2
Ndeenda mumanye kya ego ndakora emirimu kwa ekituunyo kurusumo rwenyu, na kurusumo rwa abheekirirya bha mumugi gwa Raodikia, na kurusumo rwa abheekirirya abhandi bhonsego bhanú bhataakanduuji. 2 Ndakora ego, naho emitima gyenyu giteremibhwe, na okuhanjana kwenyu kubhagwatanʼye. Ndeenda munyoore obhumanyi bhonsego bhunú bhurabhahaana obhuheene. Nho, muraamanye ekinyerera kya Waryubha kinú akare kyaringa kiibhisiri, kiyo nkyo Kiristu omwene. 3 Munsi waaye, mmo ebhibhumbiko bhyonsego bhya egintungwa na obhumanyi bhiibhisiri.4 Mbe, ndabhakeerya gayo, naho muteekirirya omuntu wowonse abhangʼeene kwa amangʼana ga obhubheehi, na kora gakaabha aga okungʼeenererya. 5 Onyoora oni omwene ntaringi hamwi na bheenyu, nawe omutima gwani guringi hamwi na bheenyu. Ndajomerwa kwa okubha ndeegwa eguru ya obhumwi bhwenyu, na okunaga kwa eimani yeenyu ku Kiristu.
Obhuhoru obhuhya ku Kiristu
6 Mbe bhoono, kya ego mwamwikirirya Kiristu Yeesu ega, m-Mukuru, mugendererye okwikara kwa okugwatana nawe. 7 Mugendererye okunaga, na okukiina kubhumwi bhwenyu na Kiristu. Mugume kuimani kya ego mweehigiribhwa. Kweki mubhenga muramukumya Waryubha bhukongʼu.
8 Mwiyangararire, omuntu wowonse atabhahabhya kwa ameehigiryo ganú gataana obhwera na aga obhubheehi. Ameehigiryo gayo, gararekana na egimiira gya abhantu na eginkoro egimbiibhi ginú giratunga ekyaro kinu.a Kweki gataringi ga Kiristu, 9 kwa okubha obhukunaani bhonsego bhwa Waryubha bhuramaahikana okuhitira ku Kiristu mumubhiri gwaye. 10 Na bheenyu muheerwe obhuhoru bhunú bhukuneeni kwa okugwatana kwenyu na Kiristu. Weeki ngʼo omutwe eguru ya abhakuru na abhatungi bhonsego bha orwire rwa eginkoro. 11 Kwa okugwatana nawe, weeki yaabhasaara kwa ensaaro inú etakukorwa kwa amabhoko ga abhantu, nawe ensaaro ya omutima inú erakorwa na weeki omwene. Ensonga yaaye niiga, mwatiga obhusimuka bhwenyu bhwa obhusarya. 12 Hanú mwabhatiijwa, obhusimuka bhwenyu bhwa obhusarya, bhwabhiikwa hamwi na Kiristu. Kimwi mukahyuka hamwi nawe, kwa okubha mweekirirya eginguru gya Waryubha unú yaamuhyukya okurwa mubhaku. 13 Bheenyu mwaringa mukwiri kwa ekisigo kya obhusarya bhwenyu, kweki mwaringa mukyari okusaarwa obhusimuka bhwenyu bhwa obhusarya. Nawe, Waryubha abhakoreri okubha abhahoru kya ego yaamuhyukya Kiristu na atwabhiiri obhusarya bhwetu bhonsego. 14 Waryubha aturihiiri esiiri ya obhusarya bhwetu kwa enjira ya Yeesu okutukwira kumusarabha. Yaaruusya-ho amangʼoore ga esiiri ganú gaatujongeranga, akagaruusya-ho kimwi kwa okugabhamba kumusarabha. 15 Kwa enjira ya omusarabha, Waryubha yaaruusya-ho eginguru gya abhakuru na abhatungi bhonsego bha orwire rwa eginkoro, akabhahiga kwa obhujomerwa, akabhasuukya kubhurabhu.
16 Mbe, omuntu wowonse atabhabhuturira ekiina eguru ya ebhyakurya, ebhya okunywa, kasi enyangi ya edini, kasi enyangi ya okutaajwa kwa omweri, kasi orusiku rwa Esabhato.b 17 Amangʼana gayo gonsego n-kiiriiri kya amangʼana ganú gariija. Nawe, obhuheene bhuringi ku Kiristu omwenego. 18 Mutamwitegeerera omuntu wowonse unú areeyorokya ega, areesuuhya kwa kibhara na okusyengera bhamaraika.c Omuntu kya uyo, atabharuusya omutuho gwenyu gwa koko. Weeki areeheemera obhurori bhwaye. Nawe maheene, akangiheeri kwa ameetegeerero gaaye amabhiibhi ga mukyaro. 19 Kweki omuntu kya uyo, yeeyahwiri okurwa ku Kiristu unú aroorokererya erikanisa kya ego omutwe guroorokererya omubhiri. Kiristu ngʼo arariisya na okugwatanʼya hamwi omubhiri gwaye gonsego kwa emiki gyago. Kwa ego, omubhiri gwaye gonsego, gurakiina bhwaheene kya ego Waryubha areenda.
20 Bheenyu, eginteemo gyenyu gya obhusarya, gyakwa hamwi na Kiristu,d kwa okubha yaabhatuurya okurwa kuginkoro egimbiibhi ginú giratunga ekyaro kinu. Bhoono kwaki mukyagendererya okwikara kya abhantu bha mukyaro munu? Muteekirirya okugwata ameehigiryo kya ganu, ega, 21 “Mutagwata kinu! Mutarabha kiyo! Mutakuunʼya kirya!” 22 Gayo gonsego, m-maragiriryo na ameehigiryo ga abhantu abheenego, eguru ya ebhintu bhinú bhirasarika hanú bhimariri okutumirwa. 23 M-maheene, bhanú bharagwata ameehigiryo gayo, bharamaahikana ega, bhaana egintungwa. Bharagwata obhusyengeri bhunú bhareekorera abheene, okwisuuhya kwa kibhara na okutunga emibhiri gyabho kwa obhuhaari. Nawe amaragiriryo gayo, gatakutura okuribhira orunamba orubhiibhi rwa omubhiri.