6
Kwa ego, tutatama kuganú tweehigira eguru ya Kiristu kubhwambiro, nawe, tukore ekituunyo okugendererya okwihigira, naho tubhe abheehigira bhanú bhanagiri kuimani. Tutaamba bhuhya okwihigira eguru ya okwihunjura amakorwa ganú garareeta oruku, na okwihigira eguru ya okumwikirirya Waryubha. 2 Tutabha turahindira okwihigira ameehigiryo ga obhubhatiijo, okutuurira abhantu amabhoko, okuhyuka kwa abhaku na okubhuturirwa ekiina kwa koko. 3 Nyoore Waryubha araahanje, turagendererya okukiina na okunaga kuimani kwa enjira ya ameehigiryo amahya.4 Mbe, bhariho abhantu bhanú bhaahaanwa endingaasi ya eringʼana rya Waryubha, kora bhaanyoora omutuho gwa murwire, bhakakorwa okubha abhamwi na Omutima Omurabhu. 5 Kweki bhaarabha obhujomu bhwa eringʼana rya Waryubha, na eginguru gya obhutungi bhwa Waryubha mukyaro kinú kiraaja. 6 Nawe, abhantu bhayo bhaajeema eimani yaabho, bhakamubhamba Omwana wa Waryubha kumusarabha orwa kabhiri na okumusuukya kubhurabhu. Bhoono, turitura egaki okubhahunjukya, naho bhamwihunjurire Waryubha kweki?
7 Erirobha rinú riranyoora embura mara kaaru na okunyeregetya egimbusuro ginú giina obhwera kumurimi, erirobha riyo riranonkwa na Waryubha. 8 Nawe, erirobha rinú riranyeregetya amahwa na obhunyanki, ritaana obhwera bhobhonse kumurimi, Waryubha arariihiima. Kubhuteero rirasambwa mumururo.
9 Abhahanje bhaani, onyoora mbangʼooreeri kwa amangʼana amahaari, nawe, niina obhuheene ega, murakora amajomu ganú garoorokya ega, mwatuuribhwa. 10 Waryubha ngʼ-wa heene, atakutura okurabhirwa amakorwa amajomu ganú mwakora. Kweki atakutura okurabhirwa obhuhanje bhunú moorokya kurusumo rwaye, kwa okubhabheera abheekirirya abharikyenyu okurwa kubhwambiro nawanyareero. 11 Ndeegomba bhukongʼu ega, kira oumwi kubheenyu akore ekituunyo okukora amangʼana gayo okuhikira kubhuteero, naho munyoore gonsego ganú mureesigira. 12 Mutabha abharosu, nawe, mubhe kya abheekirirya bhanú bhareegumirirya, bheeki bharanyoora ganú Waryubha yaabharaga okubhahaana.
Egindago gya Waryubha n-gya heene
13 Mbe, hanú Waryubha yaamuraga Abhurahamu, yaateena kwa eriina ryaye omwene, kwa okubha ataaringa-ho omukuru wowonse okumukira weeki. 14 Waryubha yaateenera Abhurahamu ega, “M-maheene ndikunonka, na orwibhuro rwaho ndirwaruhya bhukongʼu.”a 15 Kwa ego, Abhurahamu yaaganya na okwigumirirya okuhikira hanú Waryubha yaamuhaana gonsego ganú yaaringa amuragiri.
16 Nyoore abhantu bharateena, bharateena kwa eriina rya omukuru okukira bheeki, kweki okuteena kuyo kuroorokya ega, gonsego ganú garagambwa n-ga heene. Na riyo riramara eginhaka. 17 Egoego Waryubha wonse yaakomererya endago yaaye kwa enjira ya okuteena. Yaaringa areenda okoorokya harabhu kubhantu bhanú bharinyoora ganú yaabharaga ega, atarigahunjura. 18 Mbe, Waryubha yaakora ebhintu ebhibhiri bhinu, okuteena na okuraga. Ebhintu bhiyo, Waryubha ataribhikyukya kora orusiku rumwi, kwa okubha weeki ataringi omubheehi. Yaakora ebhintu bhibhiri bhiyo, naho atuteremye emitima bheetu bhanú tungʼoseeri kumwene, tugwatirire obhwisige bhwa amangʼana ganú garaaja embere yeetu.
19 Tuuna obhwisige bhuyo mumitima gyetu, na bhweki n-kya enanga, inú eragwatirira eryato ritagegwa na omuyaga. Obhwisige bhuyo n-Yeesu unú aringi Aharabhu ha Aharabhu murwire, okuhitira mushuuka enene.b 20 Weeki yaakangata okusoha ahasi hayo kurusumo rwetu. Wonse abheeri Omusyengeri Omukuru wa koko, kya ego Merikijedeki yaaringa.