Pauro aramwisigira Kiristu omwenego
3
Mbe, abhahiiri bhaani kuimani, mujomerwe kwa okubha muringi abhantu bha Omukuru Yeesu. Oni ntakurosa okuhindira okubhangʼoorera amangʼana ganú naamara okubhangʼoorera, kwa okubha amangʼana gayo ni-ngubha yeenyu kuimani.2 Mwiyangararire na abheehigirya bhanú bharasohya amaragiriryo ga Ekiyahudi mwikanisa. Abheehigirya bhayo, n-kya eginsuuji, m-bakori bha amabhiibhi, bharakomererya okusaarwa. 3 Bheetu mbo tuuna ensaaro ya maheene. Ensaaro ya maheene n-kubha abhantu bha Waryubha. Turabha ego, kwa okubha Omutima Omurabhu aratubheera okumusyengera Waryubha. Bheetu tureeheema na okwisigira Kiristu Yeesu, tutakwisigira amakorwa ga emibhiri gyetu, okunyoora obhutuurya, 4 onyoora oni omwene niina ekisigo kya okwisigira amakorwa ga omubhiri. Nyoore ariho omuntu unú areerora ega, yaana ekisigo kya okwisigira amakorwa ga omubhiri, oni niina ekisigo ekinene bhukongʼu. 5 Naasaarwa orusiku rwa munaane okurwa okwibhurwa, ndarwira mwikabhira rya Bhenjamini, mukyaro kya Isiraeri. Oni ndingi Omwibhurania eritinya. Eguru ya okugwata amaragiriryo ga Musa, oni naagagwata bhwaheene, kwa okubha naaringa Omufarisaayo.a 6 Ekituunyo kya okugwata amaragiriryo gayo, kyakora naanyankyanga erikanisa. Eguru ya obhuheene bhunú bhurarekana na okugwata amaragiriryo, ntaaringa na amasoro gogonse.
7 Nawe bhoono, amangʼana gayo naaroranga ega, gaana obhwera, ndagarora ega, gataana obhwera kwa okubha ngwateeni na Kiristu. 8 Na kora gataringi gayo ageenego, nawe ndabhara amangʼana gonsego ega, gataana obhwera, okuringʼaanʼya na obhwera obhunene bhwa okumumanya Kiristu Yeesu, Omukuru waani. Naatigiri agandi gonsego kurusumo rwaye. Ndagabhara ega, n-kya amabhi, naho mbe omuntu wa Kiristu, 9 kweki ngwatane nawe. Ntakwisigira kweki obhuheene bhunú bhurarekana na okugwata amaragiriryo, nawe obhuheene bhunú bhurarekana na okumwikirirya Kiristu omwenego. Obhuheene bhuyo, bhuraruusibhwa na Waryubha kubhanú bharamwikirirya Kiristu.
10 Ndeenda mmumanye bhukongʼu Kiristu, na eginguru ginú Kiristu yaaringa nagyo eribhaga rya okuhyuka kwaye. Ndeenda nnyanke kya ego weeki yaanyanka, kora okuhikira okukwa, 11 naho kwa enjira yoyonse irya, ndiija okuhyukibhwa okurwa mubhaku.
Okwigumirirya okuhikira kubhuteero bhwa emirimu
12 Oni ntakugamba ega, mmariri okuhika kubhuteero, kasi ega, mmariri okukunaana, tiigo-ha, nawe ndagendererya okwigumirirya naho nnyoore, ganú Kiristu Yeesu yaambirikirira. 13 Abhahiiri bhaani kuimani, ntakwibhara ega, naamara okugagwata. Nawe, ndakora eringʼana rimwi ego, ndarabhirwa gonsego ganú gaamara okuhita, ndeehemeerererya ganú garingi embere. 14 Ndeegumirirya kurugendo, nhike kubhuteero naho nnyoore omutuho. Omutuho guyo, n-kubhirikirwa na Waryubha okusoha murwire kwa okuhitira ku Kiristu Yeesu.
15 Kwa ego, bheetu bhonsego bhanú tunagiri kuimani, tureenderwa okwikiriranʼya kumangʼana gayo. Na nyoore mureeganiriryenga obhundi, Waryubha aribhatubhurira mumanye kya ego garingi. 16 Ekintu kinú kireenderwa niiga, tugendererye okugwata ganú Waryubha yaamara okutoorokya.
Abheekirirya bhagwate enteemo ya Pauro
17 Abhahiiri bhaani kuimani, mugwate enteemo yaani. Kweki mwihigire kubhantu bhanú bharagwata eginteemo gyetu. 18 Naamara okubhakeerya mara kaaru, eguru ya eringʼana rinú ndeenda okubhakeerya, bhoono ndarigamba kweki, kora kwa ameesori, ega, abhantu abhaaru bhareekara kya abhasigu bha amangʼana ga obhutuurya bhwa Kiristu, bhunú bhuratuuka kwa okukwa kwaye kumusarabha. 19 Abhantu bhayo, obhuteero bhwabho n-kusika kwa okubha orunamba rwabho ndo rwabheeri omutungi waabho. Bheeki bhareeheemera ebhikorwa bhyabho bhya eginsoni. Kweki bhareeganirirya amangʼana ga ekyaro ageenego.
20 Nawe bheetu, m-bamenyi bha murwire, na turaganyirira kwa enamba enene, Omutuurya na Omukuru Yeesu Kiristu, yaaje okurwa eyo. 21 Weeki yaana eginguru gya okutuura ebhintu bhyonsego bhibhe insi ya obhutungi bhwaye. Kunjira ya eginguru giyo, arikyukya emibhiri gyetu gya obhunyooheeru, gibhe na obhukuru kya ego omubhiri gwaye guringi.