5
Kira omusyengeri omukuru arasorwa okurwa kubhantu abharikyaye. Aratuurwa-ho, naho yeemiririre amangʼana ga Waryubha kurusumo rwa abhantu. Kweki, weeki aramuruusirya Waryubha egisadaaka na ebhimwenso kurusumo rwa obhusarya bhwa abhantu. 2 Omusyengeri omukuru aratura okubhamaahira ekyabhira abhantu bhanú bharakora obhusarya kwa okwanga okumanya, kwa okubha weeki omwene wonse m-musarya. 3 Kiyo nkyo kirakora areenderwa okuruusya ekimwenso, kurusumo rwa obhusarya bhwaye omwene, kya ego araruusya ekimwenso kurusumo rwa obhusarya bhwa abhantu abhandi.a 4 Atariho omuntu unú aratura okwituurira omwene obhusuuku bhwa okubha omusyengeri omukuru, nawe, Waryubha ngʼo aramusora kya ego yaasora Harooni.b5 Egoego, Kiristu wonse ateetunira omwene obhusuuku bhwa okubha Omusyengeri Omukuru, nawe, Waryubha ngʼo yaamusora na okumukeerya ega,
“Uuwe m-Mwana waani,
oni reero mbeeri Eseweenyu.”c
6 Kweki yaagamba ahasi ahandi mu Mangʼoore Amarabhu ega,
“Uuwe nuuwe omusyengeri koko,
kya ego Merikijedekid yaaringa.”e
7 Hanú Yeesu yaaringa mukyaro hanu, yeesasaama, akasabha na akamukuurira Waryubha bhukongʼu kwa ameesori, kwa okubha yaamanya ega, Waryubha yaana obhuturo bhwa okumutuurya okurwa muruku.f Waryubha akamwigwa okurekana na obhwisuuhya bhwaye embere yaaye. 8 Onyoora Yeesu m-Mwana wa Waryubha, yeehigira okumwigwa Waryubha okurekana na eginyanko ginú gyaringa giramunyoora. 9 Mbe, okurekana na gayo, Waryubha akamukora Yeesu yeenderwe okubha obhusimuka bhwa obhutuurya bhwa koko, kubhantu bhonsego bhanú bharamwigwa. 10 Na Waryubha yaamutuura Yeesu okubha Omusyengeri Omukuru, kya ego Merikijedeki yaaringa.
Obhukemeri eguru ya okutiga eimani
11 Tuuna amaaru ga okuhaira eguru ya Omusyengeri Omukuru uyo, nawe, m-bukongʼu okubhakeerya, kwa okubha bheenyu mutaringi abhangu okumanya. 12 Kwibhaga rinu singa mwamara okubha abheehigirya bha abharikyenyu, nawe, mukyenda omuntu wa okubheehigirya ameehigiryo ga mbere ga eringʼana rya Waryubha! Mukyenda amabheere kora mutakwenda ebhyakurya ebhikongʼu. 13 Omuntu unú akyaneena, uyo akyari omwana omurera, atakutura okumanya amajomu na amabhiibhi. 14 Nawe, ebhyakurya ebhikongʼu m-bya abhantu abhakuru, bheeki bheehigira okoonjoora amajomu na amabhiibhi.