Okwisuuhya kya Yeesu Kiristu
2
Okugwatana kwenyu na Kiristu, kurabhateremya emitima? Na obhuhanje bhwaye bhurabhahorisya? Muuna obhumwi na Omutima Omurabhu? Kweki, muhanjirwe na okumaahirwa ekyabhira na Kiristu? 2 Mbe, mukunaanʼye obhujomerwa bhwani kwa okubha na ensonga eimwi na muhanjane bheenyu abheene kwa abheene. Kweki mubhe na obhumwi mumitima gyenyu na mubhe na ameetegeerero gamwi. 3 Mutakora eringʼana ryoryonse kwa omutima gwa orwango kora kwa ameeheemo. Nawe, mwisuuhye na mubhare abhandi okubha abha obhwera bhukongʼu okukira bheenyu abheene. 4 Kira omuntu ateeganirirya amangʼana gaaye omwenego, nawe yeeganirirye amangʼana ga abhandi gonse.5 Ensonga yeenyu ebhe iryairya yaaringa nayo Kiristu Yeesu.
6 Onyoora weeki yaaringa kya ego Waryubha aringi,
ataarora m-bujomu atame agwatiriri riyo.
7 Nawe yaatiga riyo,
akeesuuhya, akabha kya omugaya,
akeebhurwa atuubheeni na abhantu.
8 Wonse hanú yaaringa atuubheeni na abhantu,
yeesuuhya,
akabha omwigwa ku Waryubha,
akeekirirya okukwa,
kora okukwa kumusarabha!
9 Kwa ego, Waryubha akamwinura Yeesu eguru bhukongʼu, okukira ebhintu bhyonsego,
akamuhaana eriina erikuru okukira amariina gonsego,
10 naho kwa obhusuuku bhwa eriina rya Yeesu,
ebhibhumbwa bhyonsego bhimutemere ebhiru,
ebhya murwire,
ebhya mukyaro kinu,
na ebhya mukyaro kya abhaku.
11 Kweki kira omuntu yeekirirye ega, Yeesu Kiristu m-Mukuru,
na kwa okukora ego, Waryubha Taata agungibhwe.
Abheekirirya bhabhe kya endingaasi mukyaro
12 Mbe, abhahanje bhaani, eribhaga naaringa kubheenyu, mwaringa muramwigwa Waryubha eginsiku gyonsego. Egoego, kora bhoono eribhaga ndingi ahare na bheenyu, mutatiga okukora ganú gareenderwa kubhantu bhanú bhaatuuribhwa na Waryubha. Mukore gayo kwa okurigita kunú kurarekana na okumoobhoha Waryubha. 13 Mbe, mukore ego, kwa okubha Waryubha ngʼo arakora emirimu munsi weenyu, naho muhanje na okukora amangʼana ganú ahanjiri gakoreke.
14 Amangʼana gonsego ganú murakora, mugakore bira okwingʼeheerya kora okuhakaananʼya. 15 Kwa ego, mubhe abhaana bha Waryubha bhanú bhataana amasoro, kweki bhataana obhubhiibhi. Kweki mubhe abhantu bhanú bhatakugambwa obhubhiibhi gatigati ya abhantu bha bhoonwego, bhanú bheejwiri obhubhiibhi bhukongʼu. Gatigati ya abhantu bhayo, bheenyu mumaahikane kya endingaasi inú eramirika mukyaro. 16 Kweki mubharaarikire abhantu bheekirirye eringʼana rya Waryubha rinú rirabhahaana obhuhoru bhwa koko. Mukore ego, naho niheeme kurusiku runú Kiristu arihunjuka, kwa okubha emirimu ginú naakora kwa ekituunyo gatigati yeenyu, gitaaringa gya bhusa.
17 Kora nyoore amanyinga gaani, gareetirwe kya ekimwenso,a hamwi na eimani yeenyu inú eraruusibhwa ekimwenso embere ya Waryubha,b oni ndajomerwa. Ndajomerwa hamwi na bheenyu bhonsego. 18 Na bheenyu egoego mujomerwe, kweki mujomerwe hamwi na oni.
Okutumwa kwa Timoteo na Epafurodito
19 Ndeesiga ega, Omukuru Yeesu akaahanja, ndamutuma Timoteo bhwangu hanu, yaaje kubheenyu, naho hanú arihunjuka enu, oni nonse nhorisibhwe eribhaga ndiigwa kya ego muragendererya. 20 Ndamutuma, kwa okubha ntaana omuntu oundi, unú maheene abhamanyiri kya Timoteo. 21 Abhandi bhonsego bharanyankira amangʼana gaabho abheene, bhatakunyankira ganú Yeesu Kiristu areenda. 22 Nawe, mumanyiri kya ego Timoteo yeeyorokerye ega, m-mujomu. Akoreri emirimu gya okuraarika Amangʼana Amajomu hamwi na oni, kya omwana na esewaabho. 23 Kwa ego, ndeesiga okumutuma kubheenyu bhwangu, hanú ndimanya kya ego amangʼana gaani garigendererya hanu. 24 Kweki niina obhuheene ega, Omukuru Yeesu araambeere oni nonse, ndaaja eyo bhwangu hanu.
25 Nawe, bhoono nduuji ega, m-bujomu mmutume kubheenyu omwikirirya omurikyani Epafurodito, unú arakora emirimu gya Waryubha hamwi na oni. Weeki m-musirikare omurikyani kumirimu gya Waryubha. Kweki ngʼo mwatuma, naho yaaje okumbeera amangʼana ganú ndasuuhirwa. 26 Ndamutuma kwa okubha areegomba okumaahana na bheenyu bhonsego, na arasurumbara kwa okubha mweegwa ega, yaaringa omurweri. 27 Maheene yaaringa asingiri. Nawe, Waryubha yaamurorera ekyabhira akamuhwenʼya. Waryubha ataamurorera ekyabhira weeki omwenego, oni nonse yaandorera ekyabhira, naho ntasurumbara bhukongʼu, okukira kya ego ndasurumbara bhoonwego.
28 Kwa ego, ndakora ekituunyo bhukongʼu okumutuma yaaje kubheenyu, naho hanú murimurora kweki, mujomerwe, oni nonse omutima gwani gusimbiire. 29 Mbe bhoono, mumuturuungʼane kwa obhujomerwa obhunene, omuhiiri weenyu uyo ku Mukuru Yeesu. Mubharenga abhantu kya uyo, ega, m-bantu bha okusuukwa, 30 kwa okubha yaaringa haangʼi okukwa, kurusumo rwa emirimu gya Kiristu. Yaaringa ateeri obhuhoru bhwaye mungʼanga, naho amare ganú bheenyu mwatamwa okunkorera kwa okubha ndingi hare na bheenyu.