Obhutuurya obhukuru bhwa Waryubha
2
Kwa ego, twiyangararire bhukongʼu kuganú twigwiri, naho tutakaaja okugatiga. 2 Tumanyiri ega, amaragiriryo ga Waryubha ganú bhajaaji weetu bhaagwata okurwa kubhamaraika bhaaye, gaaringa na obhutungi. Ego, abhantu bhonsego bhanú bhaaringa bhatakugagwata na okugeegwa, Waryubha yaabhajibhya okurekana na obhusarya bhwabho. 3 Nyoore gaakoreka ego kubheene, bhoono, bheetu turatura egaki okuhona okujibhibhwa, nyoore turajeera obhutuurya obhukuru bhunú twanyoora? Omukuru Yeesu ngʼo yaamba okuraarika obhutuurya bhuyo na abhantu bhanú bhaaringa bharamwigwa, bhaatukomererya ega, obhutuurya bhuyo, m-bwa heene. 4 Waryubha wonse yaaringa arakomererya obhutuurya bhuyo, kwa okukora ebhimanyiiriryo, ebhiruguuryo na ebhika amanga amaaru. Akabhahaana abhantu ebhibharo bhya Omutima Omurabhua kwa okuringʼaana na obhwendi bhwaye.Okwisuuhya kwa Yeesu
5 Tumanyiri ega, Waryubha ataabhahaana bhamaraika obhuturo bhwa okutunga ekyaro ekihya kinú kiriija, kinú turagamba amangʼana eguru yaakyo. Engʼoorerwe mu Mangʼoore Amarabhu ega,
6 “Omuntu n-kintu-ki kora uuwe Waryubha, omwiganirirye?
Bhoono, omwana wa omuntu niwi kora omuserenʼye?
7 Waamukora omuntu okubha omuke okukira bhamaraika kwa eribhaga ekego.
Nawe bhoono, omuheeri obhukuru na obhusuuku,
8 na okutuura ebhintu bhyonsego mubhutungi bhwaye.”b
Ego, Waryubha yaatuura-ho omuntu, naho abhenga aratunga ebhintu bhyonsego, kora ataatiga ekintu kyokyonse. Nawe, kwibhaga rinu tutakurora omuntu aratunga ebhintu bhiyo bhyonsego. 9 Nawe, turamurora Yeesu. Waryubha yaamukora okubha omuke okukira bhamaraika kwa eribhaga ekego. Yaakora ego, naho kwa enjira ya eriruguto rya Waryubha, Yeesu akwe kurusumo rwa okutuurya abhantu bhonsego. Bhoono, Waryubha amuheeri obhukuru na obhusuuku obhunene, kwa ekisigo kya okunyankibhwa na okukwa kwaye.
10 Waryubha ngʼo yaabhumba ebhintu bhyonsego na okubhikora kya ego bhiringi. Yaamungʼarira abhasohye abheekirirya abhaaru mubhukuru bhwaye, kwa ego yaakunaanʼya Yeesu kwa enjira ya okunyankibhwa, naho abhe obhusimuka bhwa obhutuurya.
11 Yeesu na abhantu bhanú araraama obhusarya bhwabho, Esewaabho ngʼ-umwi. Kiyo nkyo kirakora Yeesu atakurora eginsoni okubhabhirikira ega, abhahiiri bhaaye. 12 Yeesu yaagamba ega,
“Ee Waryubha, ndigamba ebhikorwa bhyaho ebhikuru kubhahiiri bhaani,
ndiimba ameembo ga okukugungya gatigati ya omuganda gwabho.”c
13 Kweki yaagamba ega,
“Ndibha ndamwisigira Waryubha.”d
Na kweki yaagamba ega,
“Oni ndingi hanu na abhaana bhanú Waryubha yangʼeeri.”e
14 Mbe, kwa okubha abhaana bhayo bhaana emibhiri na amanyinga, Yeesu wonse yaaja na omubhiri kya bheetu. Yaakora ego, naho okuhitira okukwa kwaye, ahige eginguru gya Erisambwaf rinú riina obhuturo bhwa okukora abhantu bhabhenga bharakwa. 15 Kweki Yeesu yaakwa, naho abhakore bhanú bhaaringa abhagaya kwa ekisigo kya okoobhoha oruku, mubhuhoru bhwabho bhonsego, bheeyagaare. 16 Kwa ego eroorokya kubhurabhu ega, Yeesu ataaja okubhabheera bhamaraika, nawe, yaaja okubhabheera abhantu bha orwibhuro rwa Abhurahamu.g 17 Kiyo nkyo kyakora akabha kya abhahiiri bhaaye kumangʼana gonsego, naho abhe Omusyengeri Omukuruh unú yaana ekyabhira na m-muheene kumirimu gyaye, embere ya Waryubha. Kwa enjira iyo yaatura okwiruusya ekimwenso, naho Waryubha yaabhire abhantu obhusarya bhwabho. 18 Kwa okubha Yeesu yaanyanka na okusakibhwa, aratura okutubheera kora bheetu bhanú turasakibhwa.