Timoteo aratumwa Tesaronike
3
Kubhuteero, tukatamwa okugendererya okwigumirirya okwanga okumaahana na bheenyu. Nho tukarora ega, nyakara bheetu tutigare mumugi gwa Atene, 2 tumutume Timoteo omuhiiri weetu kuimani, naho yaaje okubhateremya na okubhahorisya eguru ya eimani yeenyu. Weeki m-mukori wa emirimu omurikyetu wa Waryubha, kukuraarika Amangʼana Amajomu eguru ya Kiristu. 3 Twakora ego, naho omuntu wowonse atakwa omutima, kwa ekisigo kya eginyanko ginu. Bheenyu abheene mumanyiri ega, tureenderwa okuhitira munyanko. 4 Muramanya gayo, kwa okubha eribhaga twaringa na bheenyu, twaamba okubhakeerya ega, turinyankibhwa. Bhoono ngo gayo geebhuka.5 Kwa ego, hanú oni nonse naatamwa okugendererya okwikongʼererya, nkamutuma Timoteo kubheenyu, naho mmanye eguru ya eimani yeenyu. Naakora ego, kwa okubha neeganiriryanga ega, etariija okubha Omusakya urya yaabhasakya na okubhabhurya, emirimu gyonsego ginú twakora gibhe gitaana obhwera.
Amangʼana amajomu okurwa ku Bhatesaronike
6 Nawe bhoono, Timoteo yaajiri okurwa kubheenyu, atukeererye amangʼana amajomu eguru ya eimani na obhuhanje bhwenyu. Na atukeererye ega, muratuhiituka bhukongʼu eribhaga ryonsego, na ega, mureegomba okuturora kya ego na bheetu tureegomba okubharora.
7 Kwa ego, abhahiiri bheetu kuimani, amangʼana eguru ya eimani yeenyu, gaatuteremerye, okurwa muginyanko gyetu gyonsego. 8 Bhoono tuheejeeri, kwa okubha bheenyu mwagumiri okwimirira ku Mukuru Yeesu. 9 Bhoono turatura okumuriha-ki Waryubha, naho tumukumye kwa ekisigo kya eimani yeenyu? Kora kwa ekisigo kya obhujomerwa obhunene bhunú tuunabho embere yaaye kurusumo rwenyu? 10 Obhutiku na omubhasu hanú turamusabha Waryubha, turamusabha kwa ekituunyo bhukongʼu ega, atubheere tumaahane na bheenyu, naho tubhabheere kinú murasuuhirwa eguru ya eimani yeenyu.
11 Mbe, Waryubha omwene, Taata weetu, na Omukuru weetu Yeesu, atuseemerye enjira ya okuuja kubheenyu. 12 Omukuru abhoongerye obhuhanje, naho muhanjane bhukongʼu na muhanje abhantu bhonsego, kya ego bheetu tubhahanjiri bheenyu. 13 Kweki abhateremye, naho mubhe abharabhu bha omutima, mutaana amasoro embere ya Waryubha Taata weetu, eribhaga rinú Omukuru weetu Yeesu ariija, hamwi na abharabhu bha omutimaa bhaaye bhonsego.