Mwiseemye kurusiku rwa okuuja Omukuru Yeesu
5
Abhahiiri bheetu kuimani, tutakurora nyoore ereenderwa, okubhangʼoorera eguru ya eribhaga na orusiku rwa okuuja kwa Omukuru Yeesu, 2 kwa okubha bheenyu abheene mumanyiri ega, orusiku rwa okuuja kwa Omukuru, ruriija kya ego omwibhi araaja obhutiku. 3 Kwibhaga rinú abhantu bharigambanga ega, “Tuuna omurembe, na turingi bhwaheene,” hayo nho, amangʼana garisarika. Obhusariku bhuyo, bhuribhatakya kya ego obhusungu bhuramuujira omukari unú aringi enda. Okurekana na gayo, maheene bhatarituuribhwa kora hake.4 Nawe, bheenyu abhahiiri bheetu kuimani, orusiku ruyo rutaribhatakya kya omwibhi, kwa okubha mutaringi mukisunte kya abhandi. 5 Bheenyu bhonsego m-bantu bha endingaasi, na abha omubhasu. Bheetu bhonsego tutaringi bha obhutiku kasi bha mukisunte. 6 Mbe bhoono, tutige okubha kya abhandi bhanú bhararaara egintiro, nawe, tutengeeje na okwiribhira. 7 Abhantu bhanú bhararaara egintiro, bhararaara obhutiku, na abhareebhi bhararehwa obhutiku.
8 Nawe bheetu, m-bantu bha omubhasu, tubhenga tureeribhira. Tubhe na eimani na obhuhanje, bhiyo mbyo bhirabha kya engubha kukikubha. Kweki twisigire Waryubha okututuurya, nho turabha kya muna twibhoheri engofiira ya ekyuma kumutwe. 9 Waryubha ataatusora bheetu, naho atusikye kwa enkoro yaaye, nawe, yaatusora naho tunyoore obhutuurya okuhitira ku Mukuru weetu Yeesu Kiristu. 10 Uyo ngʼo yaakwa kurusumo rwetu, naho tubhe tumenyeri hamwi nawe, eribhaga turingi abhahoru kasi eribhaga tukwiri. 11 Mbe bhoono, mwikongʼererye okuhorisanʼya na okuteremanʼya emitima kya ego murakora.
Egintungwa ginú gireenderwa kubheekirirya
12 Bhoono, abhahiiri bheetu kuimani, turabhasabha mubhasuuke bhanú bharanyanka kurusumo rwenyu na okubhoorokererya kwa obhutungi bhwa Omukuru Yeesu, na okubhatongera. 13 Mubhasuuke bhukongʼu na okubhahanja okuringʼaana na emirimu gyabho. Kweki mubhe mureekara kwa omurembe gati yeenyu.
14 Abhahiiri bheetu kuimani, turabhakomererya, mubhenga murakemera abharosu na okubhateremya bhanú bharakwa emitima. Kweki mubhenga murabhateremya bhanú bhatarakongʼa kuimani na okubheegumirirya abhantu bhonsego. 15 Mwangararire, omuntu wowonse atamurihya ekisiiyomba omurikyaye kwa obhusarya. Nawe, eribhaga ryonsego mubhenga murakorerana amajomu na kubhantu bhonsego. 16 Mubhe na obhujomerwa eginsiku gyonsego, 17 kweki mubhenga murasabha Waryubha bira okurosa. 18 Mubhenga muramukumya Waryubha kukira ekintu, kwa okubha gayo ngo weeki areenda mubhenga murakora, kya ego Kiristu Yeesu yaatoorokererya.
19 Mutaribhira Omutima Omurabhu. 20 Kweki mutajeera obhurooti, 21 nawe, musakye amangʼana gonsego ga obhurooti na mugwate amajomu, 22 na mwiyangararire na amabhiibhi gonsego. 23 Waryubha omwene unú aratuhaana omurembe, abharaame bhukongʼu. Weeki yaangararire emitima gyenyu na obhuhoru bhwenyu na emibhiri gyenyu, naho mubhe mutaana amasoro kwibhaga rinú Omukuru weetu Yeesu Kiristu ariija. 24 Waryubha omwene unú arabhabhirikira, aribhakorera gayo, kwa okubha m-muheene.
Okukeeranʼya kwa okuraga
25 Abhahiiri bheetu kuimani, mutusabhire na bheetu bhonse ku Waryubha. 26 Mubhakeeranʼyenga abheekirirya bhonsego, kwa obhuhanje bhwa Ekikiristu. 27 Ndabhariisya emuuma kwa obhutungi bhwa Omukuru Yeesu ega, enyarubha inu mubhasomere abhahiiri bheetu bhonsego.
28 Eriruguto rya Omukuru weetu Yeesu Kiristu, ribhe hamwi na bheenyu bhonsego.