3
Bhoono, kwa okubha eginteemo gyenyu eginhya gihyukiri hamwi na Kiristu, mutune amangʼana ga murwire, enú Kiristu aringi, yeekeeri orubhaara rwa obhuryo rwa Waryubha. 2 Mwiganirirye ganú garingi murwire, muteeganirirya ga mukyaro munu, 3 kwa okubha eginteemo gyenyu gya obhusarya gyakwa. Obhuhoru bhwenyu, bhoono bhuringi hamwi na Kiristu embere ya Waryubha. Nawe, bhutakumaahikana kubhantu abhandi. 4 Obhuhoru bhwetu bhurarekana na Kiristu. Eribhaga rinú arimaahikana, nho na bheenyu murisanga hamwi nawe mubhukuru bhwaye.5 Mbe bhoono, mutige kimwi amangʼana gonsego ga mukyaro kinu ganú garingi munsi weenyu, kya obhusimbe, obhukonu, orunamba orubhiibhi, ameetegeerero amabhiibhi, na orunamba rwa ebhintu. Okubha na orunamba rwa ebhintu n-kya okusyengera ebhisusano okutiga Waryubha.a 6 Amangʼana kya gayo, ngo garakora Waryubha arajimira abhantu bhanú bhatakumwigwa.b 7 Akare hayo, bheenyu abheene mwaringa murakora gayo, hanú mwaringa muratungwa nago. 8 Nawe bhoono, mutige kimwi okujima, enkoro, obhubhiibhi, amatuki, na amangʼana amabhiibhi ganú gatakwenderwa okugambwa muminwa gyenyu. 9 Mutabheeherana, kwa okubha kya omuntu unú aruusirye emyenda emikonu, mutigiri kimwi eginteemo gyenyu gya kare, hamwi na ebhikorwa bhyagyo. 10 Bhoono, mwibhoheri eginteemo eginhya. Waryubha omwene ngʼo yaabhumba eginteemo eginhya giyo, kweki aragendererya okubhakora mutuubhane nawe bhukongʼu, naho mumumanye bhujomu. 11 Kwa ego, hatakubha-ho na obhwahukani, gati ya Omuyahudi na omuntu unú ataringi Omuyahudi, unú asaarirwe na omuriisya, omusomi na unú ataringi omusomi, omugaya na omwiyagaari.c Nawe, Kiristu omwenego ngʼo Omukuru wa gonsego na weeki ngʼo aringi munsi wa gonsego.
12 Bhoono, kwa okubha bheenyu m-basorwa bha Waryubha, abharabhu bha omitima bhanú abhahanjiri, mubhe na omutima gwa ekyabhira, kweki mubhe abhaheene, abheesuuhya, abhanyoohu na abheegumirirya. 13 Mwigumiriranʼyenga na okwabhirana. Nyoore oumwi weenyu yaana eringʼana kumurikyaye, mureenderwa okwabhirana kya ego Omukuru yaabhaabhira bheenyu. 14 Eringʼana erinene okukira gonsego, n-kuhanjana, kwa okubha obhuhanje, mbo bhurabhagwatanʼya bhonsego kubhumwi bhunú bhukuneeni. 15 Omurembe okurwa ku Kiristu gutunge mumitima gyenyu. Bheenyu mubheeri omubhiri gumwi, kwa ego, mubhirikiirwe okwikara kwa omurembe. Kweki mubhe abhantu bha omukumo. 16 Eringʼana rya Kiristu riikare kwa obhwaru munsi weenyu. Mwihigiranʼye, na okukemerana kwa egintungwa gyonsego. Mubhenga muramwimbira Waryubha kwa emitima gyenyu, kwa egijabhuri, ameembo na egitenji gya mumutima, hamwi na okumukumya.
17 Gonsego ganú murakora, ebhe kwa okugamba, kasi kwa ebhikorwa, mugakore kuriina rya Omukuru Yeesu, enu muramukumya Taata Waryubha okuhitira ku Yeesu.
Obhwikari bhunú bhureenderwa mumigi gya Abhakiristu
18 Bheenyu abhakari, musuukenga abhasaaja bheenyu, kya ego ereenderwa ku Mukuru Yeesu.d 19 Na bheenyu abhasaaja, mubhahanje abhakari bheenyu, mutabha abharuru kubheene. 20 Bheenyu abhaana, mubhasuukenga abheebhuri bheenyu kumangʼana gonsego, kwa okubha okukora ego, kuramungʼarira Omukuru Yeesu.e 21 Bheenyu bhataata, mutabhatindira abhaana bheenyu, naho bhatariija okukwa omutima.f 22 Bheenyu abhagaya, mubheegwenga abhakuru bheenyu bha mukyaro hanu, kumangʼana gonsego. Mukorenga ego, etabha kwibhaga rinú bharabhaangararira eryenego, naho okwikangatirirya kubheene. Nawe, mubheegwe eribhaga ryonsego kwa omutima gumwi, kurusumo rwa okumusuuka Omukuru Yeesu. 23 Ryoryonse rinú murakora, murikore kwa omutima gumwi, kya muna muramukorera Omukuru Yeesu, etabha kya muna murakorera abhantu. 24 Ndagamba ego, kwa okubha mumanyiri ega, Omukuru aribhahaana omutuho gunú yaabharaga abhantu bhaaye, kwa okubha Kiristu unú murakorera emirimu ngʼo Omukuru wa heene. 25 Nawe, wowonse unú arakora amabhiibhi, aririhwa okurekana na amabhiibhi gaaye, kwa okubha Waryubha ataana omungʼaho.g