Enyarubha ya kabhiri eya Pauro ku
Abhatesaronike
Pauro arakeeranʼya Abhatesaronike
1
Enyarubha inu erwiri kubheetu Pauro, Siriwanoa na Timoteo. Turabhangʼoorera bheenyu bhanú muringi mwikanisa rya mumugi gwa Tesaronike, bheenyu omuganda gwa abhantu bhanú mwamwikirirya Taata Waryubha na Omukuru Yeesu Kiristu.2 Turabheendera eriruguto na omurembe okurwa ku Taata Waryubha na ku Mukuru Yeesu Kiristu bhibhe hamwi na bheenyu.
Okubhutura ekiina kwa Waryubha kwibhaga rya obhuteero
3 Abhahiiri bheetu kuimani, tureenderwa okumukumya Waryubha eribhaga ryonsego kurusumo rwenyu, kwa okubha eimani yeenyu eragendererya okwaruha bhukongʼu, na obhuhanje bhwa kira omuntu kumurikyaye bhuragendererya okwaruha. 4 Kwa ego, tureeheema mumakanisa ga Waryubha kwa ekisigo kya okwigumirirya na eimani yeenyu, muginyanko gyonsego ginú muranyoora.
5 Gayo gonsego garoorokya ega, okubhutura ekiina kwa Waryubha n-kwa obhuheene. Na kwa ekisigo kiyo, bheenyu murabharwa ega, mureenderwa mubhukama bhwayeb bhunú muranyankira. 6 Waryubha ngʼo wa obhuheene, weeki aribhariha enyanko bhanú bharabhanyankya bheenyu, 7 na aribhamuunyia enyanko bheenyu hamwi na bheetu. Arikora gayo eribhaga rinú Omukuru Yeesu ariija, okurwa murwire na egindimi gya omururo, hamwi na bhamaraikac bhaaye bha eginguru. 8 Yeesu ngʼo arijibhya bhonsego bhanú bharamwanga Waryubha na bhanú bhatakugwata Amangʼana Amajomu eguru ya Omukuru weetu. 9 Obhujibhu bhwabho bhuribha bhwa okusikibhwa koko, na okwahurwa bhabhe hare na Omukuru na obhukuru bhwa eginguru gyaye. 10 Obhujibhu bhuyo, bhuribha orusiku runú Omukuru ariija okugungibhwa na okusuukwa, na abhantu bhanú bhaamwikirirya. Bheenyu bhonse muribha gati ya bhayo, kwa okubha mwikiriirye amangʼana ganú twabhareetera.
11 Kwa ego, turabhasabhira bheenyu kira orusiku, naho Waryubha weetu abhabhare ega, mureenderwa obhumenyi bhunú yaabhabhirikirira. Kweki turabhasabhira ega, kwa obhuturo bhwaye ahikye amangʼana amajomu ganú mureenda okukora na ahikye emirimu gyenyu gyonsego gya eimani. 12 Turasabha gayo, naho eriina rya Omukuru weetu Yeesu, ribhenga riragungibhwa kurusumo rwenyu. Kweki na bheenyu mubhenga muragungibhwa kurusumo rwaye. Ganu garaabhenga garakoreka okurekana na eriruguto rya Waryubha weetu, na erya Omukuru Yeesu Kiristu.