Amaragiriryo kubheekirirya
5
Otatoongʼanʼya abhakaruka, nawe, obhatongere kya ego oratongera eseweenyu. Abhamura obhatongere kya abhamura bheenyu, 2 abhakungu kya ngʼina weenyu, kora abhahara obhakorere kwa omutima omujomu kya abhahara bheenyu.3 Osuuke abhasino, bhanú bhataana owa okubhabheera. 4 Nyoore omusino wowonse yaana abhaana kasi abheejukuru, bhayo bheehigire okutuga abhahiiri bhaabho. Okukora ego, nko okuriha abheebhuri bhaabho kuganú bhonse bhaakorerwa. Ego niigo Waryubha ahanjiri. 5 Omusino unú ataana omuntu wa okumubheera, uyo areesigira Waryubha, aramusabha na okumwisasaama obhutiku na omubhasu. 6 Nawe, omusino unú atakwiribhira kumangʼana ga ekyaro, uyo yaakwa onyoora akyari omuhoru. 7 Amangʼana gayo gonse, obharagirirye abheekirirya, naho bhatabha na amasoro. 8 Omuntu wowonse unú atakutuga abhahiiri bhaaye, ekinene abha iika owaaye, uyo arabha atigiri eimani, kweki arabha omubhiibhi okukira unú atakwikirirya.
9 Omusino areenderwa okungʼoorwa kwisaabhu rya abhasino, nyoore yaana emyaka okwambira mirongo esansabha, kweki abhe yaatetwa na omusaaja umwi ego.a 10 Abhe yaana eginkuma eginjomu, abhe yaarera abhaana bhaaye bhwaheene, abhe yaaserenʼya abhageni, abhe yoogya abheekirirya amaguru, abhe yaabheera bhanú bharanyankibhwa, abhe yaakora amajomu kwa ekituunyo. 11 Nawe, abhasino abhasubhaati, otige okubhangʼoora kwisaabhu rya abhasino, kwa okubha enamba ya omubhiri erabhahiga okukira okwiruusya ku Kiristu, hayo bharyenda okutetwa. 12 Kwa okukora ego, bharibhuturirwa ekiina kwa okubha bhatigiri endago yaabho kuweeki, eya okutigara bira okutetwa kweki. 13 Abhasino kya bhayo, oranyoora m-booro. Oranyoora bharagendagenda mumigi, kweki oranyoora bharagamba abhantu, na okwisohya kumangʼana ga abhandi, enu bharagamba amangʼana ganú gatakubhatunʼya. 14 Mbe bhoono, oni ndeenda ega, abhasino bhanú bhataringi abhagotu, bhabhenga bharatetwa bheebhure, bhabhenga bharaangararira emigi gyabho, bhatige okuhaana abhasigu omweya gwa okutugamba obhubhiibhi. 15 Maaha ega, abhandi bhamariri okwihunjura, bhoono bharasoorana Erisambwa.
16 Nyoore omukari omwikirirya yaana abhahiiri bhaaye abhasino, abhabheere, naho erikanisa ritakirwa, rigendererye okubheera abhasino bhanú bhataana owa okubhabheera.
17 Abhakangati bhanú bhareemiririra erikanisa bhujomu, bhasuukwe na okukorerwa amajomu,b ekinene bhanú bharakora ekituunyo okuraarika na okwihigirya. 18 Ndagamba ego, kwa okubha engʼoorerwe mu Mangʼoore Amarabhu ega, “Hanú engʼombe erahuura obhuro, otaibhoha omunwa.”c Kweki ega, “Omukori wa emirimu areenderwa okurihwa amariho gaaye.”d
19 Otige okwikirirya obhujongeri eguru ya omukangati wa erikanisa, okuhikira onyoore abhantu abhabhiri kasi bhasatu bhanú bharatura okwimiririra ega, eringʼana riyo ni-rya maheene.e 20 Nawe, bhanú bharagendererya okukora obhusarya, obhakaanʼye embere ya bhonsego, naho abhandi bhonse bhoobhohe.
Obhukemeri ku Timoteo
21 Ndakukomererya embere ya Waryubha, na embere ya Kiristu Yeesu na bhamaraika abhasorwa ega, ogakore amaragiriryo gayo, otige okubhutura ekiina bhwangu, otakaakora eringʼana ryoryonse kwa okungʼahirya omuntu. 22 Otatuurira omuntu amabhoko bhwangu kumirimu gya Omukuru, kwa okubha oraatuure omusarya kumirimu, na uuwe orabha ogwateeni nawe kubhusarya bhwaye. Wiyangararire, naho obhe wa heene.
23 Okwambira bhoono, otanywa amanji ageenego, nawe obhenga oranywa-ko na edivaif enkego, kurusumo rwa obhurweri bhwaho bhwa enda na amarweri agandi ganú garakunyankya.