ataarigamba erikabhira riyo.
15 Amangʼana gayo ndagamba, garingi kubhurabhu bhukongʼu, kwa okubha omusyengeri oundi yeebhukiri unú aringi kya Merikijedeki. 16 Weeki ataaringa omusyengeri, kwa ekisigo kya amaragiriryo, okurekana na ehamati yaaye, nawe, n-kwa eginguru gya obhuhoru bhwaye, bhunú bhutaana obhuteero. 17 Engʼoorerwe mu Mangʼoore Amarabhu ega,
“Uuwe nuuwe omusyengeri koko,
kya ego Merikijedeki yaaringa.”f
18 Mbe, Waryubha yaaruusya-ho eriragiriryo erya mbere rirya, kwa okubha ritaaringa na eginguru, kweki ritaaringa na omurimu gogonse. 19 Yaariruusya-ho kwa okubha amaragiriryo ga Musa gataaringa na obhuturo bhwa okukunaanʼya amangʼana. Nawe bhoono, Waryubha atuheeri obhwisige obhundi obhujomu bhukongʼu, bhunú bhuratukora okubha haangʼi nawe.
20-21 Eribhaga rinú Abharaawi bhaaringa bharatuurwa okubha abhasyengeri, Waryubha ataateena. Nawe, hanú Waryubha yaamutuura Yeesu okubha Omusyengeri, yaateena, kya ego engʼoorerwe mu Mangʼoore Amarabhu ega,
“Omukuru ateeneri,
kweki atarikyukya ameetegeerero gaaye kora hake.
‘Uuwe nuuwe omusyengeri koko.’”g
22 Mbe, okurekana na obhuteeni bhuyo, Yeesu ngʼo atungwirye eriraganoh erihya, ribhe erijomu bhukongʼu okukira erya eribhaga rya Musa rirya.
23 Eribhaga rya eriragano rya akare rirya, abhasyengeri bhaaringa m-baaru. Bhataagendererya okukora emirimu gyabho, kwa okubha bhaaringa bharakwa. 24 Nawe, Yeesu m-Musyengeri koko, kwa okubha weeki m-muhoru koko. 25 Kwa ekisigo kiyo, weeki yaana obhuturo bhwa okubhatuurya koko abhantu bhonsego bhanú bharagya ku Waryubha okuhitira kumwene. Weeki m-muhoru koko, naho abhasabhire ku Waryubha eribhaga ryonsego.
26 Omusyengeri Omukuru kya uyo, areenderwa bhukongʼu kubheetu, kwa okubha weeki m-murabhu, ataana obhubhiibhi, kweki ataakora obhusarya bhobhonse. Waryubha yaamwahura okurwa kubhakori bha obhusarya, akamuriinʼya okugya murwire. 27 Abhasyengeri abhakuru bheenderwanga okuruusya ekimwenso kurusumo rwa obhusarya bhwabho. Hanú bhaamaranga, bhaaruusyanga na ebhimwenso ebhindi, kurusumo rwa obhusarya bhwa abhantu abhandi. Kweki bhaaringa bharakora ego mara kaaru. Nawe, Yeesu ataakora kya abhasyengeri abhakuru bhayo. Weeki yeeruusya ekimwenso rumwigo, hanú yaabhambwa kumusarabha kurusumo rwa obhusarya bhwa abhantu bhonsego. 28 Okurekana na amaragiriryo ga Musa, abhantu bhaaringa bharatuurwa okubha abhasyengeri abhakuru, onyoora bhaaringa m-bakori bha obhusarya. Nawe, hanú eribhaga eritambi ryahita, Waryubha yaateena hanú yaaringa aratuura Omwana waaye okubha Omusyengeri unú akuneeni koko.