Amaragiriryo kubhagaya abheekirirya
6
Abhagaya bhonsego abheekirirya, bhasuuke abhakuru bhaabho, naho eriina rya Waryubha na ameehigiryo geetu eguru yaaye gatajeerwa. 2 Na abhagaya bhanú abhakuru bhaabho m-beekirirya, bhatabhajeera kwa okubha ega, m-bahiiri ku Kiristu. Nawe, bhagendererye okubhakorera emirimu bhujomu bhukongʼu, kwa okubha bhanú bharanyoora obhwera bhwa emirimu gyabho, m-beekirirya abharikyabho na abhahanje bhaabho. Amangʼana gayo, ogeehigirye na okukaanʼya.Ameehigiryo ga obhubheehi na obhuniibhi bhwa obhuheene
3 Omuntu wowonse unú areehigirye ameehigiryo ga obhubheehi, na atakwikirirya amangʼana ga obhuhoru ga Omukuru weetu Yeesu Kiristu, kora ameehigiryo ganú gararingʼaana na aga okumwigwa Waryubha, 4 uyo, areeheema bhukongʼu, enu atamanyiri ekintu. Weeki m-muntu wa okuhanja eginhaka, na okutoongʼana eguru ya amangʼana ageenego. Na gayo, gareebhukya orwango, eritoongʼana, amatuki, obhuhaamirirya, 5 na eriihe gati ya abhantu bhanú gyadangana, kora bhatamanyiri obhuheene. Bhayo mbo bharya bharakanya ega, okumwigwa Waryubha ngʼyo enjira ya okunyoora obhuniibhi.
6 Maheene ega, okumwigwa Waryubha, kuramukora omuntu abhe omuniibhi, nyoore areeswe na ebhintu bhinú yaanabhyo, 7 kwa okubha, mukyaro hanu tutaaja-ho na ekintu kyokyonse, kweki tutarigya na kyokyonse. 8 Mbe, nyoore tuuna ebhyakurya na emyenda, twiswe na bhiyo. 9 Abhantu bhanú bhareenda obhuniibhi, bharasoha mumasakyo, na okugwatibhwa mumutego gwa orunamba orwaru rwa ekikangi. Orunamba ruyo, rurakora bharasarika na okusika. 10 Okuhanja egimbirya, nko obhwambiro bhwa amabhiibhi amaaru. Abhantu abhandi bhaahanja bhukongʼu egimbirya, bhangʼeenerwe, bhahatiiri eimani, bhoono bhareenyahaara emitima gyabho kwa okwikorera obhururu obhwaru.
Amaragiriryo ku Timoteo
11 Nawe, uuwe omuntu wa Waryubha, otigane na amangʼana gayo. Ogwate obhuheene, obhwigwa ku Waryubha, eimani, obhuhanje, obhwikongʼererya na obhunyoohu. 12 Orwane bhujomu eriihe, eguru ya eimani, naho onyoore omutuho gwa obhuhoru bhwa koko. Obhuhoru bhuyo, mbo waabhirikirirwa harya weekirirya eimani yaaho embere ya abheemiririri abhaaru. 13 Ndakukomererya embere ya Waryubha unú arahaana obhuhoru ebhintu bhyonsego, na embere ya Kiristu Yeesu unú yaagamba obhwimiririri bhwa obhuheene embere ya Ponsio Piratoa ega, 14 ogumye amaragiriryo gayo gonsego bhwaheene na bira okugasarya, okuhikira hanú Omukuru weetu Yeesu Kiristu ariija. 15 Okuuja kwaye, kuribha eribhaga rinú Waryubha yaamura. Waryubha ngʼo aragungibhwa, owa eginguru, weeki ngʼo omwene obhutungi, ngʼo Omukama wa abhakama bhonsego na Omukuru wa abhakuru bhonsego. 16 Weeki omwene ngʼo atarikwa, yeekeeri mundingaasi inú omuntu atakutura okuisuntarira. Kweki, atariho omuntu unú yaamurora kora unú aratura okumurora. Yaana obhusuuku na eginguru koko! Amina.
17 Oragirirye abhaniibhi bha bhoonwego, bhatige okwiheema. Kora bhatige okwisigira obhuniibhi bhwa mukyaro hanu. Bhuyo m-bwa eribhaga ekego. Nawe, bheesigire Waryubha unú aratuhaana ebhintu bhyonsego kwa obhwaru, naho tubhitumire kwa obhujomerwa. 18 Kweki, obhakeerye bhakore amajomu, naho bhabhe abhaniibhi kwa okukora amajomu, bhabhe abhaserenʼya na bheeseemye okugwatana na abharikyabho kubhintu bhyabho. 19 Okukora amajomu kuyo, n-kwibhiikira ekibhumbiko kya obhurusa bhunú bhunagiri kurusumo rwa eginsiku ginú giraaja, naho bhanyoore obhuhoru bhwa obhuheene.
20 Ee Timoteo, wangararire bhujomu amangʼana ga obhuheene ganú oheerwe. Oteesohya kumangʼana amabhiibhi ganú gataana obhwera bhobhonse. Kweki oteesohya munhaka gya ekikangi, ginú abhandi bharabhirikira kwa obhubheehi ega, m-busomi. 21 Abhantu abhandi bhanú bhaagwata gayo, bhaatiga eimani yaabho.
Eriruguto ribhe hamwi na bheenyu bhonsego.