4
Bheenyu abhakuru, mubhenga murabhakorera abhagaya bheenyu aga obhuheene na ganú geemiri, enu mumanyiri ega, bheenyu bhonse muuna Omukuru murwire.Amaragiriryo na amasabho ga Pauro
2 Mugume bhukongʼu kumasabho, na mutengeejenga kumasabho gayo, na enu muramukumya Waryubha. 3 Mubhenga muratusabhira na bheetu bhonse, naho Waryubha atusiikurire ekiseku kya okuraarika eringʼana ryaye. Eringʼana riyo, ndyo amangʼana eguru ya Kiristu, ganú gaaringa geebhisiri. Na kurusumo rwa okuraarika amangʼana gayo, oni ndingi mukibhohe. 4 Mubhenga muransabhira naho ngaraarike kubhurabhu kya ego ndeenderwa okugamba.
5 Mubhe na egintungwa kukumanyana na abhantu bhanú bhataramwikirirya Yeesu. Mutumire bhwaheene eribhaga ryenyu okubharaarikira eringʼana rya Waryubha.a 6 Amahairo geenyu, gabhe amajomu eginsiku gyonsego na ganú gaana omuta, naho mumanye okumukyukya kira omuntu bhujomu.
Okukeeranʼya kwa okuraga
7 Tukiko, omuhiiri weetu omuhanje kuimani, aribhakeerya amangʼana gonsego eguru yaani. Weeki m-mukori wa emirimu omuheene. Turakora nawe hamwi emirimu gya Omukuru Yeesu. 8 Ndamutuma kubheenyu, ekinene kwa ekisigo kinu, muture okumanya kya ego turagendererya na okubhateremya. 9 Ariija hamwi na Onesimo, omuhiiri weetu omuhanje na omuheene kuimani. Weeki ngʼ-wa oweenyu eyo. Bhayo, bharibhakeerya amangʼana gonsego ga oweetu hanu.
10 Aristariko, unú aringi hamwi na oni mukibhohe, arabhakeeranʼya. Mariko wonse, omubhyara wa Bharinabha arabhakeeranʼya. Mwamariri okunyoora amaragiriryo eguru yaaye. Hanú arihika kubheenyu eyo, mumuturuungʼane bhujomu. 11 Yeesu wonse unú arabhirikirwa Yusito, arabhakeeranʼya. Gati ya Abhayahudi bhanú bhaagwata eimani, abhasatu bhayo abheenego, mbo bhakyakora emirimu gya obhukama bhwa Waryubhab hamwi na oni. Bheeki bhanteremerye bhukongʼu. 12 Epafura, omuntu wa oweenyu eyo, omugaya wa Kiristu Yeesu, arabhakeeranʼya. Arakora ekituunyo okubhasabhira bheenyu eginsiku gyonsego, ega, munage na mubhe mwimiri, na mubhe abhateremu kugonsego ganú Waryubha areenda. 13 Ndamwimiririra ega, arakora emirimu bhukongʼu kwa ekituunyo kurusumo rwenyu na kubhantu bha mumigi gya Raodikia na Hierapori. 14 Ruuka, omureri weetu omuhanje, na Dema bharabhakeeranʼya. 15 Bheenyu bhonse, mutukeeranirye abhahiiri bheetu kuimani abha mumugi gwa Raodikia. Kweki mutukeeranirye Nimufa, omuhara weetu kuimani, na abheekirirya bhonsego bhanú oranyoora bhareekumanʼya iika owaaye.
16 Hanú muraamare okusoma enyarubha inu, muihikye kubheekirirya bha erikanisa rya Raodikia, naho bhonse bhaisome. Na bheenyu mutune enjira ya okuinyoora na okusoma enyarubha inú naabhatumira bheeki. 17 Mumukeerye Arikipo ega, yaangararire bhujomu emirimu ginú yaahaanwa na Omukuru, naho agikunaanʼye. 18 Oni Pauro, ndangʼoora enkeeranʼya inu kwa okubhoko kwani omwene. Muhiituke ega, ndingi mukibhohe. Eriruguto rya Waryubha ribhe hamwi na bheenyu.