Ameehigiryo eguru ya obhusyengeri bhwa mwikanisa
2
Mbe, ndabhasabha ega, musabhirenga abhantu bhonsego mbere, kwa amasabho ga amanga amaaru. Na mubhenga muramukumya Waryubha kurusumo rwa abhantu bhonsego. 2 Mubhenga murasabhira abhakama na abhatungi abhandi bhonsego, naho twikare kwa omurembe, enu turamwigwa Waryubha na okukora ganú gareenderwa embere yaaye. 3 Eringʼana rinu ni-rijomu, kweki riramungʼarira Waryubha Omutuurya weetu. 4 Weeki areenda abhantu bhonsego bhatuuribhwe, na okumanya obhuheene. 5 Waryubha ngʼ-umwi ego, na ariho omuntu oumwi ego, unú aragwatanʼya abhantu na Waryubha, uyo n-Kiristu Yeesu. 6 Weeki yaaruusya obhuhoru bhwaye omwene, naho atungurye abhantu bhonsego. Hayo nho, Waryubha yoorokya obhuhanje bhwaye, kwibhaga rinú rireenderwa. 7 Na kwa ekisigo kiyo, oni naatuurwa okubha omuraariki na omutumwa waaye. Ndagamba obhuheene, ntakugamba obhubheehi! Kweki naakorwa okubha omwihigirya wa okuraarika amangʼana ga eimani na obhuheene kubhantu bhanú bhataringi Abhayahudi.8 Mbe, kira ahasi hanú mureekumanʼya okusabha, ndeenda abhasaaja hanú bharasabha bheenure amabhoko eguru. Bhakore ego, kwa ameetegeerero amajomu, bhasabhe bira enkoro kasi eginhaka. 9 Egoego, na abhakari bhonse ndeenda bheebhohe emyenda bhujomu kya ego ereenderwa, bhabhe na egintungwa eginjomu na bhabhe bhareeswa. Okwijomya kwabho, kutige okubha kwa okusuka egintuukya, kasi kwa okwibhoha ebhintu bhya ebhigera na bhinú bhirangʼesangʼesa, kasi emyenda gya obhuguri obhunene. 10 Nawe, okwijomya kwabho, kubhe kwa ebhikorwa ebhijomu, kya ego ereenderwa kubhakari bhanú bheekirirya okumwigwa Waryubha. 11 Na kweki abhakari bhareenderwa okwihigira bhukiri na okubha abheegwa. 12 Ntakuhaana abhakari omweya gwa okwihigirya kora okutunga abhasaaja. Nawe, bhabhe abheegwa, 13 kwa okubha Adamu ngʼo yaakangata okubhumbwa, akaaja Haawa. 14 Kweki Adamu ataangʼeenwa, nawe, omukari ngʼo yaangʼeenwa, akasarya amaragiriryo ga Waryubha.a 15 Nawe, omukari arituuribhwa kwa okuhitira orwibhuro rwaye, nyoore araagendererye okuguma kuimani, na obhuhanje, obhurabhu na okubha abheegwa.