Okukora amakorwa amajomu
3
Obhenga orahiitukya abhantu ega, bhasuukenga na okwigwa abha obhuturo na abhatungi bha ekyaro. Na bhabhenga bheeseemerye okukora kira eringʼana erijomu. 2 Kweki obhakeerye ega, bhatatuka omuntu wowonse, bhatabha abhatindi, bhabhe abha eginkoro eginjomu, na bhabhenga abhanyoohu kubhantu bhonsego.3 Akare hayo, bheetu abheene bhonse, eribhaga twaringa tutaramwikirirya Yeesu, twaringa abhakangi, abhajeemi, kweki twaringa tungʼeenerwe. Twaringa abhagaya bha orunamba orubhiibhi rwa amanga amaaru ga ekyaro. Okwikara kwetu kwaringa kwa okukora amabhiibhi na orwango. Abhantu bhaaringa bharatubhihirirwa, na bheetu twaringa turabhabhihirirwa. 4 Nawe, Waryubha Omutuurya weetu, akatoorokya ega, weeki m-muserenʼya na atuhanjiri bhukongʼu, akatutuurya. 5 Yaatutuurya, etaringi kwa okubha, bheetu twakora eringʼana ryoryonse erya heene, nawe, n-kwa ekyabhira kyaye. Yaaturaama obhusarya bhwetu, kuyo nko okwibhurwa orwa kabhiri. Kweki yaatuhaana obhuhoru obhuhya kwa enjira ya Omutima Omurabhu.a 6 Waryubha yaatuhumirira Omutima Omurabhu kwa obhwaru, okuhitira ku Yeesu Kiristu, Omutuurya weetu, 7 naho kwa eriruguto ryaye, tuture okubharwa okubha abhaheene na okunyoora obhuhoru bhwa koko bhunú tureesigira.
8 Amangʼana gayo, n-ga maheene. Ndeenda ogakomererye bhukongʼu, naho bhanú bharamwikirirya Waryubha, bhatatiga okubha na ekituunyo kya okukora amajomu. Amangʼana gayo m-majomu, kweki gaana obhwera kubhantu bhonsego. 9 Nawe, oteesohya muginhaka gya ekikangi, na okwitonda amariina ga eginganda gya bhajaaji, eriihe na eginhaka eguru ya amaragiriryo ga Musa.b Gayo gonsego gataana obhwera bhobhonse. 10 Omuntu unú aragwatanʼya abhantu, omukemere orwa mbere, omare omukemere orwa kabhiri. Nyoore ataribha omwigwa, otigane nawe kimwi. 11 Omanye ega, omuntu kya uyo, amariri okutiga obhuheene, m-muntu unú aragendererya okukora obhusarya. Weeki areebhuturira ekiina omwene.
Okukeeranʼya kwa okuraga
12 Naamwiri okugya okwikara mumugi gwa Nikopori erya, kwibhaga rya embeho. Nawe, ndimutuma Aritema kasi Tukiko, kuuwe eyo. Hanú arihika, uuwe wanguhe okuuja Nikopori tumaahane. 13 Okore ekituunyo okubheera Jeena, omoonjoori wa amaragiriryo urya, na Apooro. Obhahaane ebhintu bhyonsego bhya okubhabheera, naho bhatasuuhirwa ekintu kyokyonse kurugendo rwabho. 14 Abheekirirya abharikyetu bhonse bheehigire okukora amajomu kwa ekituunyo, naho bhature okubheera abhantu bhanú bhataana ekintu. Hanú bharaakorenga ego, obhumenyi bhwabho bhurabha na obhwera.
15 Abhantu bhonsego bhanú bharingi hamwi na oni hanu, bharakukeeranʼya. Mbe uuwe wonse, otukeeranirye abheekirirya abhahanje bhonsego. Eriruguto rya Waryubha ribhe hamwi na bheenyu bhonsego.