Enyarubha ya Pauro ku
Abhakorosai
Pauro arakeeranʼya Abhakorosai
1
Enyarubha inu, erwiri kuoni Pauro. Oni naabhirikirwa kwa obhwendi bhwa Waryubha, okubha omutumwaa wa Kiristu Yeesu, ndingi hamwi na Timoteo, omuhiiri weetu kuimani. 2 Turabhangʼoorera bheenyu abhantu bha Waryubha bhanú mureekara mumugi gwa Korosai, bheenyu abhahiiri bheetu abhaheene kukugwatana na Kiristu.Turabheendera eriruguto na omurembe okurwa ku Taata Waryubha bhibhe hamwi na bheenyu.
Amasabho na omukumo ku Waryubha
3 Kira hanú turabhasabhira bheenyu, turamukumya Waryubha, Taata wa Omukuru weetu Yeesu Kiristu. 4 Turakora ego, kwa okubha tweegwiri kya ego muramwikirirya Kiristu Yeesu, na kya ego murahanja abhantu bhonsego bha Waryubha. 5 Eimani yeenyu na obhuhanje bhwenyu, bhirarekana na obhwisige bhwenyu ega, murihaanwa eginonkwe ginú Waryubha abhatuuriiri murwire. Mwamara okwigwa eguru ya obhwisige bhuyo, eribhaga rinú mweehigiribhwa amangʼana ga obhuheene, na gayo ngo Amangʼana Amajomu. 6 Amangʼana Amajomu gayo gaahika kubheenyu, garanyaragana mukyaro kyonsego. Garagendererya okukora abhantu okumwihunjurira Waryubha, kya ego gaakoreka kubheenyu bhonse, okwambira orusiku runú mwageegwa na okumanya bhujomu eriruguto rya Waryubha kya ego riringi. 7 Mweehigiribhwa Amangʼana Amajomu gayo na Epafura. Weeki m-mukori wa emirimu omurikyetu omuhanje, aramukorera emirimu Kiristu kwa obhuheene kurusumo rwenyu. 8 Weeki ngʼo yaatukeerya eguru ya obhuhanje bhwenyu bhunú bhurarekana na Omutima Omurabhu.b
9 Kwa ekisigo kiyo, tutaratiga okubhasabhira, okurwa orusiku runú tweegwa amangʼana eguru yeenyu. Turamusabha Waryubha abhahaane okumanya gonsego ganú weeki omwene areenda. Abhahaane egintungwa gyonsego na obhumanyi bhinú bhirarekana na Omutima Omurabhu.c 10 Nho, muraature okwikara kya ego Omukuru Yeesu areenda, na okumungʼarira kumangʼana gonsego. Obhuhoru bhwenyu bhuraaruusyenga emisumo emyaru okurekana na emirimu gyenyu emijomu. Kweki muraagendererye okumumanya Waryubha bhukongʼu. 11 Turasabha ega, Waryubha agendererye okubhabheera kwa eginguru gyaye ginú gitaana obhuteero, naho muture okwigumirirya kugonsego bira okurosa. Bhoono, kwa obhujomerwa, 12 mumukumyenga Taata Waryubha, kwa okubha abhakoreri musange engabho ya abhantu bhaaye, mubhukama bhwa endingaasi. 13 Weeki yaatutuurya okurwa muginguru gya ekisunte, akatungʼaanyia na okutusohya mubhukama bhwa Omwana waayed omuhanje. 14 Kwa okuhitira ku Mwana waaye uyo, tutunguriibhwe na obhusarya bhwetu bhwabhiirwe.
Obhukuru bhwa Kiristu na emirimu gyaye
15 Kiristu n-kirengekanʼyo kya Waryubha unú atakumaahikana.
Weeki ngʼo omutangi wa ebhibhumbwa bhyonsego,
16 kwa okubha, okuhitira kumwene, ebhintu bhyonsego bhyabhumbwa,
ebhya murwire na ebhya mukyaro,
bhinú bhiramaahikana na bhinú bhitakumaahikana,
abha obhutungi kasi abhakama, abhakuru kasi abha eginguru.
Ebhintu bhyonsego, bhyabhumbwa okuhitira kumwene na kurusumo rwaye.
17 Weeki yaaringa-ho ebhintu bhyonsego bhitarabhumbwa,
na okuhitira kumwene, ebhintu bhyonsego bhiragwatana.
18 Weeki ngʼo omutwe gwa omubhiri,
ensonga yaaye niiga, ngʼo omukangati wa erikanisa.
Weeki ngʼo obhwambiro bhwa erikanisa,
kwa okubha yaabha owa mbere okuhyukibhwa okurwa mubhaku,
naho abhe omukuru eguru ya ebhintu bhyonsego.
19 Niigo, kwa okubha yaamungʼarira Waryubha ega,
obhukunaani bhwaye bhonsego bhumaahikane okuhitira ku Kiristu.e
20 Kwa enjira ya Kiristu, ebhintu bhyonsego bhyagwatanibhwa na Waryubha.
Na kwa okwitika kwa amanyinga ga Kiristu kumusarabha,
Waryubha yaakora omurembe na ebhintu bhyonsego bhya mukyaro na ebhya murwire.
21 Enyuma hayo, na bheenyu mwaringa ahare na Waryubha. Kweki mwaringa abhasigu bhaaye, kwa ekisigo kya ameetegeerero na eginteemo gyenyu egimbiibhi. Nawe bhoono, Waryubha abhagwateenʼye hamwi nawe. 22 Kwa enjira ya omubhiri gwa Kiristu, kwa okukwa kwaye, yaabhagwatanʼya naho abhareete embere yaaye mubheeri abharabhu bha omutima, mutaana akakorikori kora amasoro. 23 Nawe, mureenderwa okugendererya okubha na eimani, munage na mubhe na eginguru. Mutakyukibhwa mutige obhwisige bhunú mwanyoora hanú mweegwa Amangʼana Amajomu. Amangʼana Amajomu gayo, gaaraarikwa kubhantu bhonsego bha mukyaro hanu, na oni Pauro, naabha omukori wa emirimu waago.
Emirimu gya Pauro mumakanisa
24 Bhoono, ndajomererwa enyanko inú ndanyoora kurusumo rwenyu. Kwa enjira ya okunyanka kumubhiri gwani, ndasanga enyanko ya Kiristu inú eragendererya kurusumo rwa omubhiri gwaye. Omubhiri guyo, ngo erikanisa.f 25 Erikanisa riyo, ndyo Waryubha yaankoreri oni okubha omukori wa emirimu waaryo, naho mbaraarikire eringʼana ryaye kya ego riringi. 26 Eringʼana riyo, ndyo ekinyerera kyaye kinú kyaringa kiibhisiri okurwa akare kunyibhuro gyonsego. Nawe bhoono, Waryubha akitubhwiri kubhantu bhaaye.g 27 Waryubha yaahanja okubhatubhurira abhantu bhaaye, obhuniibhi na obhukuru bhwa ekinyerera kiyo, kora kurusumo rwa abhantu bhanú bhataringi Abhayahudi. Ekinyerera kiyo, ensonga yaaye niiga, Kiristu aringi munsi weenyu, kweki weeki ngʼo arabhahaana obhwisige ega, murisanga obhukuru bhwa Waryubha.
28 Kiristu ngʼo turaraarika amangʼana eguru yaaye, enu turakemera na okwihigirya kira omuntu kwa egintungwa gyonsego. Turamuraarika weeki, naho tubhareete abhantu bhonsego embere ya Waryubha, bhabhe bhanagiri okurekana na okugwatana kwabho na Kiristu. 29 Eringʼana riyo, ndyo rirakora ndeekongʼererya okukora emirimu kwa ekituunyo, okuringʼaana na eginguru eginene gya Kiristu ginú girakora emirimu munsi waani.