Omusyengeri Omukuru wa eriragano erihya
8
Mbe, eringʼana rya obhwera bhukongʼu kugonsego gayo turagamba, n-dinu. Bheetu tuunawe Omusyengeri Omukuru wa ekabhira iyo, unú yeekeeri orubhaara rwa obhuryo rwa ekitumbi kya ekikama ekya Waryubha owa obhuturo murwire eyo. 2 Weeki arakora emirimu gya omusyengeri omukuru ahasi aharabhu murwire eyo, mwibhuru rya maheene rinú ritaahagaajwa na omuntu, nawe, ryahagaajwa na Omukuru omwene.3 Kira omusyengeri omukuru aratuurwa-ho, naho amuruusirye Waryubha egisadaaka na ebhimwenso. Egoego, Omusyengeri Omukuru weetu uyo, wonse areenderwa abhe na ekintu kya okumuruusirya Waryubha. 4 Uuja okunyoora ega, Yeesu aragendererya okwikara mukyaro kinu, atakaabheeri omusyengeri, kwa okubha mukyaro kinu bhariho abhasyengeri bhanú bhararuusya ebhimwenso okurekana na amaragiriryo ga Musa. 5 Amangʼana ganú abhasyengeri bhayo bharakora ahasi aharabhu, n-kirengyo na ekiiriiri bhya ganú garingi ahasi aharabhu murwire eyo. Nkyo kirakora hanú Musa yaaringa areeseemya okuhagaaja eribhuru rya okumusyengera Waryubha,a Waryubha akamukeerya ega, “Okore kira ekintu okurekana na gonsego ganú naakoorokya kunkuku irya eya Sinai.”b 6 Nawe, Waryubha amuheeri Yeesu emirimu gya obhusyengeri egya obhwera obhunene, okukira egya abhasyengeri bha mbere bharya. Yeesu ngʼo areegwanʼya abhantu na Waryubha, kwiragano erijomu okukira erya kare, rinú bheeki bhaaringa bharagwata. Kweki eriragano riyo, rihagaajirwe kubhurusa obhujomu, ensonga yaaye niiga, rihagaajirwe eguru ya egindago eginjomu bhukongʼu okukira egindago gya eriragano rya akare rirya.
7 Uuja okunyoora ega, eriragano rya mbere rikuneeni, omweya gwa eriragano rya kabhiri, gutakaatunirwe. 8 Nawe, hanú Waryubha yaarora obhusarya bhwa abhantu bhaaye, akagamba ega,
“Mwitegeerere, eribhaga riraaja,
rinú ndikora eriragano erihya na abhantu bha Isiraeri na Yuda.
9 Eriragano erihya riyo, ritaribha kya erya kare, rinú naakora na bhajaaji waabho,
eribhaga rinú naaringa ndabhoorokererya bhujomu okurwa mukyaro kya Misiri.
Bheeki bhataaringa abhaheene kwiragano ryani erya kare rirya.
Kiyo nkyo kyakora naabhatiga kya ego bharingi.
Ego niigo Omukuru aragamba.
10 Rinu ndyo eriragano erihya rinú ndikora na Abhaisiraeri kuginsiku ginú giraaja.
Ndituura amaragiriryo gaani mumeetegeerero gaabho, ndigangʼoora mumitima gyabho.
Oni ndibha Waryubha waabho, bhonse bharibha abhantu bhaani.
11 Ataribha-ho omuntu wowonse unú aribhanga areehigirya omurikyaye,
kasi wa okukeerya omuhiiri waaye ega, ‘Oreenderwa omumanye Omukuru Waryubha,’
kwa okubha bhonsego okwambira kumuke okuhikira kumukuru bharimmanya.
12 Eribha ego, kwa okubha ndibhaabhira amabhiibhi gaabho,
na obhusarya bhwabho ntarihiituka kweki.”c
13 Hanú Waryubha aragamba ega, eriragano rinu ni-rihya, aroorokya ega, eriragano rya mbere ni-rya akare. Mbe, ekintu kyokyonse kinú kimariri okubha ekya akare, na okurabhuuka, kitakubha na omurimu gogonse, kiringi haangʼi okubhura.