Mwikare kya ego Waryubha areenda
4
Bhoono, abhahiiri bheetu kuimani, twabheehigiirye kya ego mureenderwa okwikara, naho okumujomera Waryubha. Maheene niigo mureekara. Bhoono, turabhakomererya kwa obhutungi bhwa Omukuru Yeesu ega, mugendererye okukora ego okukira kya ego murakora bhoonwego, 2 kwa okubha mumanyiri bhujomu, amaragiriryo ganú twabharagirirya kwa obhutungi bhwa Omukuru Yeesu.3 Waryubha areenda mubhe abharabhu bha omutima, mutige okukora obhusimbe. 4 Kira oumwi weenyu ahige omubhiri gwaye,a mubhurabhu na obhusuuku. 5 Mutabha na orunamba kya abhantu bhanú bhatamanyiri Waryubha. 6 Kwa gayo, omuntu wowonse atamusarirya omurikyaye, kora okumungʼeena. Kya ego twabhakeerya na okubhakaanʼya ega, Omukuru ngʼo arariha ekisiiyomba kubhonsego bhanú bharakora gayo. 7 Waryubha ataatubhirikira okukora obhusimbe, nawe, yaatubhirikira twikare mubhurabhu. 8 Kwa ego, omuntu wowonse unú araanga ameehigiryo ganu, atakwanga omuntu, nawe, aramwanga Waryubha unú arabhahaana bheenyu Omutima waaye Omurabhu.
9 Bhoono, tutakurora nyoore ereenderwa okubhangʼoorera eguru ya okuhanjana, kwa okubha bheenyu abheene mweehigiriibhwe na Waryubha okuhanjana. 10 Maheene mwabheeri murabhakorera ego, abharikyenyu bhonsego bha mukyaro kyonsego kya Makedonia. Kora ego, abhahiiri bheetu kuimani, turabhakomererya mugendererye okuhanjana okukira hayo. 11 Mwikongʼererye okubha na omutima gwa omurembe. Munyankire amangʼana geenyu abheene, na mukore emirimu kwa amabhoko geenyu abheene, kya ego twabharagirirya. 12 Kwa okukora ego, muribha moorokerye egintungwa eginjomu kubhantu bhanú bhataringi abheekirirya. Kweki mutakubha abhantu bha okwisigira ebhya abhandi.
Mubhe na obhwisige ega, abhaku bharihyuka
13 Nawe, abhahiiri bheetu kuimani, tureenda mumanye ganú gariibhuka kubheekirirya bhanú bhaakwa, naho mutige okusurumbara kya abhantu abhandi bhanú bhataana obhwisige bhwa okuhyuka. 14 Bheetu, tureekirirya ega, Yeesu yaakwa na akahyuka. Kwa ego, tureekirirya ega, Waryubha arihyukya abhantu bhonsego bhanú bhaakwa bharamwikirirya Yeesu.b
15 Mbe, ganú turabhakeerya m-meehigiryo ga Omukuru Yeesu ega, bheetu bhanú orinyoora tukyari abhahoru kwibhaga rinú weeki arihunjuka, maheene tutaribhakangatira bhanú bhaakwa, okumuturuungʼana. 16 Omukuru omwene ariituuma okurwa murwire. Arigamba kwa eriisi rya eginguru, hamwi na eriisi rya maraikac omukuru na enkombi ya Waryubha. Nho, bhanú bhaakwa bharamwikirirya Kiristu, bharihyukibhwa. 17 Na bheetu bhanú orinyoora tukyari abhahoru, turisakwa hamwi nabho mumasaaru, naho tumuturuungʼane Omukuru eguru. Kwa ego, turiikara hamwi nawe koko. 18 Mbe bhoono, muhorisanʼye kwa amangʼana gayo.