Okuuja kwa Omukuru Yeesu na okutubhuka kwa Omujeemi
2
Mbe bhoono, abhahiiri bheetu kuimani, turabhangʼoorera eguru ya okuuja kwa Omukuru weetu Yeesu Kiristu na kya ego turiikumanʼya kuweeki.a Turabhakomererya ega, 2 mutige okubha na enkubhi bhwangu na okoobhoha ega, orusiku rwa okuuja kwa Omukuru rwahikiri. Hamwi mureegwa ego, okurekana na obhurooti nyabhurebhe, kasi obhuraariki, kasi enyarubha inú ereeganiriribhwa ega, erwiri kubheetu. 3 Mutige okwikirirya omuntu wowonse abhangʼeene kwa ryoryonse rirya, kwa okubha orusiku ruyo rutarihika, okuhikira eginsiku ginú abhantu abhaaru bharimujeema Waryubha, na Omujeemi atubhuke. Uyo ngʼo, arisikibhwa chwe kubhuteero. 4 Weeki ariribhira kira ekintu kinú abhantu bharabhirikira ega, m-mukuru waabho, kora kira kinú bharasyengera. Na weeki ariituura eguru ya bhyonsego. Kweki arisoha na okwikara mwisyengerero erikuru rya Waryubhab na okwikorya ega, weeki ngʼo Waryubha.5 Mutakuhiituka ega, hanú naaringa hamwi na bheenyu, naabhakeerya gayo gonsego? 6 Na mumanyiri kinú kiramuribhira bhoonwego, naho atubhuke kwibhaga rinú rireenderwa. 7 Kora bhoono Omujeemi uyo, arakora emirimu bhwibhise. Nawe, ataritubhuka okuhikira hanú unú aramuribhira, ariija okuruusibhwa-ho. 8 Hayo nho Omujeemi uyo aritubhuka. Nawe, Omukuru Yeesu hanú ariija, arimwita na omwika okurwa mumunwa gwaye, na arimusikya kwa obhukuru bhwa okuuja kwaye.
9 Eribhaga rya okutubhurwa kwaye, Omujeemi uyo, ariija na eginguru gyonsego gya Erisambwac na okukora ebhimanyiiriryo na ebhiruguuryo bhya obhubheehi. 10 Aritumira obhungʼeenererya bhobhonse bhurya, okubhangʼeena bhanú bharabhura, kwa okubha bhateekirirya okuhanja obhuheene, naho bhatuuribhwe. 11 Kwa ego, Waryubha arabheekiririrya bhatungwe na eginguru gya okubhura, naho bhagendererye okwikirirya obhubheehi. 12 Hayo, bhonsego bhanú bhatakwikirirya obhuheene, nawe, bharajomererwa obhusarya, bharibhuturirwa ekiina.
Munage kuimani
13 Nawe bheetu, tureenderwa okumukumya Waryubha eribhaga ryonsego kurusumo rwenyu, bheenyu abhahiiri bheetu kuimani bhanú mwahanjwa na Omukuru Yeesu. Tureenderwa okukora ego, kwa okubha Waryubha yaabhasora okurwa kubhwambiro bhwa obhubhumbi, naho mutuuribhwe. Mutuuriibhwe kwa okuraamwa na Omutima Omurabhud na kwa enjira ya okwikirirya obhuheene. 14 Waryubha yaabhabhirikira, naho mutuuribhwe kwa enjira ya Amangʼana Amajomu ganú twabharaarikira. Yaabhabhirikira, naho munyoore obhukuru bhwa Omukuru weetu Yeesu Kiristu. 15 Mbe bhoono, abhahiiri bheetu kuimani, munage kuimani na okugwata ameehigiryo ganú mweehigiribhwa kwa amangʼana geetu kasi kwa enyarubha yeetu.