Yeesu m-mukuru okukira Musa
3
Kwa ego, bheenyu abhahiiri bhaani kuimani, bhanú Waryubha abhasoreri okubha abhantu bhaaye, mwiganirirye eguru ya Yeesu unú aringi Omutumwa wa Waryubha, kweki m-Musyengeri Omukuru unú turamwikirirya. 2 Weeki yaaringa omuheene ku Waryubha unú yaamusora, kya ego Musaa wonse yaaringa omutungi omuheene kubhantu bhonsego bha enyumba ya Waryubha, yaani Abhaisiraeri.b 3 Omuhagaaji arasuukwa okukira enyumba inú ahagaajiri, egoego Yeesu wonse areenderwa okusuukwa bhukongʼu okukira Musa. 4 Kira enyumba erahagaajwa na omuhagaaji nyabhurebhe, nawe, Waryubha ngʼo Omuhagaaji Omukuru wa ebhintu bhyonsego.5 Musa yaaringa omukori wa emirimu omuheene gatigati ya abhantu bhonsego bha enyumba ya Waryubha. Emirimu gyaye gyaringa n-gya okubhakeerya abhantu bhayo gonsego ganú Waryubha yaaringa aseemerye okuhaira embere eyo. 6 Nawe Kiristu, weeki m-Mwana omuheene unú areemiririra abhantu bha enyumba ya Waryubha. Na bheetu mbo abhantu bhayo, nyoore turagendererya okuhikira obhuteero okubha abhahaari na okwirora kuganú tureesigira.
Obhukemeri eguru ya okwanga okwikirirya
7 Kwa ego, tureenderwa okwigwa ganú Waryubha yaagamba okuhitira ku Mutima Omurabhu ega,
“Reero, nyoore mwakeegwe eriisi ryani,
8 mutaaja okukora emitima gyenyu okubha emikongʼu,
kya ego bhajaaji weenyu bhaaringa bharaanga okoorokereribhwa na oni,
kwibhaga rirya bhaaringa bharansakya kukibhara.
9 Kukibhara eyo ngʼyo bhajaaji weenyu, bhaaringa bharansakya,
onyoora naabhakorera ebhika ebhyaru kwa emyaka mirongo ena.
10 Mbe, kwa ekisigo kiyo naajimira abhantu bhayo, nkagamba ega,
‘Abhantu bhanu m-bajeemi eginsiku gyonsego,
m-bantu bhanú bhatakwenda okugwata enjira yaani.’
11 Kwa ego naajima na okuteena, nkagamba ega,
‘Ntaribheekiririrya kora orusiku rumwi, abhantu bhayo okusoha ahasi ha okumuunya,
hanú naaseemya kurusumo rwabho.’”c
12 Mbe bheenyu abhahiiri bhaani kuimani, mwiyangararire, naho atariija okubha-ho omuntu wowonse gatigati yeenyu unú aringi na omutima omubhiibhi unú atakwikirirya, unú areeyahura okurwa ku Waryubha omuhoru. 13 Nawe, mukemerane abheene kwa abheene kira orusiku runú turabhirikira ega, “Reero,” naho gati yeenyu atabha-ho omuntu wa omutwe omukongʼu, kwa okungʼeenwa na obhusarya. 14 Tukore ego, kwa okubha turagwatana hamwi na Kiristu, nyoore turamwisigira okuhikira obhuteero, kya ego twaringa turamwisigira kubhwambiro. 15 Muhiituke ganú gaangʼoorwa mu Mangʼoore Amarabhu ega,
“Reero, nyoore mwakeegwe eriisi ryani,
mutaaja okukora emitima gyenyu okubha emikongʼu,
kya ego bhajaaji weenyu bhaaringa bharaanga okoorokereribhwa na oni.”d
16 Bhoono, m-bantu-ki bhanú bheegwa eriisi rya Waryubha, bhakaanga okoorokereribhwa nawe? M-bonsego bhanú bhaaringa bharoorokereribhwa na Musa okurwa mukyaro kya Misiri. 17 Kweki, m-bantu-ki bhanú Waryubha yaabhajimira kwa emyaka mirongo ena? M-banú bhaakora obhusarya, bhakakwa, emibhiri gyabho gikanyaragana kukibhara. 18 M-bantu-ki bhanú Waryubha yaateena ega, ataribheekiririrya kora orusiku rumwi, okusoha ahasi ha okumuunya hanú yaaseemya kurusumo rwabho? M-banú bhaanga okumwigwa! 19 Mbe, turamanya ega, abhantu bhayo bhaatamwa okusoha ahasi ha okumuunya, kwa okubha bhaanga okumwikirirya Waryubha.