Ameehigiryo ga obhuheene
2
Bhoono uuwe Tiito, obhenga oreehigirya abhantu okuringʼaana na ameehigiryo ga obhuheene. 2 Wihigiryenga abhakaruka, bhabhenga bhareeswa, abhasuuku, abha okwiribhira, bhabhenga abhaheene kuimani, kubhuhanje na kukwigumirirya.3 Egoego, abhakungu bhonse, obheehigirye bhabhe na egintungwa ginú giramugungya Waryubha. Bhatabha abhabheehi, abhareebhi, nawe, bhabhenga bhareehigirya amajomu, 4 naho bhature okwihigirya abhakari abhahara, okuhanja abhasaaja bhaabho na abhaana bhaabho. 5 Kweki, abhahara, bhabhenga abhantu bha okwiribhira, bhabhe na emitima gya heene, bhakorenga bhujomu emirimu mumigi gyabho, bhabhe abhantu bha heene, na bhasuukenga abhasaaja bhaabho. Obheehigirye bhakorenga ego, naho bhatakora eringʼana rya Waryubha rijeerwe.
6 Egoego, abhamura bhonse, obhakomererye bhabhenga bhareeribhira. 7 Na uuwe, oreenderwa okorenga amajomu, naho obhe ekirengekanʼyo kya okwihigirira-ko. Na kumeehigiryo gaaho, worokyenga obhuheene na obhusuuku. 8 Ameehigiryo gaaho, gabhe ga obhuheene ganú gatakuhakaanibhwa na abhantu. Okorenga ego, naho nyoore omuntu areenda okugahakaanʼya, arore eginsoni, kwa okubha ataanyoore eringʼana rya okutugamba obhubhiibhi.
9 Abhagaya bhonse, obheehigirye okwigwa abhakuru bhaabho, bhabhenga bharakora bhujomu kumangʼana gonsego, bhatahakaananʼya na abhakuru bhaabho. 10 Bhatabheebhira, nawe, bhoorokye obhuheene bhwabho bhonsego, naho emirimu gyabho gikore abhantu abhandi bhajomererwe na ameehigiryo ga Waryubha Omutuurya weetu.
11 Obhenga oreehigirya amangʼana gayo, kwa okubha eriruguto rya Waryubha rinú riratuurya abhantu bhonsego, ritubhwirwe. 12 Eriruguto riyo, riratwihigirya okwanga amabhiibhi na orunamba rwa ekyaro. Ego, eribhaga tukyari mukyaro munu, tubhenga tureeribhira, tubhenga abhaheene, na tubhenga turamwigwa Waryubha. 13 Tubhenga ego, eribhaga turaganyirira orusiku rwa enonkwe, rurya rwa okuhunjuka kwa Yeesu Kiristu. Orusiku ruyo, arimaahikana mubhukuru bhwaye. Weeki ngʼo Waryubha weetu omukuru, na ngʼo Omutuurya weetu. 14 Yeeruusya omwene okukwa kurusumo rwetu, naho atutuurye okurwa mubhusarya bhonsego. Yeendanga okuturaama, naho maheene tubhe abhantu bhaaye, bhanú twiruusirye okukora amajomu.
15 Mbe bhoono, otumire obhutungi bhwaho, okwihigirya gayo gonsego, na wimye na okukemera abhantu. Na omuntu wowonse atakujeera.