Emirimu gya Pauro na abharikyaye Tesaronike
2
Bheenyu abhahiiri bheetu kuimani, mumanyiri ega, bheetu okuuja kubheenyu kutaaringa kwa bhusa. 2 Kweki mumanyiri ega, eribhaga tutarahika kubheenyu, twanyakibhwa na okutukwa bhukongʼu mumugi gwa Firipi erya.a Onyoora kubheenyu twaribhirwanga bhukongʼu, Waryubha yaatuhaana eginguru gya okuraarika Amangʼana gaaye Amajomu.3 Amangʼana ganú turabhakomererya, gataringi ga okubhahabhya, ga omutima omubhiibhi, kora ga okubhangʼeena. 4 Nawe, turaraarika kwa okubha Waryubha yaatwikiririrya, akatuhaana emirimu gya okuraarika Amangʼana Amajomu. Etaringi ega, tureenda okujomera abhantu, nawe tureenda okujomera Waryubha, unú areekomyanga emitima gyetu. 5 Mumanyiri ega, tutaaringa turagamba amangʼana ga okwikomba, kora okugamba amangʼana ganú gataringi ga obhuheene, naho tunyoore obhwera. Waryubha ngʼo amanyiri ega, ganú turagamba n-ga maheene! 6 Kweki tutaaringa tureenda ega, abhantu bhatugungye, kora bheenyu, kora abhandi bhonsego. Na kwa okubha bheetu m-batumwab bha Kiristu, tukeenderi ebhintu nyabhurebhe okurwa kubheenyu, nawe tutaakora ego. 7 Twaringa abhanyoohu kubheenyu kya ego omukari ararera abhaana bhaaye. 8 Twabhahanja bhukongʼu. Kwa ego, tukajomerwa, etaringi kwa okubhakeerya Amangʼana Amajomu okurwa ku Waryubha ageenego, nawe na okwiruusya okukora gonsego ganú gareenderwa okubhabheera, kwa okubha mubheeri abhahanje bheetu.
9 Abhahiiri bheetu kuimani, murahiituka ekituunyo kyetu na okunyanka kwetu, kya ego twakoranga emirimu obhutiku na omubhasu. Twakoranga ego, naho eribhaga turaraarika Amangʼana Amajomu okurwa ku Waryubha tutaaja okunyankya omuntu wowonse kubheenyu. 10 Bheenyu mumanyiri, na Waryubha wonse amanyiri ega, egintungwa gyetu kubheenyu abheekirirya, gyaringa njomu kweki gya obhuheene na bira amasoro. 11 Kweki mumanyiri ega, eribhaga twaringa kubheenyu, twaringa turakorera kira oumwi weenyu kya ego taata arakorera abhaana bhaaye omwene. Twaringa turabhateremya emitima gyenyu, na okubhakomererya 12 ega, mubhenga mureekara kya ego Waryubha ahanjiri. Waryubha ngʼo arabhabhirikira, naho mubhe insi ya obhukama bhwaye na okusanga obhukuru bhwaye.
13 Kwa ego, turamukumya Waryubha bira okurosa, kwa okubha hanú mweegwa amangʼana gaaye okurwa kubheetu, mutaagagwata kya amangʼana ga abhantu. Nawe, mwagagwata kya amangʼana okurwa ku Waryubha, na maheene niigo eringi. Amangʼana gayo, ngo garakora emirimu mumitima gyenyu, bheenyu abheekirirya. 14 Abhahiiri bheetu kuimani, amangʼana ganú gaanyoora abhantu bhanú bhamwikiriirye Kiristu Yeesu, mumakanisa ga Waryubha mukyaro kya Yudea, ngo gabhanyooreri na bheenyu. Abhantu bheenyu bhabhanyankirye kya ego bheeki Abhayahudi abharikyabho bharabhanyankya. 15 Abhayahudi bhayo, mbo bhaamwita Omukuru Yeesu na abharooti bha akare. Kweki mbo bhaatunyankya bheetu. Abhantu bhayo, bharamujimya Waryubha. Kweki mbo abhasigu bha abhantu bhonsego, 16 kwa okubha bhaaturibhiranga okuraarika Amangʼana Amajomu kubhantu bhanú bhataringi Abhayahudi, bhonse bhature okutuuribhwa. Ego niigo bharagendererya okuhikya obhusarya bhwabho bhunú bharakora kira orusiku. Nawe bhoono, enkoro ya Waryubha ebhahikiiri!
Pauro na abharikyaye bhareegomba okubhataarira Abhatesaronike
17 Abhahiiri bheetu kuimani, okutigana kwetu na bheenyu, kwaringa kwa eribhaga ekego, kweki okutigana kuyo n-kwa ameeso, etaringi kwa emitima. Na kwibhaga riyo ryonsego, twaringa tureegomba bhukongʼu okubharora kweki. 18 Tweendanga okuuja kubheenyu, kweki oni Pauro neendanga okuuja etaringi rumwigo, nawe Erisambwac rikaturibhira. 19 Hanú Omukuru Yeesu ariija, bheenyu muribha obhwisige bhwetu, obhujomerwa bhwetu na eritaaji rya obhuhigi bhunú tureeheemera. 20 Maheene, bheenyu mbo muratukora twiheeme na okujomerwa.