Mutusabhire ku Waryubha
3
Bhoono, abhahiiri bheetu kuimani, mutusabhire naho amangʼana eguru ya Omukuru Yeesu, gagendererye okunyaragana bhwangu, abhantu bhagagwate kwa obhusuuku, kya ego yaaringa kubheenyu. 2 Mutusabhire, naho Waryubha atutuurye okurwa kubhantu abhabhiibhi na abhasarya, kwa okubha bhataringi bhonsego bhanú bhareekirirya amangʼana gayo. 3 Nawe, Omukuru m-muheene, weeki aribhanagya bheenyu na okubhaangararira kumusarya urya Erisambwa. 4 Weeki aratuhaana obhwisige obhunene ega, bhoono murakora kya ego oranyoora turabharagirirya na kweki murigendererya okugakora. 5 Omukuru abhoorokererye okumanya bhukongʼu, obhuhanje bhwa Waryubha na obhwikongʼererya bhunú bhoorokibhwa na Kiristu.Obhukemeri eguru ya obhurosu
6 Abhahiiri bheetu kuimani, turabharagirirya kwa obhutungi bhwa Omukuru Yeesu Kiristu ega, mwiyahure okurwa kubharikyenyu abharosu bhonsego, bhanú bhatakugwata ameehigiryo ganú twabhahaana. 7 Turagamba ego, kwa okubha bheenyu mumanyiri kya ego ereenderwa okugwata ekirengyo kyetu. Bheetu eribhaga twaringa na bheenyu, tutaaringa abharosu, 8 kora tutaaryanga ebhyakurya kumuntu wowonse bhusa. Nawe, twaringa turakora emirimu kwa ekituunyo obhutiku na omubhasu, naho tutige okumunyankya omuntu wowonse kubheenyu. 9 Twakora ego, etaringi ega, tuteenderwanga okwenda ekintu okurwa kubheenyu, nawe tweendanga tubhe ekirengyo, mutwihigire. 10 Kweki kwibhaga rinú twaringa hamwi na bheenyu, twabharagirirya ega, “Omuntu wowonse unú atakwenda okukora emirimu, atarya.”
11 Turagamba amangʼana gayo, kwa okubha twigwiri ega, bhariho abhantu abhandi abharosu kubheenyu, bhatakukora kyokyonse, nawe, bhareesohya kumangʼana ga abhandi. 12 Mbe bhoono, abhantu bhayo turabhakomererya na okubhakemera kwa obhutungi bhwa Omukuru Yeesu Kiristu ega, bhabhe bharakora emirimu kwa egintungwa, naho bhanyoore ebhyakurya bhyabho abheene. 13 Nawe, bheenyu abhahiiri bheetu kuimani, mutakwa omutima okukora amajomu.
14 Nyoore omuntu wowonse atakwenda okugwata amaragiriryo geetu, ganú garingi kunyarubha inu, mwiyangararire na omuntu uyo. Mutagwatana nawe, naho arore eginsoni. 15 Nawe, mutamurora kya omusigu, mubhenga muramutongera kya omurikyenyu.
Okukeeranʼya kwa okuraga
16 Bhoono, Omukuru Yeesu omwene, obhusimuka bhwa omurembe, abhenga arabhahaana omurembe eribhaga ryonsego, kwa eginjira gyonsego. Weeki abhe hamwi na bheenyu bhonsego. 17 Oni Pauro mbangʼooreeri enkeeranʼya inu kwa okubhoko kwani omwene. Kinu nkyo ekimanyiiriryo kukira enyarubha yaani,a bhuyo mbo obhungʼoori bhwani.
18 Eriruguto rya Omukuru weetu Yeesu Kiristu, ribhe hamwi na bheenyu bhonsego.