Eginkuma gya abheemiririri bha erikanisa
3
Eringʼana rinu ni-rya maheene ega, “Abhantu bhanú bhareenda emirimu gya obhwimiririri bhwa erikanisa, bhayo bharabha bhahanjiri emirimu emijomu.” 2 Mbe, omwimiririri wowonse wa erikanisa areenderwa abhe omuntu unú atakugambwa obhubhiibhi. Abhe na omukari umwi ego, abhe areeribhira, kweki, abhe na egintungwa, abhe arakora amangʼana gaaye bhujomu, abhe omuserenʼya na abhe amanyiri okwihigirya. 3 Atakaabha omureebhi, kasi omukori wa eriihe, nawe, abhe omunyoohu unú ahanjiri omurembe. Kweki, atabha omunamba wa egimbirya. 4 Abhe omuntu unú areemiririra bhujomu omugi gwaye, abhe amanyiri okwihigirya abhaana bhaaye egintungwa ginú gireenderwa, na obhusuuku. 5 Nyoore omuntu atakutura okwangararira omugi gwaye omwene, aratura egaki, okwangararira erikanisa rya Waryubha? 6 Na atige okubha unú yaamwihunjurira Waryubha bhwangu hanu, ataaja okwiheema. Okwiheema kuyo, kurimukora abhuturirwe ekiina, kya ego Erisambwa ryabhuturirwa ekiina. 7 Kweki, areenderwa abhe aragungibhwa na abhantu bha kibhara, naho ataaja okunyoora amasoro na okugwatibhwa mumitego gya Erisambwa.Eginkuma gya abhabheeri bha erikanisa
8 Abhabheeri bhonse, bhabhe na egintungwa ginú gireenderwa, bhatige okubha bhararuma enu na enu, bhatige okubha abhareebhi, na bhatabha abhanamba bha egimbirya. 9 Nawe, bhareenderwa bhabhe abhantu bhanú bharagwata kwa ameetegeerero amajomu, obhuheene bhwa eimani yeetu inú Waryubha yaatutubhurira. 10 Bhayo bhonse bhasakibhwe mbere. Hanú bharaamanyikane ega, bhataana amasoro, nho bhakore emirimu giyo. 11 Egoego, abhakari bhaabhoa bhonse bhabhe na egintungwa ginú gireenderwa, bhatige okubha abhabheehi, bhabhe bhareeribhira, bhabhe abhaheene kumangʼana gonsego. 12 Abhabheeri bhayo bhonse, bhabhe na omukari umwi, na bhabhe bhareemiririra bhujomu abhaana bhaabho na emigi gyabho. 13 Abhabheeri bhanú bharakora emirimu gyabho bhujomu, bharasuukwa na bharatura okugamba bira obhoobha eguru ya eimani yaabho ku Kiristu Yeesu.
Obhuheene bhwa eimani yeetu
14 Nkungʼooreeri amangʼana gayo, onyoora ndingi haangʼi okuuja eyo. 15 Ndatura okutigita, kwa ego, onyoore omanyiri ganú gareenderwa kubhantu bha Waryubha omuhoru, kwa okubha abhantu bhaaye mbo erikanisa ryaye. Riyo ndyo riragumya obhuheene kwa okubha ndyo entimu na obhurusa bhwaye. 16 Obhuheene bhunú Waryubha yaatutubhurira m-bwa okuruguurya, bhunú tureekirirya m-bunu ega,
Kiristu yeeyorokya kwa enjira ya omubhiri,
akoorokibhwa na Omutima Omurabhub ega, m-muheene,
bhamaraikac bhakamurora,
amangʼana eguru yaaye, gakaraarikwa kubhantu bha ebhyaro bhyonsego,
akeekiriribhwa na abhantu bha ebhyaro bhyonsego,
na akasakwa okugya eguru mubhukuru.