Okumuunya kwa abhantu bha Waryubha
4
Mbe, endago ya Waryubha eya okusoha ahasi haaye ha okumuunya ekyari-ho. Kwa ego tubhenga turoobhoha, naho oumwi gati yeenyu atariija okutamwa okusoha ahasi hayo. 2 Bheetu twaraarikirwa amangʼana amajomu eguru ya ahasi ha okumuunya, kya ego bhajaaji weetu bhonse bhaaraarikirwa. Nawe, bheeki amangʼana gayo gataabha na obhwera bhobhonse kubheene, kwa okubha bhaageegwa, nawe, bhataageekirirya.a 3 Kwa ekisigo kiyo, Waryubha yaagamba ega,“Kwa ego, naajima na okuteena, nkagamba ega,
‘Ntaribheekiririrya kora orusiku rumwi abhantu bhayo, okusoha ahasi ha okumuunya,
hanú naaseemya kurusumo rwabho.’”b
Nawe, bheetu bhanú turamwikirirya Waryubha, turisoha ahasi hayo ha okumuunya. Waryubha yaagamba ego, onyoora yaaringa amariri okuseemya ahasi hayo, okwambira okubhumbwa kwa ekyaro. 4 Ndagamba ego, kwa okubha ahasi nyabhurebhe mu Mangʼoore Amarabhu engʼoorerwe eguru ya orusiku rwa muhungati ega, “Waryubha yaamuunya orusiku rwa muhungati, akatiga emirimu gyaye gyonsego.”c 5 Kweki, Amangʼoore Amarabhu garagamba eguru hayo ega,
“Ntaribheekiririrya kora orusiku orumwi abhantu bhayo, okusoha ahasi ha okumuunya,
hanú naaseemya kurusumo rwabho.”d
6 Onyoora bhajaaji weetu bhaabha abha mbere okuraarikirwa amangʼana amajomu ga okumuunya, nawe, bhataasoha ahasi hayo, kwa okubha bhataaringa bharamwigwa Waryubha. Mbe, okurekana na eringʼana riyo, omweya guriho gwa abhantu abhandi okusoha ahasi ha okumuunya. 7 Kwa ego, Waryubha yaatuura-ho orusiku orundi rwa okusoha ahasi ha okumuunya, runú rurabhirikirwa ega, “Reero.” Waryubha yaagamba orusiku ruyo hanú gyahwa emyaka emyaru okurwa hanú bhajaaji weetu bhaatamwa okusoha ahasi hayo. Yaagamba okuhitira kumukama Daudi,e amangʼana ganú gagambirwe eguru hayo ega,
“Reero, nyoore mwakeegwe eriisi ryani,
mutaaja okukora emitima gyenyu okubha emikongʼu.”f
8 Nyoore Yoshua akaahikirye abhantu ahasi ha okumuunya, Waryubha atakaahairiri kweki eguru ya orusiku orundi rwa okumuunya.g 9 Kwa ego, rukyari-ho orusiku rwa okumuunya, runú Waryubha yaaseemya kurusumo rwa abhantu bhaaye. 10 Na omuntu wowonse unú arasoha ahasi ha okumuunya hayo, aramuunya okukora emirimu gyaye gyonsego, kya ego Waryubha yaamuunya hanú yaamara emirimu gyaye gya obhubhumbi. 11 Mbe, tukore ekituunyo okusoha ahasi ha okumuunya hayo, naho omuntu wowonse atatamwa okusoha, kwa ekisigo kya okwanga okumwigwa Waryubha, kya ego bhajaaji weetu bhaakora.
12 Eringʼana rya Waryubha ni-rihoru kweki riina eginguru okukira omuhyu gogonse omoogi. Eringʼana riyo, rirabhita omuntu okuhikira kumaguha, riraahukanʼya ebhiroobhero na amaguta ganú garingi munsi wabhyo. Kweki riraanguha okumanya ameetegeerero na kinú omutima gwa omuntu gureenda. 13 Kweki, kitariho ekibhumbwa kyokyonse kinú kiibhisiri ku Waryubha. Ebhintu bhyonsego bhiringi kubhurabhu embere yaaye, na bheetu tureenderwa okumukeerya amakorwa geetu ega, n-kwaki twagakora.
Yeesu m-Musyengeri Omukuru
14 Mbe, tuuna Omusyengeri Omukuru, Yeesu Omwana wa Waryubha, unú yaagya akasoha murwire. Kwa ego tugwate bhukongʼu eimani yeetu inú tureekirirya. 15 Omusyengeri Omukuru uyo, ngʼo amanyiri obhunyooheeru bhwetu, kwa okubha wonse yaasakibhwa kwa kira enjira kya bheetu, nawe, weeki ataakora obhusarya. 16 Kwa ekisigo kiyo, tubhe abhahaari okusuntara embere ya Waryubha owa eriruguto, naho atumaahire ekyabhira na okutubheera kwa eriruguto ryaye, kwibhaga rya enyanko.