Enyarubha ya Pauro ku
Abhafiripi
Pauro arakeeranʼya Abhafiripi
1
Enyarubha inu, erwiri kuoni Pauro, ndingi hamwi na Timoteo, omugaya omurikyani ku Kiristu Yeesu. Turabhangʼoorera bheenyu abheemiririri na abhabheeri bha erikanisa, na bheenyu abhantu bhonsego bha Waryubha bhanú mwagwatana na Kiristu Yeesu, Firipi eyo.2 Turabheendera eriruguto na omurembe okurwa ku Taata Waryubha na ku Mukuru Yeesu Kiristu, bhibhe hamwi na bheenyu.
Pauro arabhasabhira Abhafiripi
3 Kira hanú ndabhahiituka bheenyu, ndamukumya Waryubha waani. 4 Na kira hanú ndabhasabhira, ndabhasabhira bheenyu bhonsego kwa obhujomerwa, 5 kwa okubha bheenyu mwagwatana na oni kubhuraariki bhwa Amangʼana Amajomu, okurwa orusiku runú mwageegwa na okugeekirirya okuhikira reero. 6 Niina obhuheene ega, Waryubha unú yaamba emirimu emijomu mumitima gyenyu, arigigendererya okuhikira gikunaane kurusiku runú Kiristu Yeesu arihunjuka.
7 M-bujomu niganirirye ego eguru yeenyu bhonsego, kwa okubha mbahanjiri bhukongʼu. Murasanga eriruguto rya Waryubha hamwi na oni, hanú ndingi mukibhohe na hanú neebhagiriranga na okukomererya Amangʼana Amajomu kubhurabhu. 8 Waryubha amanyiri ega, ndagamba obhuheene hanú ndakomererya ega, ndeegomba bhukongʼu okubhamaaha bhonsego kweki. Mbahanjiri bheenyu kwa obhuhanje bhuryabhurya kya ego Kiristu Yeesu abhahanjiri bheenyu.
9 Amasabho gaani ku Waryubha niiga, obhuhanje bhwenyu bhugendererye okwaruha bhukongʼu, mubhe na obhumanyi na obhungʼeeni bhonsego, 10 naho muture okusora amajomu kwa egintungwa. Hayo nho muribha abha emitima gya heene, kweki muribha mutaana amasoro okuhikira orusiku runú Kiristu arihunjuka. 11 Obhwikari bhwenyu, bhuriijura amangʼana ga obhuheene ganú garatuuka kwa enjira ya okumwikirirya Yeesu Kiristu, naho gamutogoonʼye na okumugungya Waryubha.
Okwikara n-kumukorera emirimu Kiristu
12 Mbe, abhahiiri bhaani kuimani, ndeenda mumanye ega, gonsego ganú gannyooreri, gambeereri bhukongʼu okunyaraganʼya Amangʼana Amajomu. 13 Okurekana na gayo, emanyikeeni kubharindi bhonsego bha enyumba ya ekikama, na kubhandi bhonsego abha hanu ega, mboherwe kwa okubha ndamukorera emirimu Kiristu. 14 Hamwi na gayo, mmanyiri ega, okubhohwa kwani kunu, kukoreri abheekirirya abharikyetu abhaaru, bhanagiri ku Mukuru Yeesu kurusumo rwa okuraarika eringʼana rya Waryubha kwa ekituunyo na obhuteremu bhukongʼu.
15 M-buheene ega, bhariho abhandi bhanú bhararaarika amangʼana eguru ya Kiristu kwa orwango na kwa obhutindi. Nawe, abhandi bharagaraarika kwa omutima omujomu. 16 Bhanu bharakora ego kwa obhuhanje, bhamanyiri bhujomu ega, nteerwe mukibhohe, naho nibhagirire Amangʼana Amajomu. 17 Nawe, bharya abha obhutindi, bhararaarika amangʼana eguru ya Kiristu kwa orwango, kora etaringi kwa omutima gwa heene. Bhareenda okoongerya enyanko yaani mukibhohe.
18 Nawe bhoono, ntatuniibhwe na gayo. Ebhe kwa omutima omubhiibhi kasi kwa omutima gwa heene, amangʼana eguru ya Kiristu gararaarikwa. Na oni ndajomerwa kwa ekisigo kya eringʼana riyo. Kweki ndigendererya okubha na obhujomerwa. 19 Kinú mmanyiri niiga, ndituuribhwa okurwa kugonsego ganú ganyooreri, kwa okubha muransabhira ku Waryubha, kweki Omutima Omurabhua wa Yeesu Kiristu arambeera. 20 Ndaganyirira kwa enamba enene na kwa obhwisige ega, ntarisuukibhwa kwa enjira yoyonse irya. Nawe, kora bhoono ndagendererya okwikongʼererya kya ego ndakora eginsiku gyonsego, naho Kiristu agungibhwe kugonsego ganú ndakora, ebhe ntame omuhoru kasi nkwe.
21 Ndagamba ego, kwa okubha oni ndaatame omuhoru, obhuhoru bhwani bhuribha obhwa okumukorera emirimu Kiristu. Kweki nkaakwa, okukwa kwani kuribha kwa obhwera obhunene, kwa okubha ndibha omuhoru hamwi na Kiristu. 22 Nawe, ndaagendererye okutama mukyaro, ndagendererya okurora emisumo gya emirimu ginú ndakora. Bhoono ntamanyiri nsore riiha! 23 Ndarutwa na amangʼana gabhiri. Ndeenda okurwa mukyaro hanu, ngye nikare hamwi na Kiristu, kwa okubha riyo ndyo eringʼana erijomu bhukongʼu kuoni. 24 Nawe kweki, ereenderwa bhukongʼu, oni ngendererye okwikara mukyaro kurusumo rwenyu. 25 Maheene niina obhuheene bhwa eringʼana riyo, kwa ego mmanyiri ega, ndigendererya okutama mukyaro. Kweki ndibha hamwi na bheenyu bhonsego, naho mbabheere munage na okujomerwa kuimani yeenyu. 26 Hanú ndibha hamwi na bheenyu, murijomerwa bhukongʼu kurusumo rwa Kiristu Yeesu, kwa okubha aribha yambeereri nhunjuke kubheenyu.
27 Mbe, eginteemo gyenyu giringʼaane na Amangʼana Amajomu eguru ya Kiristu. Nyoore ndiija okubharora kasi ntariija, niigwe ega, muragendererya okunaga na okubha na obhumwi, enu muranyankira kwa omutima gumwi, eimani inú erarekana na Amangʼana Amajomu. 28 Kweki niigwenga ega, mutakoobhoha abhasigu bheenyu kora hake. Okukora ego, kuribhoorokya ega, bheeki bharisikibhwa, nawe bheenyu, murituuribhwa. Gayo gonsego m-mirimu gya Waryubha. 29 Ndagamba ego, kwa okubha mutaahaanwa eriruguto rya okumwikirirya Kiristu okwenego, nawe mwahaanwa kora eriruguto rya okunyankibhwa kurusumo rwaye. 30 Murarwana eriihe riryarirya naarwana, kya ego mwarora. Kweki kora bhoono mureegwa ega, ndagendererya okurirwana.