Abhaebhurania 1

Enyarubha ku

Abhaebhurania

Waryubha ahairi okuhitira ku Mwana waaye

Akare hayo, Waryubha yaahairanga na bhajaaji weetu okuhitira kubharooti. Yaakoranga ego, mara kaaru na kwa eginjira eginjaru. 2 Nawe, kuginsiku gya obhuteero ginu, Waryubha ahairi na bheetu okuhitira ku Mwana waaye. Yaamusora Omwana uyo, agabhe ebhintu bhyonsego, kweki okuhitira kuweeki, Waryubha yaabhumba ekyaro. 3 Omwana uyo, arangʼesangʼesa kwa obhukuru bhwa Waryubha, na aroorokya kubhurabhu kya ego Waryubha aringi. Arakora ebhintu bhyonsego bhigendererye okubha kya ego bhiringi kwa eringʼana ryaye rya obhuturo. Weeki yeeruusya okubha ekimwenso kya okuruusirya abhantu obhusarya, akagya murwire akeekara orubhaara rwa obhuryo rwa Waryubha owa obhuturo.

Yeesu m-mukuru okukira bhamaraika

4 Waryubha yaamukora Omwana waaye, abhe omukuru okukira bhamaraika, kya ego yaamuhaana eriina erikuru okukira erya bhamaraika. 5 M-maheene, kwa okubha atariho maraika unú yaakeeribhwa na Waryubha, amangʼana ganú yaakeerya Yeesu ega,

“Uuwe m-Mwana waani,

oni reero mbeeri Eseweenyu.”

Na Waryubha ataagamba eguru ya maraika wowonse ega,

“Ndibha Esewaabho,

wonse aribha Omwana waani.”

6 Kweki Waryubha hanú yaatuma Omwana waaye omumwemwe mukyaro, yaagamba ega,

“Bhamaraika bhaani bhonsego, bhamusyengere Omwana uyo.”

7 Nawe, eguru ya bhamaraika, yaagamba ega,

“Bhamaraika bhaani, oni ndabhakora bhabhe omuyaga,

abhakori bha emirimu bhaani, oni ndabhakora bhabhe egindimi gya omururo.”

8 Nawe, eguru ya Omwana waaye, weeki aragamba ega,

“Uuwe Waryubha, oritunga koko na koko,

na obhutungi bhwaho, bhuribha bhwa obhuheene.

9 Uuwe ohanjiri amajomu,

na orajimira amabhiibhi gonsego.

Kwa ego oni, Waryubha waaho,

nkuhakiri amaguta ga obhujomerwa,

naho okukukora omukuru

okukira abharikyaho bhonsego.”

10 Kweki Waryubha aramukeerya Omwana waaye ega,

“Uuwe Omukuru nuuwe waabhumba ekyaro kubhwambiro hayo,

na kweki, nuuwe waabhumba orwire kwa amabhoko gaaho.

11 Ebhintu bhyonsego bhiyo bhirihwa,

bhirigota kya emyenda,

nawe, uuwe oribha-ho koko na koko.

12 Uuwe oribhikunyakunya ebhintu bhiyo kya enkanju,

bhirirabhuuka kya omwenda gwa akare.

Nawe, uuwe otarihunjura,

kora emyaka gyaho gitarihwa koko na koko.”

13 Waryubha ataakakeererye maraika wowonse ega,

“Ikara orubhaara rwani rwa obhuryo,

okuhikira hanú ndituura abhasigu bhaaho hansi ya amaguru gaaho,

bhabhe kya ekitumbi kyaho kya okutaja-ko amaguru.”

14 Bhoono, bhamaraika n-kintu-ki? M-bakori bha emirimu bha Waryubha. Ni-nkoro, ginú Waryubha arabhatuma bhagye okukorera emirimu abhantu bhanú bharituuribhwa.