Enyarubha ya Pauro ku
Tiito
Pauro aramukeeranʼya Tiito
1
Enyarubha inu, erwiri kuoni Pauro, omugaya wa Waryubha, na omutumwaa wa Yeesu Kiristu. Naatumwa naho okoorokererya abhantu bhanú bhaasorwa na Waryubha, bhature okumwikirirya na okumanya obhuheene eguru ya Yeesu Kiristu. Obhuheene bhuyo, bhurabhoorokererya okumwigwa Waryubha, 2 na bhurabhahaana obhwisige bhwa obhuhoru bhwa koko. Waryubha yaabharaga obhuhoru bhuyo, kora ekyaro kitarabhumbwa, na weeki atakugamba obhubheehi. 3 Mbe bhoono, eribhaga rinu ndyo Waryubha yaamwiri okutubhura Amangʼana gaaye Amajomu. Waryubha Omutuurya weetu yaamura ega, yangʼaane emirimu gya okuraarika amangʼana gayo.4 Ndakungʼoorera uuwe Tiito, omwana waani wa heene kuimani inú turasanga hamwi.
Ndakwendera eriruguto na omurembe okurwa ku Taata Waryubha na ku Kiristu Yeesu Omutuurya weetu, bhibhe hamwi na uuwe.
Emirimu gya Tiito kwiginga rya Kirete
5 Hanú naarwa Kirete eyo, naakusabha uuwe otigare, naho otuure bhwaheene amangʼana agandi ganú gaatama, hamwi na okusora abhakangati bha erikanisa mumigi gyonsego, kya ego naakoorokererya.
6 Omukangati wowonse wa erikanisa, areenderwa abhe omuntu unú atakugambwa obhubhiibhi kuryoryonse rirya. Abhe na omukari umwi ego, abhaana bhaaye, bhabhe abheekirirya, bhatabha abhakabhankanu kasi bhanú bhatakwigwa. 7 Omukangati wa erikanisa, m-mwimiririri unú yaahaanwa emirimu gya Waryubha. Weeki areenderwa abhe omuntu unú atakugambwa obhubhiibhi. Atabha omuntu wa omutwe omukongʼu, atabha na enkoro, atabha omureebhi, atabha omutindi, kweki atabha na orunamba orubhiibhi rwa egimbirya. 8 Nawe, abhe omuserenʼya, unú ahanjiri amajomu, owa okwiswa, omuheene, omurabhu wa omutima, na abhe owa okwiribhira. 9 Abhe aragwata bhujomu amangʼana ga obhuheene eguru ya Yeesu Kiristu, kya ego yeehigiribhwa. Hayo nho, aratura okwimya abhantu kwa ameehigiryo ga obhuheene, na okubhahiga bhanú bharahakaana ameehigiryo gayo.
10 Ndakukeerya ego, kwa okubha Kirete hayo, bhariho abhantu abhaaru bhanú bhataringi abheegwa, abheene bharagamba amangʼana ganú gataana obhwera, kweki m-babheehi, ekinene m-barya bharakomererya amangʼana ga egimiira gyabho gya Ekiyahudi. Abhantu bhayo, bhakaanibhwe okwihigirya, 11 kwa okubha bharahabhya abhantu mumigi emyaru. Bhareehigirya amangʼana ganú gatakwenderwa, naho bhanyoore egimbirya kwa eginjira egimbiibhi. 12 Akare hayo, yaaringa-ho omurooti umwi, Omukirete owa ewaabho abheene, weeki yaagamba ega, “Abhakirete m-babheehi eginsiku gyonsego, bharingi kya egintyenyi eginhaari, m-banamba, kweki m-booro!” 13 Amangʼana gayo n-ga maheene. Kwa ego, abhantu kya bhayo, obhenga orabhakemera kwa obhuhaari, naho obhabheere okunaga kumeehigiryo ga obhuheene. 14 Bhatige okwitegeerera kweki amagano ga Ekiyahudi ganú gataana obhwera, na amaragiriryo ga abhantu bhanú bhaatiga obhuheene.
15 Abhantu bhayo, bhareehigirya ega, bhiriho ebhintu ebhindi ebhya omugiro. Nawe, oni ndagamba ega, kubhantu bha emitima emijomu mumeeso ga Waryubha, ebhintu bhyonsego bhyaraamwa. Nawe, kubhantu abhakonu na bhanú bhatakumwikirirya Waryubha, ebhintu bhyonsego m-bya omugiro, kwa okubha ameetegeerero na emitima gyabho bhyahabha. 16 Abheene bharagamba ega, bhamumanyiri Waryubha, nawe, amakorwa gaabho, garoorokya ega, bharamwanga. Abhantu bhayo, bharajimya, m-bajeemi, bhatakutura okukora eringʼana ryoryonse erijomu.