Abheehigirya bha obhubheehi
4
Bhoono, Omutima Omurabhu aragamba bira okubhisa ega, kuginsiku gya obhuteero, abhantu abhandi bharitiga eimani ya obhuheene, bhagwatane na ebhihwi ebhingʼeenererya, na kumeehigiryo ga amasambwa. 2 Ameehigiryo gayo, gareehigiribhwa na abhantu abhabheehi, na abha orwambe, bhanú emitima gyabho gyakwa, muna gyasambwa na ekyuma kya omururo. 3 Bhayo, bharakaanʼya abhantu ega, bhatatetana, kora bhatarya ebhyakurya ebhindi, bhinú Waryubha yaabhumba. Nawe, yaabhibhumba, naho bhanú bharamwikirirya, bhabhenga bharabhirya kwa omukumo, kwa okubha bhamanyiri obhuheene. 4 Kira ekintu kinú Waryubha yaabhumba n-kijomu,a kora kitariho ekya okwangwa. Nawe, bhyonsego bhiriibhwe kwa omukumo, 5 kwa okubha eringʼana rya Waryubha na amasabho geetu garabhikora, bhiikiriribhwe ku Waryubha.Omukori wa emirimu wa heene owa Yeesu Kiristu
6 Hanú oraahaane abhahiiri bheetu kuimani bhonsego ameehigiryo ganu, hayo nho orabha omukori wa emirimu wa heene wa Kiristu Yeesu. Kweki orabha orererwe bhujomu kubhuheene bhwa eimani yeetu na ameehigiryo amajomu ganú waagwata. 7 Otigane na amagano ga abhantu bha akare, ganú gataringi ga edini na gataana obhwera. Nawe, winarye okwikara kya ego Waryubha areenda. 8 Emanyikeeni ega, “Ekituunyo kya okunyoora eginguru gya omubhiri, kiina obhwera obhukego, nawe, okwinarya okwikara kya ego Waryubha areenda kuuna obhwera bhonsego. Ensonga yaaye niiga, oranyoora uuna endago ya obhuhoru bhwa bhoonwego na bhunú bhuriija.” 9 Eringʼana riyo ni-rya maheene, kweki abhantu bhareenderwa okurigwata. 10 Nkyo kirakora tureekongʼererya okukora emirimu kwa ekituunyo, kwa okubha tureesigira Waryubha omuhoru. Weeki ngʼo Omutuurya wa abhantu bhonsego, na ekinene bhanú bhareekirirya.
11 Amangʼana gayo, ogeehigirye na okugaragirirya. 12 Omuntu wowonse atakujeera kwa okubha okyari omumura, nawe, wikare bhwaheene okuhikira abheekirirya bhabhenga bharakuruusirya ekirengyo kubhugambi bhwaho, ebhikorwa bhyaho, obhuhanje bhwaho, eimani yaaho na obhwigwa bhwaho. 13 Okore ekituunyo okusomera abhantu Amangʼoore Amarabhu, okubharaarikira na okubheehigirya okuhikira hanú ndiija eyo. 14 Otatiga okutumira omutuho gunú Waryubha yaakuhaana, kwa okuhitira obhurooti na kwa okutuurirwa amabhoko na abhakangati bha erikanisa. 15 Ogwate bhukongʼu amangʼana gayo gonsego, naho amagendereryo gaaho, gamaahikane kubhonsego. 16 Wiyangararire uuwe omwene, wangararire na ganú oreehigirya. Ogume kumangʼana gayo, kwa okubha kwa okukora ego, oriituurya uuwe omwene na bhanú bharakwitegeerera.